Sakaraya 2
2
Ko-Rayirɛ Sawa Nyɔgɛ
Fen-Suman-Fan-Tigi Yen-Koe
1Ko-rayirɛ do fanan tɔ, n ya kei do fanan yen tun fen-suman-fan ye a bolo tɔ. 2N ya a manyinika, n ko, “Ile ye tala mintɔ kɛ la?”
A ko, “N bi tala Yerusalɛm sumanna ka a kɔnɛ anubɛ a lɔngbɔn lɔn.”
3Wo kɔma, mabɛ melika min bi ko-rayirɛ kɛ kɔrɛ yirala n na, wo bɔra n dafɛ. Melika-gbɛrɛ nara wo taran. 4Min namatoe, wo ya a fɔ doi wo ye ko, “I buri tala a fɔla fen-sumannɛ wo ye ko tarɛ ti ke minina Yerusalɛm soe ma tun bawo a la si fa mɔgɛnu anubɛ kolo-fannu na penpen! 5I ni a fɔ a ye fanan ko Mari nyɛrɛ ko ale si ma ta-belebele la soe wola foolɛ rɔ iko tarɛ, alako a ni a kandan. A ko ale nyɛrɛ anubɛ ata wan-takɛ si a mayigi nyɔ.”
Minnu bi Biralɛ rɔ Nun, Wonu Kele-Koe
6-7Wo kɔma, nde, Sakaraya ya Mari kuman-kan latenbi ala mɔgɛnu ma ko, “Mari ko a ara wo ranyɛnsɛn duninya-tonko-nanɛ bɛɛ rɔ kɔnɔ wo ni wo buri bɔla Babilɔn nyamanɛ rɔ ka sɛgi Yerusalɛm soe burɔ. 8Mɔgɔ-wo-mɔgɔ ya wole gbesi, a ara fan gbesi min di ale Mari ye iko a yɛ.”
Mari Sɛnbɛ-Bɛɛ-Tigi ya sarakanɛ kɛ don n bolo sibolo-gbɛrɛnuna ko la minnu ya ala mɔgɛnu bira. 9A ko ale nyɛrɛ-nyɛrɛ si wonu kɛlɛ. A ko minnu bi yɔɔnyɛ la anu kɔrɔ nun, wonu si anu denu fanan bira. N kan kɛnu ba bɔ a la tumɛ min, bɛɛ si a lɔn worɔ ko ale Mari Sɛnbɛ-Bɛɛ-Tigi le ya nde, Sakaraya sɔ.
10Mari ya a fɔ tun ko wole Yerusalɛm kɛnu ni sigi sa sewɛ bolo. A ko ale si na a mayigi wo tɛma.
11Wo wati wa ke, sibolo-gbɛrɛ mɔgɔ-siyaman si yɛlɛma ka na ale Mari ma. Ale si a mayigi wo tɛma. Wo ye a lɔnna wo le ma ko ale Mari Sɛnbɛ-Bɛɛ-Tigi ya n kilaya wo ma. 12Mari si Yuda ma a halalɛ la tun ata dugu-sɛnimɛ rɔ. Yerusalɛm soe si diya a ye ka tenbi soe bɛɛ la.
13Bɛɛ ni a rade Mari yala bawo a ye bɔla ata kan-tina-sɛnimɛ rɔ ka na.
Kuranko Common Language Bible © The Bible Society in Sierra Leone, 2006.