Apɔsul Dɛn Wok 6
6
Dɛn Pik Sɛvin Pipul
1Da tɛm de, as mɔ ɛn mɔ pipul de biliv pan Jizɔs Krays, sɔm cham-mɔt bin kam. Dɛn Ju pipul we kɔmɔt Gris bin de grɔmbul se dɛn Ju pipul we bɔn na Jerusɛlɛm nɔ de gi dɛn Ju uman we kɔmɔt Gris we dɛn man dɔn day, wetin dɛn fɔ gi dɛn ɛvri de. 2So, di twɛlv apɔsul dɛn kɔl mitin wit ɔl dɛn pipul we bin biliv pan Jizɔs ɛn se, “I nɔ go gud fɔ mek wi, we na Jizɔs in apɔsul dɛn, lɛf fɔ tɛl pipul bɔt Gɔd ɛn kam bigin gi dɛn uman we dɛn man dɔn day ɔl wetin dɛn fɔ gɛt. 3Na dat mek wi want una fɔ pik sɛvin pipul pan unasɛf, we wi go mek du dis wok. Una fɔ pik pipul we una ɔl rɛspɛkt, dɛn fɔ gɛt Gɔd in Spirit ɛn dɛn fɔ sabi bɔt tin dɛn gud. 4Wi, we na di apɔsul dɛn, go jɛs de fɔ pre ɛn fɔ tɛl pipul bɔt Gɔd.”
5Ɔl di pipul dɛn we bin go dis mitin gri wit wetin di apɔsul dɛn tɔk. So dɛn pik Stivin, we na man we bin biliv Gɔd ɛn Gɔd in Spirit bin de insay am. Dɛn pik Filip, Prɔkorɔs, Nikenɔ, Taymɔn, Pami nas, ɛn Nikolɔs we bin kɔmɔt Antiɔk ɛn bin gri fɔ bi Ju. 6Ɔl di pipul dɛn we bin de na di mitin kɛr di sɛvin man dɛn we dɛn pik go sho di apɔsul dɛn. Di apɔsul dɛn put dɛn an pan di sɛvin man dɛn ed, dɛn pre fɔ dɛn ɛn blɛs dɛn.
7Na dat mek Gɔd in wɔd go ɔlsay ɛn mɔ ɛn mɔ pipul biliv pan Jizɔs na Jerusɛlɛm, ɛn plɛnti pan dɛn man we de mek sakrifays fɔ pipul sin gri fɔ biliv pan Jizɔs Krays.
Dɛn Ol Stivin
8Stivin na bin man we gɛt Gɔd in blɛsin ɛn Gɔd in pawa we mek i ebul du plɛnti big wok we ɔlman si. 9Bɔt sɔm pipul na di Ju mitin os we dɛn bin de kɔl “fri pipul” nɔ bin gri wit Stivin. Dɛn na bin Ju pipul we kɔmɔt Sayrini ɛn Alɛgzanda, ɛn sɔm ɔda Ju pipul dɛn we kɔmɔt Silishia ɛn wan smɔl ples we dɛn kɔl Eshya. 10Bɔt Gɔd in Spirit gi Stivin plɛnti sɛns, so dat wɛn i tɔk nɔbɔdi nɔba gɛt natin fɔ se. 11Di Ju pipul dɛn pe sɔm pipul fɔ lay pan Stivin. Dɛn se, “Wi yɛri dis man de tɔk kyalɛs tɔk bɔt Mozis ɛn Gɔd.” 12Dɛn sem Ju pipul ya put wɔd na di pipul dɛn yes, dɔn dɛn put wɔd na dɛn bigman ɛn dɛn Ju Lɔ ticha dɛn yes, fɔ mek dɛn ol Stivin. Dɛn go grip Stivin, drɛg am go na di Ju gran kot. 13Dɛn fɛn pipul fɔ lay pan am; di pipul dɛn se, “Dis man kin tɔk bad bɔt Gɔd in Os ɛn di Lɔ we Gɔd gi Mozis. 14Wi dɔn yɛri i de tɔk se Jizɔs, da man we kɔmɔt Nazarɛt, go brok Gɔd in Os kam dɔŋ ɛn i go chenj ɔl wetin Mozis bin lan wi grampapa papa dɛn we wi de du tide.” 15Ɔl di pipul dɛn we bin sidɔm na di Ju gran kot bin de luk Stivin insay in yay, ɛn dɛn si se in fes bin tan lɛkɛ enjɛl fes.
Currently Selected:
Apɔsul Dɛn Wok 6: KRIO13
Highlight
Share
Compare
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
