Apɔsul Dɛn Wok 14

Pɔl de na Aykonyɔm

1Di sem tin bi na Aykonyɔm. Wɛn Pɔl ɛn Banabas bin de na Aykonyɔm, dɛn go na di Ju mitin os; bay aw dɛn tɔk to di pipul dɛn plɛnti Ju pipul ɛn plɛnti pipul we nɔto bin Ju we kɔmɔt Gris, biliv pan Jizɔs. 2Bɔt dɛn Ju pipul we nɔ bin gri fɔ biliv pan Jizɔs put wɔd na dɛn pipul we nɔto bin Ju dɛn yes ɛn dɛn du di Kristiɛn dɛn bad. 3Di apɔsul dɛn bin de lɔŋ na Aykonyɔm. Di apɔsul dɛn nɔ bin de fred fɔ tɛl di pipul dɛn bɔt di Masta ɛn di Masta sho se na tru tin di apɔsul dɛn bin de tɔk wɛn dɛn se i gud, ɛn i gi dɛn pawa fɔ du plɛnti wɔndaful wok. 4Di pipul dɛn na di tɔŋ bin sheb; sɔm pipul bin de fɔ di Ju pipul dɛn ɛn sɔm bin de fɔ di apɔsul dɛn.

5So dɛn pipul we nɔto bin Ju, dɛn Ju pipul, ɛn dɛn yon bigman dɛn mek bagin fɔ du di apɔsul dɛn bad ɛn fɔ ston dɛn. 6Wɛn di apɔsul dɛn yɛri dat, dɛn rɔnawe go ayd na wan kɔntri we nem Laykao nia. Di tɔŋ dɛn we dɛn go na Listra, Dabi, ɛn dɛn tɔŋ we de klos de. 7Dɛn bin de tɛl pipul di Gud Nyuz wɛn dɛn de na dɛn tɔŋ ya.

Wɛn di Apɔsul dɛn de na Listra ɛn Dabi

8Wan man bin de na Listra we nɔ bin ebul waka. In fut dɛn bin day frɔm we in mama bɔn am. 9I bin sidɔm de lisin we Pɔl de tɔk. Pɔl bin no se di man biliv se Gɔd go mek i wɛl, so i luk di man pim, 10ɛn i tɔk lawd wan se, “Tinap tret wan!” Di man grap ɛn bigin waka ɔlɔbɔt. 11Wɛn di pipul dɛn si wetin bi, dɛn bigin ala na di Laykao nia laŋwej se, “Dɛn gɔd dɔn tɔn to mɔtalman ɛn dɛn dɔn kam to wi!” 12Dɛn kɔl Banabas “Zus” ɛn dɛn kɔl Pɔl “Amis” bikɔs na Pɔl bin de tɔk. 13Di man we de mek sakrifays to da gɔd we nem Zus kɛr kaw ɛn flawa go na di get. In ɛn di pipul dɛn bin want mek sakrifays. Di ples we pipul dɛn bin de pre to Zus bin de klos di get na di tɔŋ.

14Wɛn Banabas ɛn Pɔl yɛri se di pipul dɛn want mek sakrifays, dɛn chɛr di klos we dɛn bin wɛr pantap. (Na so dɛn Ju pipul kin du fɔ sho se dɛn nɔ gri wit wetin de bi.) Dɛn rɔn go na di ples we di pipul dɛn we bin de pre to Zus bin gɛda. Dɛn ala tɛl di pipul dɛn se, 15“Wi pipul dɛn, wetin mek una de du dɛn tin ya? Wi na mɔtalman lɛkɛ unasɛf! Wi kam na ya fɔ tɛl una di Gud Nyuz fɔ mek una lɛf fɔ du dɛn tin ya we go mek una day, ɛn kam to Gɔd we gɛt layf sote go. Na Gɔd mek dis wɔl, di klawd, di wata, ɛn ɔltin we de na di wɔl. 16Fɔs tɛm Gɔd bin de lɛf pipul to dɛnsɛf. 17Bɔt stil i bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.” 18Pan ɔl we di apɔsul dɛn tɛl di pipul dɛn, dɛn wɔd ya, i bin traŋa fɔ mek dɛn tap dɛn, mek dɛn nɔ mek di sakrifays.

19Sɔm pan di Ju pipul dɛn bin kɔmɔt Antiɔk ɛn sɔm bin kɔmɔt Aykonyɔm. Dɛn tɔk sote di pipul dɛn gri fɔ du wetin dɛn want. Dɛn ston Pɔl ɛn drɛg am kɔmɔt na di tɔŋ bikɔs dɛn bin min se i dɔn day. 20Bɔt wɛn dɛn pipul we bin biliv pan Jizɔs go mit am, i grap, dɛn i go bak na di tɔŋ. Di ɔda de Pɔl ɛn Banabas go Dabi.

Dɛn Tɔn Bak Go Antiɔk we de na Siria

21Pɔl ɛn Banabas tɛl di pipul dɛn na Dabi di Gud Nyuz ɛn dɛn mek plɛnti pipul biliv pan Jizɔs. Dɛn kɔmɔt Dabi go Listra, dɛn go Aykonyɔm, dɔn dɛn go Antiɔk we de na Pisidia. 22Pɔl ɛn Banabas kɔrej di pipul dɛn we bin biliv pan Jizɔs ɛn dɛn tɛl dɛn mek dɛn biliv pan Jizɔs mɔ ɛn mɔ. Pɔl ɛn Banabas tɛl di pipul dɛn se, “Ɔlman we biliv pan Jizɔs gɛt fɔ sɔfa plɛnti na dis wɔl fɔ mek dɛn go de ɔnda Gɔd in rul.” 23Wɛn dɛn dɔn fas ɛn pre to Gɔd, dɛn pik sɔm bigman dɛn na ɔl dɛn chɔch fɔ du di wok, dɛn lɛf dɛn na di Masta, we dɛn biliv, in an.

24Wɛn dɛn dɔn waka ɔlsay na Pisidia, dɛn go Pamfilya. 25Dɛn tɛl di pipul dɛn na Paga di Gud Nyuz, dɔn dɛn go Ata lia. 26Dɛn kɔmɔt Ata lia, dɛn tek big bot go Antiɔk, na da tɔŋ de, di pipul dɛn put Pɔl ɛn Banabas na Gɔd an mek i ɛp dɛn fɔ du di wok we i gi dɛn fɔ du, we dɛn bin de du.

27Wɛn dɛn rich Antiɔk, dɛn gɛda ɔl di pipul dɛn we bin biliv pan Jizɔs ɛn tɛl dɛn ɔl wetin Gɔd mek dɛn du ɛn aw Gɔd mek dɛn pipul we nɔto Ju biliv pan Jizɔs. 28Pɔl ɛn Banabas bin de lɔŋ wit dɛn pipul we bin biliv pan Jizɔs.

Currently Selected:

Apɔsul Dɛn Wok 14: KRIO13

Highlight

Compare

Copy