AŋRomans 3
3
1Ko anaŋfa thɔŋ uYuda ɔ ba-e? Thalɔm ko kəthɛksɛ kəbirons kə gbəli ba-e? 2Agbathi gbo rə roŋ o roŋ. Ka ɔtɔtɔkɔ, pəkasifɛ a maŋkər anYuda mȧgbal məsəm ma Kuru. 3To pə yi bepi alɔm aŋ yi hɛ abɔthi lanɛ-e? Kate lanɛ ka ŋaŋ kə tə gbəli yɔ kabɔthi lanɛ ka Kuru kə thamrɔ-i? 4Saki ti; yao, ta Kuru ɔ yi təteŋ hali wuni o wuni ɔ yi uyem, mɔ mə a po gbal kəpa,
Kama mə sɔthɔ məmari ka mapa ma mu,
Dɛ yi mə ŋap ŋaŋ aŋa mə thonkas mu.
5Kɛrɛ bepi makənə ma su mə yɔ mȧlompi ma Kuru tə kəbar tɔri gbəraŋ-e, to mə sə gbəli pa-e? Sə gbəli pa Kuru ɔ yi hɛ ulompi ma ɔ thalər wuni-i? (I fɔf mɔ wuni kəpet). 6Saki ti. Bepi pə yi yaŋ-e, to Kuru mɔ gbəli rɔk ɛpa ya raru-e? 7Bepi pə yi rayem ra mi rə mə yɔ tȧteŋ ta Kuru tə bȧr sɔthɔ yiki-e, ta kɔyɛŋ mɔ thonkas mi mɔ wuni ka ahakɛ-e? 8Ɔwa kɔyɛŋ sə te pa, (mɔ mə alɔm aŋa mə fofiya su kəpa sə pa ye), Ta sə yɔ ɔləs kȧmȧ ɔfinɔ ɔ wur-e? Mȧtheri ma aŋfəm ŋati mə tə yi məlompi.
9To pə yi thɔŋ-a? Saŋ aYuda sə thasi aŋlɔm-i? Sako; ȧtesoma-e sə po tɔri kəpa aŋYuda yi tȧbona təlɔm, ŋa bɛ aŋ yi roratha ka aŋfɔsɔ ŋa ahakɛ. 10Mɔ mȧ a po gbal kəpa,
Wuni lompi ɔ yi hɛ hali ukin.
11Wuni tȧrȧ tȧy ɔ yi hɛ, Wuni ɔwe thɛns Kuru ɔ yi hɛ.
12Ŋa bɛ aŋ po sɔkar, ŋa bɛ aŋ po gbɔgbətha,
Hali wuni kin ɔ yi hɛ ɔwe mə yɔ ɔfinɔ.
13Ɛbolo yaŋ ɛ yi gbo mɔ təboma təkanthɛ,
Ka tȧmer taŋ aŋ fɔf yaŋfa.
Mȧkɔn ma ɛlɔfɔth mə yi roratha ka tasəŋ taŋ;
14Tasəŋ taŋ tə la yi tənal yi sim təroŋkəth.
15Ȧtȧtək taŋ tə yi təfəŋf tə kəloŋ mətir.
16Kȧdinɛ yi amɔnɛ kə yi ka asoŋ taŋ,
17Ȧroŋ da mȧthɔfəl, aŋ la hɛ tȧrȧ ri.
18Ranes ra Kuru rə yi hɛ rodi ka ɛfɔr yaŋ.
19Ɔwa sə tȧrȧ kəpa mȧtȧy ama ȧŋthɔ aŋ pa, aŋ fɔfȧnɛ ŋaŋ aŋa yi roratha ka ȧŋthɔ, kȧmȧ a kantha kəsəŋ o kəsəŋ, dɛ yi kȧmȧ ȧdȧru bɛ rə ba mətheri rodi ka Kuru. 20Pəkasifɛ salata mȧyɔs ma ȧŋthɔ wuni o wuni ɔ gbəli hɛ sɔthɔ məmari. Ka kakəli kɔŋ; kotȧy-e ȧŋthɔ aŋ sɔŋ su kȧtȧrȧ ka aŋhakɛ
21Kɛrɛ ka-ake mȧlompi ma Kuru mə tɔrinɛ kəgbaskinɛ kəwur ka ȧŋthɔ, ɔwa ȧŋthɔ yi Aŋnȧbi ŋa seri ta mȧlompi mati. 22Mȧlompi ma Kuru asabu ŋa kȧlanɛ ka Yisɔs Kraystȧŋ mə yi ka ŋa bɛ aŋa mə lanɛ. 23kotȧy-e ɔgbaskɛ ɔ yi hɛ, ȧtesoma-e afəm bɛ aŋ po yɔ ahakɛ, ɔwa aŋ bun aŋyiki ŋa Kuru, 24kɛrɛ aŋ sɔthɔ məmari məyaŋkaŋ salata ȧŋboŋa ŋɔŋ kətaŋ ka kabani ȧke yi ka Yisɔs Kraystȧŋ. 25kotȧy-e Kuru ɔ təmər kɔ tə kəyi unɛmthɛnɛ salata kȧlanɛ ka mȧtir mɔŋ. Ɔ yɔ ȧte kȧmȧ ɔ tɔri mȧlompi mɔŋ, ȧtesoma-e ka kamuyu kɔŋ ɔ po painɛ ɛhakɛ ɛyɛ aŋ po yɔ, 26tə kətɔri mȧlompi mɔŋ ka ȧŋlɔkɔ aŋe, tə kəyi, kɔn kɔnɔnɛ ɔ yi ulompi, ɔwa ɔ gbəli sɔŋ məlompi sɔ ka kɔn ɔwe mə lanɛ ka Yisɔs.
27Kəkolonɛ, reke kə yi thɔŋ sɔ-a? Kə gbəli hɛ yi. Kɔyɛŋ kə te gbəli yi-e? Ta asabu ŋa mȧyɔs-i? Sako, pə yi ta ȧŋsabu ŋa kȧlanɛ. 28Tiyȧŋ sə gbək kəpa ye, wuni ɔ sɔthɔ məlompi rə kəlanɛ kəte ba mȧyɔs ma ȧŋthɔ. 29Kuru ɔ yi ɔKuru ka aŋYuda gbo son-i? Ɔ yi hɛ sɔ ɔKuru ka tȧbona təlɔm-i? Yao, ɔ yi sɔ ka tȧbona təlɔm. 30Ma sə tȧrȧ ɔKuru kin gbo ɔ yi, kɔnɔ ɔ tə sɔŋ məlompi ka ȧŋbirons salata kȧlanɛ, dɛ yi aŋa te yi abirons sɔ, maŋ tɔri kȧlanɛ kati. 31Saŋ sə yɔ kȧlanɛ ake tə kədim anthɔ-i? Saki ti! Sə bȧksər ȧŋthɔ.
Currently Selected:
AŋRomans 3: TMNNT
Highlight
Copy
Compare
Share
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.