Yilan-Yilan Koe 21
21
Kenan Soe Donu Kasara-Koe Isirɛla Mɔgɛnu Bolo
1 #
Yilan-Yilan Koe 33.40
Mansɛ min bi Kenan nyamanɛ dugula wara la Aradi soe burɔ, wo ya a lamɔɛn ko Isirɛla mɔgɛnu bi nala anu magbenna. Anu bi Atarim kilɛ la tumɛ min, Aradi mɔgɛnu tara anu kɛlɛ tinɛ ka donu bira. 2Isirɛla mɔgɛnu ya anu dakan don Mari ye ko, “Ni i ya a ma, ma ni mɔgɛ kɛnu nɔ, ma si anu di i ma fasai! Ma ti fenfen namara ma nyɛrɛ ye. Ma si mɔgɛ anubɛ anuna soenu di i ma ka anu dama halaki nya-kun-kelen.” 3Mari ya anuna madiyali-kɛ-kan lamɔɛn. A ya anu dɛnbɛ ka Kenan mɔgɛnu nɔ. Anu ya mɔgɛ bɛɛsi faga ka soe wo damasi kasara. Woletɔ anu ya soe wonu tɔgɔ sa “Kasara Tinɛ.”
Isirɛla Mɔgɛnu Kin-Koe Duguma-Fannu Bolo
4 #
Tɔn-Fɔɛ-Fila-Nyɔgɛ 2.1
Idɔm mɔgɛnu ma sɔn ko Isirɛla mɔgɛnu ni tenbi anuna nyamanɛ rɔ min kɛ, Isirɛla mɔgɛnu bɔra Hɔ kɔnkɛ kɔrɔ ka anu ya-lamunun Kɔgɔ-Yi-Wulen bolɔn do la ka Idɔm nyamanɛ wo lafoo. Kɔnɔ anu ma sɔn anu muinna. Anu tamatoe gbɛ, 5#1 Kɔrɛnti 10.9 anu donta gbunya-kuma-fɔɛ rɔ Musa anubɛ Mari ma ko, “Nfen ya a to, wole nara male la ka bɔ Iyipiti nyamanɛ rɔ ka na ma la wula-da-rakolɔn kɛ rɔ yan. Dɔnta anubɛ min-kɛ-yi sa yan fɔ Allata biredi kɛ, ma si to min dɔnna tuma-wo-tuma, fen-fufafuyi kɛ!”
6Woletɔ Mari ya duguma-fen-yogomɛnu nata anu tɛma. Wonu ya mɔgɔ-siyaman kin ka anu faga. 7Mɔgɛnu nara di Musa dala. Anu ko, “Ma ara hakɛ kɛ wobɛ Mari la. I ni Mari madiya ko a ni sagan-fan kɛnu bɔ ma tɛma.” Musa ya madiyali kɛ anu ye.
8Mari ya a fɔ Musa ye ko, “Silɛɛ do bi. I ni a ladan iko duguma-fan ka a sa kɔlɔma ma ka a layɛlɛ san ma. Ni sagan-fan ya mɔgɛ min kin, wo tigi ni a yɛ sɔ duguma-fan wola muninyɛ la. A si beli.” 9#2 Mansɛnu 18.4; Yɔni 3.14 Musa fanan ya silɛɛ ladan iko duguma-fan. A ya a layɛlɛ san ma kɔlɔma la. Ni sagan-fan ya mɔgɛ min kin, wo tigi wa a yɛ layɛlɛ san ma ka duguma-fanla muninyɛ wo mafɛlɛn, wo tigi si beli.
Isirɛla Mɔgɛnu Yilan-Yilan-Koe
10Isirɛla mɔgɛnu tagamanta anu bolo-maran wara la Idɔm kan-kɔma-kilɛ la ka ta anu daga makɛ Obati soe dafɛ. 11Anu ya nyɔ boloka tumɛ min, anu tara anu daga makɛ Abarim tonbon-kole ma min bi Mohabu nyamanɛ tele-yigi wara la. 12Anu bɔra nyɔ ka ta anu daga makɛ Sarɛdi ba lɛɛ rɔ. 13Anu bɔra nyɔ tun ka ta anu daga makɛ Anɔn bɛ tɔgɔfɛ. Anu bi Amora mɔgɛnuna wulɛ rɔ. Bɛ kɛ le Amora mɔgɛnu anubɛ Mohabu mɔgɛnu dan la. 14-15Wo le ya a ma, Marita Kɛlɛ-Buku kumara kan tinɛ kɛnuna ko la ko,
“…Wahabu soe min bi ba-kɔnkɔn la Sufa nyamanɛ rɔ yan anubɛ Anɔn bɛ
anubɛ kɔnkɔ-gbɛran min bi yɛlɛla Ari soe magbenna.
Kan tinɛ kɛnu bi Mohabu nyamanɛ-dan la.”
16Wo kɔma, anu bɔra nyɔ ka ta ke “Kɔlɔn” wo ma, Mari ya a fɔ Musa ye kan min ko, “Mɔgɛ bɛɛsi kele anu nyɔgɔn fɛ. N si yi di anu ma.” 17-18Isirɛla mɔgɛnu ya bɛti kɛ bɔ wati wo le ko,
“Ile kɔlɔn kɛ, yi-diyamɛ ni taran i rɔ.
Ma si yi kɛ kɔndɔn bɛti la.
Mansɛla dannu denu ya i sin.
Mala kun-tiginu ya i rabɔ.
Ile sinta mansɛla sɛnɛ-kɔlɔma la.
I sinta habadan-mansɛ bolo.”
Anu bɔra wulɛ wo rɔ ka ta kan tinɛ do min tɔgɛ Matana. 19Anu bɔra nyɔ ka ta Allata yi-dɔgɔmɛ dafɛ (Neheliyɛli). Anu bɔra nyɔ ka ta kan-tina-layan-bɛ do rɔ (Bamɔti). 20Anu bɔra nyɔ ka ta Mohabu lɛɛ rɔ min bi Pisiga kɔnkɔ-layan-bɛ kɔrɔ, anu si wulɛ wo damasi ragbɛ kan min.
Kaliyadi Mɔgɛnu Kɛlɛ-Koe
(Tɔn-Fɔɛ-Fila-Nyɔgɛ 2.26–3.11)
21Isirɛla mɔgɛnu ya kilayɛ lata Amora mansɛ Saihɔn ma ko, 22“Ni i si sɔn ma ni tenbi ila nyamanɛ rɔ, mabɛ mala kolo-fannu, ma ti kila-wɛ madasa mumɛ! Ma ti ke wola sɛnɛnu ma. Ma ti ta wola ki-fannu tɔ. Ma ti yi bi wola kɔlɔnnu tɔ. Ma ye tagamana kila-kolo-wɛ le fɛ tun.” 23Kɔnɔ Mansa Saihɔn ma sɔn Isirɛla mɔgɛnu ni tenbi ala nyamanɛ rɔ. A ya ala kɛlɛ-dannu kele ka ta Isirɛla mɔgɛnu magbenna wulɛ rɔ. Anubɛ Isirɛla mɔgɛnu bɛnta Yehasi soe dafɛ.
26(Mansɛ Saihɔn kɛ le ya Mohabu mɔgɛnu nɔ fɔlɔ nun ka anuna nyamanɛ do bi anu bolo ha ka ke Anɔn bɛ ma. 27Woletɔ Amoranuna sigi-salɛnu bi anuna Mansɛ Saihɔn matɔgɔla bawo a ya Hɛsibɔn soe bi Mohabu kɛnu bolo. Anu bi sigi sala ko,
“Wo ni na Mansɛ Saihɔnta so-belebele Hɛsibɔn kɛ sɔ a gbɛ rɔ kaka.
28 #
Yɛrɛmaya 48.45-46
Ala kɛlɛ-dannu bɔra Hɛsibɔn iko tɛ
ka Ari soe kasara Mohabu nyamanɛ rɔ.
Anu ya kɔnkɔrɔ-mɔgɛnu damasi faga
minnu bi Anɔn ba-kunyɛ wara la.
29A ara gbɛlɛya wole Mohabu mɔgɛnu kuma gben!
Wole min bi wota bɛsɛ Kimasi kɔla,
wole damasi la ara to dogbe!
Kei minnu bi ile Kimasi batola, wonu bara anu buri.
Musi minnu bi i batola,
wonu bara bira Mansa Saihɔn ye.
30Ka a bi Hɛsibɔn ma ha ka ke Dibon soe ma,
ila mɔgɛ wo bɛɛ ara halaki pɔ
ka a bi Nasima soe ma ha ka ke Nofa soe ma
min gbɛrɛnnɛ Midaba soe ma.”)
24Kɔnɔ hali Amora kɛlɛ-dannu nara fanka la anu kan ma, Isirɛla mɔgɛnu ya mansɛ anubɛ ata mɔgɛnu nɔ. Isirɛla mɔgɛnu ya anuna nyamanɛ bi ka bɔ Anɔn bɛ ma ha ka ke Yabɔki bɛ ma ha tele-bɔɛ ma Amon mɔgɛnu bi kan min. Anu ma ke donna Amonnuna nyamanɛ rɔ bawo wonuna dan fɛ-biranɛ anu bolo gben!#21.24 Fasi filɛ kɛnu sigira fasi 30 kɔma ka a tɛgɛ anu kɛ-tumɛ le ma. 25 Isirɛla mɔgɛnu ya Amoranuna soenu bira-a-la ka anu sigi soe kɛnu tɔ, hali Mansa Saihɔnta soe Hɛsibɔn fanan anubɛ a dafɛ-so-mɛsɛnu.
32Musa ya ko-lakɔrɔsilɛ donu nata Yasa soe mafɛlɛn tinɛ ka a lɔn anu si mɔgɛ wonu kɛlɛ nya min. Isirɛla mɔgɛnu tara ka Yasa kɛnu gben ka anuna soe wonu bi anu bolo.
33Isirɛla mɔgɛnu ya anu ya-lamunun Basan nyamanɛ la. Basan Mansa Ɔku anubɛ ata kɛlɛ-dannu wulita ka na Isirɛla mɔgɛnu taran Ɛdiriya soe dala.
34Kɔnɔ Mari ya a fɔ Musa ye ko, “Wo kana kilan anu na. N bara ban fanka dila wo ma mɔgɛ kɛnu kuma. Wo ni a ma Mansa Ɔku la iko wo ya a ma Mansa Saihɔn la nya min.” 35Woletɔ Isirɛla mɔgɛnu wulita anu kɛlɛla. Anu ya Mansa Ɔku anubɛ a kebilɛ faga. Anu ma mɔgɔ-wo-mɔgɔ kɛndɛ to a niyi la. Anu ya anu bɛɛsi faga tɛrr! Wo kɔma, anu sigira nyɔ le Mansa Ɔkuta nyamanɛ rɔ.
Currently Selected:
Yilan-Yilan Koe 21: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
