Apɔsul Dɛn Wok 21
21
Pɔl Go Jerusɛlɛm
1Wɛn wi dɔn tɛl dɛn gudbay ɛn lɛf dɛn, wi tek big bot we kɛr wi go na wan tɔŋ we nem Kɔs; di ɔda de wi rich Rods, wɛn wi kɔmɔt de, wi go Patara. 2Wi mit bot de we bin de go Finishia, wi go insay di bot, i kɛr wi go. 3Wi si Sayprɔs na wi lɛfan, bɔt di bot go sote wi rich Siria. Dɛn pul lod na di bot na Taya so wi kam dɔŋ fɔs. 4Wi mit sɔm Kristiɛn dɛn de, wi tap to dɛn wan wik. Gɔd in Spirit mek dɛn tɛl Pɔl se i nɔ fɔ go Jerusɛlɛm. 5Bɔt wɛn di tɛm rich fɔ kɔmɔt Taya, dɛn ɔl, man, wɛf, ɛn pikin go lɛf wi na rod wɛn wi de go. Wɛn wi rich na di sho, wi ɔl nil dɔŋ ɛn pre. 6Wi tɛl dɛn gudbay. Wi go insay di bot ɛn dɛn tɔn bak go na dɛn os.
7Di big bot kɔmɔt Taya go Tɔlɛmis. Wi go tɛl di Kristiɛn dɛn adu ɛn tap to dɛn wande. 8Di ɔda de wi kɔmɔt Tɔlɛmis go Sizaria. Wi go tap to wan man we bin de tɛl pipul di Gud Nyuz, i bin nem Filip. Na bin wan pan dɛn sɛvin pipul we dɛn bin pik na Jerusɛlɛm fɔ ɛp fɔ du Gɔd wok. 9I bin gɛt fo gyal pikin we nɔ bin mared yet. Dɛn pikin ya na bin prɔfɛt. 10Wi bin te na Sizaria ɛn wan prɔfɛt we nem Agabɔs, we kɔmɔt Judia, mit wi de. 11I kam to wi, i tek Pɔl in bɛlt ɛn tay in yon tu an ɛn tu fut. I se, “Gɔd in Spirit se, ‘Na so dɛn Ju pipul na Jerusɛlɛm go tay di pɔsin we gɛt dis bɛlt ɛn dɛn go an am oba gi dɛn pipul we nɔto Ju.’”
12Wɛn wi yɛri dat, wi ɛn di pipul dɛn na di tɔŋ beg Pɔl mek i nɔ go Jerusɛlɛm. 13Bɔt Pɔl aks dɛn se, “Wetin una de du, we una de kray so, una go mek mi at pwɛl? A rɛdi fɔ mek dɛn tay mi ɛn a rɛdi sɛf fɔ mek dɛn kil mi fɔseka Masta Jizɔs.”
14Wi nɔ ebul mek i chenj in maynd, so wi lɛf fɔ beg am, wi se, “Mek wetin di Masta want, bi.”
15I nɔ tu te, wi pak wi tiŋs dɛn ɛn lɛf fɔ go Jerusɛlɛm. 16Sɔm pan di Kristiɛn dɛn na Sizaria fala wi go Jerusɛlɛm. Dɛn kɛr wi go na Nesɔn we kɔmɔt Sayprɔs, in os; Nesɔn na bin wan pan di fɔs Kristiɛn dɛn.
Pɔl Go to Jems
17Wɛn wi rich Jerusɛlɛm, di Kristiɛn dɛn gladi fɔ si wi. 18Di ɔda de Pɔl fala wi go to Jems, ɛn ɔl di bigman dɛn na di chɔch bin de na di ples. 19Wɛn Pɔl dɔn tɛl dɛn adu, i tɛl dɛn se Gɔd pik am fɔ du in wok ɛn i fɔ wok wit dɛn pipul we nɔto Ju. 20Wɛn dɛn yɛri wetin Pɔl tɔk, dɛn ɔl prez Gɔd. Dɛn se, “Brɔda Pɔl, yu dɔn si ɔmɔs tawzin Ju pipul na Jerusɛlɛm dɔn bi Kristiɛn ɛn dɛn de kip wi Ju Lɔ gud gud wan. 21Dɛn bin dɔn tɛl dɛn bɔt yu, dɛn se yu de lan ɔl dɛn Ju pipul we de na dɛn ɔda kɔntri se dɛn nɔ fɔ de du wetin di Ju Lɔ se; dɛn nɔ fɔ sakɔmsayz dɛn pikin ɛn dɛn nɔ fɔ de du dɛn tin we di Ju dɛn de du we dɛn grampapa papa dɛn lan dɛn fɔ du. 22Dɛn mɔs no se yu dɔn kam. Wɛl, wetin go apin naw? 23Yu fɔ du wetin wi de tɛl yu fɔ du naw. Fo man de ya we bin dɔn prɔmis Gɔd fɔ du sɔntin. 24Una ɔl go du dɛn tin we dɛn de du fɔ mek dɛn klin na Gɔd in yay, ɛn yu fɔ pe fɔ dɛn, so dat dɛn go ebul shayn dɛn ed. If yu du dat, ɔlman go no se wetin pipul bin de tɔk bɔt yu nɔ tru, dɛn go no se yusɛf de kip di Lɔ we Gɔd gi Mozis. 25Naw a want tɔk bɔt dɛn Kristiɛn we nɔto Ju: wi dɔn rayt lɛta to dɛn se dɛn nɔ fɔ it ɛnitin we dɛn dɔn sakrifays to dɛn gɔd, dɛn nɔ fɔ it bif we gɛt blɔd pan am, dɛn nɔ fɔ it blɔd, ɛn dɛn nɔ fɔ liv fri layf.”
26Di ɔda de, Pɔl ɛn di man dɛn du di tin dɛn we fɔ mek dɛn klin na Gɔd yay. Dɔn dɛn ɔl go na Gɔd in Os fɔ mek pipul no di tɛm we dɛn fɔ tap fɔ du dɛn tin we fɔ mek dɛn klin na Gɔd yay, we dɛn go mek sakrifays fɔ dɛn.
Dɛn Ol Pɔl na Gɔd In Os
27Wɛn Pɔl dɛn bin dɔn de bɔt sɛvin de na Gɔd in Os, sɔm Ju pipul we kɔmɔt Eshya si Pɔl insay Gɔd in Os. 28Dɛn Ju pipul ya se, “Wi Izrɛl pipul dɛn, una kam ɛp wi! Na dis man de go ɔlsay de lan pipul bad tin dɛn bɔt wi di Izrɛl pipul dɛn, di Lɔ we Gɔd bin gi Mozis, ɛn Gɔd in Os na dis tɔŋ. Nɔto dat nɔmɔ i dɔn du, naw i dɔn briŋ Grik pipul dɛn kam insay Gɔd in Os fɔ pwɛl dis ples we na Gɔd yon!” 29Di Ju pipul dɛn tɔk dat bikɔs dɛn bin si Trɔfimɔs we kɔmɔt Ɛfisɔs wit Pɔl na di tɔŋ, so dɛn min se Pɔl kɛr Trɔfimɔs go insay Gɔd in Os.
30Dat mek ala-ala prɛd ɔlɔbɔt na di tɔŋ. Ɔl di pipul dɛn rɔn go gɛda wan ples, dɛn ol Pɔl, drɛg am kɔmɔt insay Gɔd in Os, dɔn dɛn lɔk di do dɛn na Gɔd in Os. 31Di pipul dɛn bin de tray fɔ kil Pɔl, nain dɛn sɛn go tɛl di Roman soja man dɛn edman se fɛt de na di tɔŋ. 32Di soja man dɛn edman tek sɔm soja man ɛn sɔm ɔfisa dɛn fɔ go mit di pipul dɛn we bin de fɛt. Di pipul dɛn lɛf fɔ bit Pɔl wɛn dɛn si di soja man dɛn. 33Di soja man dɛn edman go mit Pɔl ɛn mek dɛn tay am wit tu chen. Dɛn, i aks dɛn se, “Udat na dis man, wetin i du?” 34Sɔm pipul ala wan tin, sɔm ala ɔda tin. Di nɔys bin so plɛnti dat di edman nɔ ebul no wetin bi, so i mek in soja man dɛn kɛr Pɔl go na dɛn barik. 35Wɛn dɛn rich na di stɛp, di soja man dɛn bin gɛt fɔ tot Pɔl bikɔs di pipul dɛn bin wayl. 36Ɔl di pipul dɛn we bin de fala Pɔl bin de ala se, “Una mek wi kil am!”
Pɔl Tɔk to di Pipul dɛn
37Wɛn di soja man dɛn bin want tot Pɔl go insay di barik, na de Pɔl tɛl di edman se, “Duya, mek a tɔk to yu!”
Di edman aks am se, “Yu kin tɔk Grik? 38So yu nɔto da Ijipt man we bin mek pipul strayk na ya, da man we bin kɛr fo tawzin man dɛn we de kil pipul, go na di dɛzat?”
39Pɔl ansa am se, “Mi na Ju man ɛn a kɔmɔt Tasɔs we de na Silishia. Di tɔŋ we a bɔn nɔto lili tɔŋ. Duya, gi mi chans lɛ a tɔk to dɛn pipul ya.”
40Di edman gi Pɔl chans fɔ tɔk. Pɔl tinap na di stɛp, i mek sayn to di pipul dɛn wit in an; wɛn di pipul dɛn dɔn sɛt mɔt, i tɔk to dɛn na Ibru.
Currently Selected:
Apɔsul Dɛn Wok 21: KRIO13
Highlight
Share
Compare
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
