Sɛfanaya 2
2
Mɔgɛnu Kawandi-Koe Nɛbi Sɛfanaya Bolo Anu Tubi-Koela Ko La
1-2Wole Yuda kun-takolɔnnu! Yanni wo kufan-kufan ni ta iko fɔnyɔ wa kɔrɔ-fɔrɔn bi, wo ni wo hɛnkili masɔ. Yanni Marita diminyɛ ni na wo kan ma, wo ni wo hɛnkili masɔ. Yanni a fonde ni bɔ wo kuma ka wo halaki, wo ni wo hɛnkili masɔ. Wo ni wo miri wo kɛ-nya-kɔrɛnu ma ka tubi wo hakɛnu ma. 3Wole min bɛɛ famayiginɛ nyamanɛ kɛ rɔ ka Marita tɔnnu bira, wo na Mari ma. Wo ni ko-latelennɛnu kɛ ka wo famayigi Mari ye. Tumado, Mari si kinikini wo ma ala kiti-tɛgɛ-lunyɛ rɔ.
Isirɛlala Foolɛ-Mɔgɛnu Kiti-Koe
4 #
Aiseya 14.29-31; Yɛrɛmaya 47.1-7; Isikiyɛli 25.15-17; Yowɛli 3.4-8; Emɔsi 1.6-8; Sakaraya 9.5-7 Mɔgɔ-wo-mɔgɔ ti to Kesa soe burɔ Filisiti nyamanɛ rɔ. Anuna soe, Asikalɔn fanan si ma tonbɔn la. Yanni tele-latelen-wati, Asadadi so-burɔ-mɔgɛnu si soe wo rakolonya. Anu yogenu si Ɛkirɔn so-burɔ-mɔgɛnu wurun burutu! 5Wole Filisiti mɔgɛ minnu siginɛ kɔgɔ-yi dafɛ, wo ara ban donna saya-kiti kɔrɔ. Mari ara ban wo latɛgɛla feu! A ko a si wo kasara, hali mɔgɔ-den-kelen ti to a niyi la. 6Wola nyamanɛ min bi kɔgɔ-yi dafɛ, wo si ma sagɛ de-nyini-tinɛ la saga-wɔrɛnu siya kan min. 7Yuda nyamanita-mɔgɛ toe minnu bi tola, wonu si sigi wole, Filisitinuna nyamanɛ wo rɔ. Wonu si to anuna sagɛnu fɛ-birala nyɔ ka to kila wola bɔnnu na Asikalɔn soe burɔ. Anuta Mari Alla si to anu fɛ alako anu bara-koe ni to tala yarɔ.
8 #
Aiseya 15.1–16.14; 25.10-12; Yɛrɛmaya 48.1–49.6; Isikiyɛli 21.28-32; 25.1-11; Emɔsi 1.13-15 Mohabunu anubɛ Amonnu bi Mari Sɛnbɛ-Bɛɛ-Tigita mɔgɛnu mayɛlan min kɛla, a ko a ara wo lamɔɛn. A ko anu bi anu nyɛrɛ matɔgɔla ko anu si ala mɔgɛnuna dugi bi anu bolo. 9#Ko-Dabirɛnu 19.24 Isirɛlata Mari Sɛnbɛ-Bɛɛ-Tigi ya a keli ko a si Mohabunu anubɛ Amonnu kasara iko a ya Sɔdɔm kɛnu anubɛ Kɔmɔra kɛnu kasara nya min. A ko a si a ma, dɔn-fen ti ma-a-la anuna nyamanɛ wo rɔ muk, fɔ wɔnɛ anubɛ kɔgɛ gbansan! A ko ata mɔgɛ minnu bi tola anu niyi la, wonu si ta bui Mohabunu anubɛ Amonnu ma ka anu bolo-fannu anubɛ anuna nyamanɛ bi anu bolo.
10Mohabunu anubɛ Amonnu bi tɔrɔyala wo nya na le ka a tɛgɛ Mari Sɛnbɛ-Bɛɛ-Tigita mɔgɛnuna fɛyɛ ma anu bolo anubɛ anuna wasinteyɛ. 11Mari si a ma, anu ni kilan dɔgɔma-ma-de! A si a ma, duninya-mɔgɛnuna bɛsɛnu bara-koe ni to dɔgɔyala ha fenfen ti to tun. Wo kɔma, duninya sibole bɛɛ si ale bato tun anuna nyamanɛnu tɔ.
12 #
Aiseya 18.1-7
Mari si a ma, Sudan kɛnu yogenu ni anu halaki.
13 #
Aiseya 10.5-34; 14.24-27; Nehami 1.1–3.19 Mari ko a si Asiriyanu kasara ka anuna Ninɛfa so-karantan ma tonbɔn la iko yi sa wula-da-rakolɔn min tɔ. 14A so-tɛma-sogo wo, a bintɔ-sogo wo, nyɔ si ma anu sa-tinɛ la. Bon-kore wonu si ma gbingbinnyagannu sa-tinɛ la. Wonu kuman-kan si to bɔla wundan-korenu na. Mansa-wala-konanu si to kumala bonda-da-korenu na. Fɛrɛn-hakikɛ minnu bi anuna dandan ma, anu yogenu si to wonu madununa. 15Minnu bi Ninɛfa soe burɔ, wonu wasinɛ dɔgɔma-ma-de! Anu mirinɛ ko laa-wo-laa sa anu na. Anu kɛnɛna a fɔla ko, “Mala soe kɛ makawara ka tenbi soe dama la.” Kɔnɔ tɔ-a-la, nyɔ si ma tonbon-bɛrɛbɛrɛ la. Fɔ sogenu dɔrɔn, wonu denu si taran nyɔ. Mɔgɔ-wo-mɔgɔ wa tenbi nyɔ, a si nyima a rɔ, wo kɔma, a si a bole sa a dɛ la ka a dɛ bosi a kɔrɔ.
Kuranko Common Language Bible © The Bible Society in Sierra Leone, 2006.