Yilan-Yilan Koe 2
2
Isirɛla Bɔnsɔnta Sigi-Tina-Koe Marita Fani-Bɔnla Minɛ Rɔ
1Mari ya a fɔ Musa anubɛ Aruna ye tun ko, 2“Isirɛla mɔgɛ bɛɛ ni anuta sigi tinɛ sɔrɔn nta Fani-Bɔnla minɛ rɔ. Anu kana gbɛrɛn nta bɔn ma bɛrɛkɛ! Bɔnsɔn bɛɛ anubɛ kebila kelen-kelennamɛ-bɛɛ ni ata tamasere#2.2 Tamasere: Tumado tamasere wo manɛ le iko kɔlɔma, mɔgɔ si kura-kundi kiri min na ka a layɛlɛ san ma. Donutɛ manɛ le iko falafalɛ, donutɛ manɛ le iko nɛgɛ-walan. Anu si wo layɛlɛ san ma kɔnɔ bɔnsɔn tan-ni-fila bɛɛta anubɛ kebilɛ bɛɛta tamasere faranɛ anu nyɔgɔn na. sɔrɔn.
3-9“Nta Fani-bɔn tele-bɔɛ wara la, bɔnsɔn fila minnu bi nyɔ, wonu bi Yuda kɔrɔ. Yuda bɔnsɔn ya wonu dafa bɔnsɔn sawa ma. Minnu ya anuna fani-bɔnnu sɔ nyɔ wara la, wo le Yuda bɔnsɔn anubɛ a kebilɛnu na. Anuna bɔnsɔn-kun-tigi le Aminadabula dan Neson na. Yuda bɔnsɔn yatɛ bɛnta mɔgɔ waga bi-wɔrɔnfila, mɔgɔ waga nani ani mɔgɔ kɛmɛ wɔrɔ (74,600) ma.
“Min sigira Yuda bɔnsɔn dafɛ, wo le Isakari bɔnsɔn anubɛ a kebilɛnu na. Anuna bɔnsɔn-kun-tigi le Suwala dan Natanɛli la. Isakari yatɛ bɛnta mɔgɔ waga bi-loli, mɔgɔ waga nani ani mɔgɔ kɛmɛ nani (54,400) ma.
“Min tugunnɛ Isakari bɔnsɔn la, wo le Sɛbulɔn bɔnsɔn anubɛ a kebilɛnu na. Anuna bɔnsɔn-kun-tigi le Hilɔnla dan Ɛliyabu la. Sɛbulɔn bɔnsɔn yatɛ bɛnta mɔgɔ waga bi-loli, mɔgɔ waga wɔrɔnfila ani mɔgɔ kɛmɛ nani (57,400) ma. Yuda bɔnsɔn anubɛ Isakari bɔnsɔn anubɛ Sɛbulɔn bɔnsɔn, wo mɔgɛ dama lakofunɛ bɛnta mɔgɔ waga kɛmɛ kelen, mɔgɔ waga bi-segin, mɔgɔ waga wɔrɔ ani mɔgɔ kɛmɛ nani (186,400) ma. Ni anu bi tala tagama rɔ tumɛ min, bɔnsɔn sawɛ kɛnu si ta Isirɛla mɔgɛ bɛɛ yarɔ.”
10-16Mari ko, “Nna bɔn dugula wara la, bɔnsɔn filɛ minnu bi nyɔ, wonu bi Rubɛn bɔnsɔn kɔrɔ. Rubɛn bɔnsɔn ya wonu dafa bɔnsɔn sawa ma. Bɔnsɔn sawɛ wonu nakofunɛ, wo le kɛnu na, Rubɛn bɔnsɔn anubɛ a kebilɛnu. Anuna kun-tigi le Sɛdiyala dan Ɛlisa la. Rubɛn bɔnsɔn yatɛ bɛnta mɔgɔ waga bi-nani, mɔgɔ waga wɔrɔ ani mɔgɔ kɛmɛ loli (46,500) ma.
“Min tugunnɛ Rubɛn bɔnsɔn la, wo le Simiyɔn bɔnsɔn anubɛ a kebilɛnu na. Anuna kun-tigi le Suri-Sadaila dan Sɛlumiyɛli la. Simiyɔn bɔnsɔn yatɛ bɛnta mɔgɔ waga bi-loli, mɔgɔ waga kɔnɔntɔ ani mɔgɔ kɛmɛ sawa (59,300) ma.
“Min tugunnɛ Simiyɔn bɔnsɔn la, wo le Kadi bɔnsɔn anubɛ a kebilɛnu na. Anuna kun-tigi le Duwɛlila dan Iliyasafu la. Kadi bɔnsɔn yatɛ bɛnta mɔgɔ waga bi-nani, mɔgɔ waga loli, mɔgɔ kɛmɛ wɔrɔ ani mɔgɔ bi-loli (45,650) ma.
“Bɔnsɔn sawa kɛnu nakofunɛ, wo le bɛnta mɔgɔ waga kɛmɛ kelen, mɔgɔ waga bi-loli, mɔgɔ waga kelen, mɔgɔ kɛmɛ nani, ani mɔgɔ bi-loli (151,450) ma. Anu tenbi tala tagama rɔ tumɛ min, bɔnsɔn sawɛ kɛnu fanan si bila Yuda fɛ.
17“Bɔnsɔn wɔrɛ wo, kurun filɛ wonu ba ta tumɛ min, Lifayi mɔgɛnu fanan ni bila anu fɛ anubɛ Marita mirannu. Anu ni bila anu nyɔgɔn fɛ iko anu siginɛ nta Bɔnla minɛ rɔ nya min.”
18-24“Nde, Marita bɔn tele-yigi wara la, bɔnsɔn filɛ minnu bi nyɔ, wonu bi Ifɛrɛm bɔnsɔn kɔrɔ. Ifɛrɛm bɔnsɔn ya wonu dafa bɔnsɔn sawa ma. Bɔnsɔn sawɛ wonu nakofunɛ, wo le Ifɛrɛm bɔnsɔn anubɛ a kebilɛnu na. Anuna kun-tigi le Amihudila dan Ilasama la. Ifɛrɛm bɔnsɔn yatɛ bɛnta mɔgɔ waga bi-nani ani mɔgɔ kɛmɛ loli (40,500) ma.
“Min tugunnɛ Ifɛrɛm bɔnsɔn la, wo le Manasa bɔnsɔn anubɛ a kebilɛnu na. Anuna kun-tigi le Pɛdasala dan Kamɛliya la. Manasa bɔnsɔn yatɛ bɛnta mɔgɔ waga bi-sawa, mɔgɔ waga fila ani mɔgɔ kɛmɛ fila (32,200) ma.
“Min tugunnɛ Manasa bɔnsɔn la, wo le Bɛnyamɛ bɔnsɔn anubɛ a kebilɛnu na. Anuna kun-tigi le Kidiyɔnila dan Abidan la. Bɛnyamɛ bɔnsɔn yatɛ bɛnta mɔgɔ waga bi-sawa, mɔgɔ waga loli ani mɔgɔ kɛmɛ nani (35,400) ma. Bɔnsɔn sawɛ kɛnu nakofunɛ, wo le bɛnta mɔgɔ waga kɛmɛ kelen, mɔgɔ waga segin ani mɔgɔ kɛmɛ kelen (108,100) ma. Anu tenbi tala tagama rɔ tumɛ min, wonu si bila Lifayi mɔgɛnu fɛ.”
25-31Mari ko, “Nta bɔn kantɔ-wara la, bɔnsɔn filɛ minnu bi nyɔ, wonu bi Dan bɔnsɔn kɔrɔ. Dan bɔnsɔn wo le ya anu dafa bɔnsɔn sawa ma. Bɔnsɔn sawɛ wonu nakofunɛ, wo le Dan bɔnsɔn anubɛ a kebilɛnu na. Anuna kun-tigi le Amisadaila dan Ehayisa la. Dan bɔnsɔn yatɛ bɛnta mɔgɔ waga bi-wɔrɔ, mɔgɔ waga fila ani mɔgɔ kɛmɛ wɔrɔnfila (62,700) ma.
“Min tugunnɛ Dan bɔnsɔn la, wo le Asɛra bɔnsɔn anubɛ a kebilɛnu na. Anuna kun-tigi le Akaranla dan Pegiyɛli la. Asɛra bɔnsɔn yatɛ bɛnta mɔgɔ waga bi-nani, mɔgɔ waga kelen ani mɔgɔ kɛmɛ loli (41,500) ma.
“Min tugunnɛ Asɛra bɔnsɔn la, wo le Nafatali bɔnsɔn anubɛ a kebilɛnu na. Anuna kun-tigi le Inala dan Ahaira la. Nafatali bɔnsɔn bɛnta mɔgɔ waga bi-loli, mɔgɔ waga sawa ani mɔgɔ kɛmɛ nani (53,400) ma. Bɔnsɔn sawɛ kɛnu nakofunɛ, wo le bɛnta mɔgɔ waga kɛmɛ kelen, mɔgɔ waga bi-loli, mɔgɔ waga wɔrɔnfila ani mɔgɔ kɛmɛ wɔrɔ (157,600) ma. Anu tenbi tala tagama rɔ tumɛ min, anu si bila Dan bɔnsɔn fɛ.”
32Isirɛla bɔnsɔn anubɛ anuna kebilɛ bɛɛ lakofunɛ bɛnta mɔgɔ waga kɛmɛ wɔrɔ, mɔgɔ waga sawa, mɔgɔ kɛmɛ loli ani mɔgɔ bi-loli (603,550) ma. 33Lifayi mɔgɛnu ma dan Isirɛla bɔnsɔn kɛnu tɛma iko Mari ya a fɔ Musa ye nya min.
34Isirɛla mɔgɛnu ya wo koe bɛɛ ma iko Mari ya a fɔ Musa ye nya min. Anu bɛɛ ya anuta sigi tinɛ sɔrɔn ka tagama iko Mari ya a fɔ Musa ye nya min.
Currently Selected:
Yilan-Yilan Koe 2: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.