Yilan-Yilan Koe 10

Wodi-Gbɛ Burinu

1Mari ya a fɔ Musa ye ko, 2“I ni wodi-gbɛ gbesi a kin na ka a ma buru fila la ka wonu ma nyama-kele-fan la anubɛ ka dagɛ raka. 3I wa ban buri wonu nadanna tumɛ min, i ni anu don Arunala den-keinu bolo. Ni a sɔgɛ ye i la ka Isirɛla mɔgɛ bɛɛ ladɛn nta Fani-Bɔn don-dɛ la, anu si buru filɛ wonu fɛ anu nyɔgɔn fɛ. 4Ni a sɔgɛ ye i la ka kun-tigi wonu nadɛn, anu ni buru kelen de dɔrɔn fɛ. 5Anu ba wuli tala tagama rɔ, buri fɔlɔtɛ min bi fɛla, bɔnsɔn sawɛ minnu bi tele-bɔɛ wara la, wonu si wuli ka ta. 6Buru-fɛ fila nyɔgɛ, bɔnsɔn sawɛ minnu bi dugula wara la, wonu fanan si anu nasɔ ka ta. Anu si ban natala ka le ha anu si nyɔ rakolonya. 7Ni anu ya a fɛ lata-a-rɔ dɔgɔdɔgɔ, anu na si dɛn. Ni anu ya fɛ tɛgɛ-a-rɔ, anu si anuna tagama dabira. 8Arunala den-keinu si to wɔlɛ wo kɛla.

“N bi nala min fɔla i ye, wo si ma namunyɛ la wobɛ Isirɛla mɔgɛnu ye tɛban! 9Ni wo yogenu nara wo taran wola nyamanɛ rɔ, Aruna anubɛ ala dannu si buri wonu fɛ. Nde, Mari Alla si n miri wo ma ka wo kisi.

10“Karɛ-wo-karɛ a tele fɔlɛ, anu ni Karɛ-Kurɛ-Ladɛn-burinu fɛ ka ladiyɛ kɛ. Anu tenbi saraka-mintantɛnu bɔla wati-wo-wati anubɛ yisi-kima-sarakɛnu, anu si buri wonu fɛ. Anu ya ladiyɛ kɛ tuma-wo-tuma, anu ni buri wonu fɛ. Nde, Mari wa a fɛ-kan lamɔɛn tumɛ min, buri wonu kan si n hɛnkili labila wo lanyiri ko. Nde le wota Mari Alla la min ti wo boloka.”#10.10 Fasi 29-32 ye fasi 10 anubɛ 11 tɛma.

Hobabu Madiya-Koe Ta-Koe la Anu fɛ Musa Bolo

29Kɔnɔ yanni anu ni wuli ka bɔ Sinayi wulɛ rɔ, Musa ya a fɔ ala musi, wo kɔrɔ-keminɛ Hobabu ye ko, “A ara to doni ma ni ta kan tinɛ wo rɔ Mari ya min di ma ma. Mari ya lanyiri kiri ma ye ko ma si nɔnfuli siyaman sɔrɔn nyɔ. Ni ile nara kofu ma ma, ma si a ma, ile fanan ni do sɔrɔn.” 30Yɛtirola dan Hobabu ya a fɔ Musa ye ko, “N ma la a la ni n si bila wo fɛ, fɔ n ba sɛgi tun n barɛ.” 31Musa ya a madiya ko, “I yandi, i kana ma boloka. I ya nyamanɛ kɛ ralɔn ka tenbi nde la. I si ke ka kilɛ yira ma la ma si bila min fɛ ka ta. 32Ni ile sɔnta ka bila male fɛ,#10.32 Bila ma fɛ: Ado nfan, a bilara anu fɛ doni. Bɔ-Koe-Iyipiti Sura 18 mafɛlɛn. Mari ye duwɛ min bɛɛ yigila ma kuma, ma si a ma, ile fanan ni wo do sɔrɔn.”

Isirɛla Mɔgɛnu Nyɛnsɛn-Koe ka Bɔ Dagɛ Rɔ

11Isirɛla mɔgɛnu bɔɛ Iyipiti, wo ara san kelen karɛ kelen bɔ ani tele mogan kɔnɔ anu ya karɛ tan-ni-kelen bɔ Sinayi wulɛ rɔ. 12Wo tele nyɛrɛ rɔ, Allata banda-fin-gbɛ wulita Sinayi wulɛ rɔ ka ta Paran wula-da-rakolɔn rɔ. 13Anuna tagama dabira fɔlɔtɛ le kɛ la iko Mari ya a fɔ nya min. 14Anu tara ka le. Yuda bɔnsɔn fɔlɔn sɔra yarɔ anuta tamasere wo kɔrɔ. Aminadabula dan Neson wo le kun-tigi la Yuda bɔnsɔn kun na. 15Isakari bɔnsɔn tugunnɛ wonu na. Suwala dan Natanɛli, wo le kun-tigi la Isakari bɔnsɔn kun na. 16Sɛbulɔn bɔnsɔn tugunnɛ Isakari bɔnsɔn la. Hilɔnla dan Ɛliyabu, wo le kun-tigi la Sɛbulɔn bɔnsɔn kun na. Wo mara bɔnsɔn laban la ka tagama Yuda bɔnsɔnta tamasere kɔrɔ. Wo mara bɔnsɔn sawa nyɔgɛ la min bi Yuda bɔnsɔn fɛ.

17Kɛrisɔn anubɛ Mɛrari kebilɛ minnu bi Lifayi bɔnsɔn kɔrɔ, wonu ya Marita Fani-Bɔn wayan ka a sa kirindinu tɔ sara-ninki si min sagan.

18Rubɛn bɔnsɔn tugunta Kɛrisɔn anubɛ Mɛrari kebilɛ la Marita Fani-Bɔn kɔma ka ta. Sɛdiyala dan Ɛlisa, wo le kun-tigi la Rubɛn bɔnsɔn kun na. 19Simiyɔn bɔnsɔn tugunta Rubɛn bɔnsɔn la. Suri-Sadaila dan Sɛlumiyɛli, wo le kun-tigi la Simiyɔn bɔnsɔn kun na. 20Kadi bɔnsɔn tugunta Simiyɔn bɔnsɔn la. Duwɛlila dan Iliyasafu, wo le kun-tigi la Kadi bɔnsɔn kun na. Wo mara bɔnsɔn laban la ka tagama Rubɛn bɔnsɔnta tamasere kɔrɔ. Wo mara bɔnsɔn sawa nyɔgɛ la Rubɛn bɔnsɔn fɛ.

21Kohati kebilɛ min bi Lifayi bɔnsɔn kɔrɔ, wonu bilara Rubɛn bɔnsɔn sawɛ wo kɔma. Wonu ya Marita Bon-burɔ-mirannu bi ka anu sa anu kan ma. Samani Kohatita kebilɛ ni ke daga-kurɛ rɔ, anu si a taran, Kɛrisɔn anubɛ Mɛrari kebilɛnu bara ban Marita Fani-Bɔn wo sɔla nyɔ.

22Ifɛrɛm bɔnsɔn bilara Kohati kebilɛ fɛ. Amihudila dan Ilasama, wo le kun-tigiyɛ la Ifɛrɛm bɔnsɔn kun na. 23Manasa bɔnsɔn tugunta Ifɛrɛm bɔnsɔn la. Pɛdasala dan Kamɛliya, wo le kun-tigiyɛ la Manasa bɔnsɔn kun na. 24Bɛnyamɛ bɔnsɔn tugunta Manasa bɔnsɔn la. Kidiyɔnila dan Abidan, wo le kun-tigiyɛ la Bɛnyamɛ bɔnsɔn kun na. Wo mara bɔnsɔn laban la ka tagama Ifɛrɛm bɔnsɔnta tamasere kɔrɔ. Wo mara bɔnsɔn sawa nyɔgɛ la Ifɛrɛm bɔnsɔn fɛ.

25Dan bɔnsɔn tora anu kɔma. Anu tugunta Bɛnyamɛ bɔnsɔn la. Amisadaila dan Ehayisa, wo le kun-tigiyɛ la Dan bɔnsɔn kun na. 26Asɛra bɔnsɔn tugunta Dan bɔnsɔn la. Akaranla dan Pegiyɛli, wo le kun-tigiyɛ la Asɛra bɔnsɔn kun na. 27Nafatali bɔnsɔn tugunta Asɛra bɔnsɔn la. Inala dan Ahaira, wo le kun-tigiyɛ la Nafatali bɔnsɔn kun na. Wo mara bɔnsɔn laban la tore ka tagama Dan bɔnsɔnta tamasere kɔrɔ. Wo mara bɔnsɔn sawa nyɔgɛ la Dan bɔnsɔn fɛ.

28Anu tenbi tala tagama rɔ tuma-wo-tuma, bɔnsɔn tan-ni-filɛ damasi lakofunɛ taranta bilala anu nyɔgɔn fɛ ka le.#10.28 Fasi 29-32 ye fasi 10 anubɛ 11 tɛma.

33-34Kohati kebilɛ min bɔra Lifayi bɔnsɔn rɔ, wonu fɔlɔn ya Marita tɔn-kenkirɛ bi ka bila Marita banda-fin-gbɛ wo fɛ. Tuma-wo-tuma, a ye anu yarɔ. A ye kilɛ yirala anu na anu si ta kan min. 35#Yaburi 68.1 Kɔnɔ ni anu bi tɔn-kenkirɛ bila tuma-wo-tuma ka ta, Musa si a kan mayɛlɛ ka a fɔ ko, “E, Mari, i lakɔɛnma ka i yogenu tanyɛnsɛn ma yarɔ. I ma di mɔgɛ minnu ye, wonu ni anu buri i kɔrɔ.” 36Anu ba ke anu daga-makɛ-tina-kurɛ rɔ tuma-wo-tuma, anu si Marita tɔn-kenkirɛ sigi. Wo kɔma, Musa si a fɔ kan-wɛ la tun ko, “E, Mari, na sigi male Isirɛla mɔgɔ waga siyaman tɛma tun.”

Currently Selected:

Yilan-Yilan Koe 10: KCLB

Highlight

Copy

Compare