Matiyu 9
9
Hakɛ Makoto-Koe
(Maraka 2.1-12; Luka 5.17-26)
1Yisa sigira kulɔn rɔ ka dalɛ tɛgɛ ka ta a warɛ soe burɔ. 2Kei min solomonya-faganɛ a la, mɔgɛ donu nara wo la Yisa wara. A sanɛ sanyili rɔ. Yisa ya anuna dɛnkɛninya-wɛ yen tumɛ min, a ya a fɔ kirayatoe wo ye ko, “N bɔ, i yisi sa! I hakɛnu ma ara koto.”
3Nba, tɔn-karan-mɔgɛ donu ya a fɔ anu nyɔgɔn tɛma ko, “E, kei kɛ ye kumala iko Alla le ale la. A ye Alla lafɛyala.”
4Yisa ya anuna miriya ragbɛ. A ko, “Wo ye wo mirila ko-yogomɛ ma nfenna? 5Ka a fɔ ko i hakɛnu ma ara koto, anubɛ ka a fɔ ko i lasɔ ka tagama, nyamintan fɔɛ gbɛlɛ? 6N si a yira wo la ko sɛnbɛ ye nde, Hadama-dan bolo dugu-kole kɛ kuma ka hakɛ makoto.” Woletɔ a ya a fɔ kirayatoe wo ye ko, “I lasɔ ka ila sanyili bi. Sɛgi i warɛ bɔn la!”
7Kei wo ya a lasɔ. A sɛgira a warɛ. 8Mɔgɛnu ya a yen tumɛ min, anu kawara. Anu ya Alla tanto bawo a ara sɛnbɛ-su wo di mɔgɛnu ma.
Matiyu Kele-Koe
(Maraka 2.13-17; Luka 5.27-32)
9Nba, Yisa bɔra nyɔ tumɛ min, a ya duti-makelelɛ do yen. A tɔgɛ Matiyu. A siginɛ ala wɔli-kɛ-tinɛ. Yisa ya a fɔ a ye ko, “Bila n fɛ.” Matiyu ya a lasɔ ka bila a fɛ.
10 #
Luka 15.1-2
Yisa ye fen-dɔn la Matiyula bɔn la tumɛ min, duti-makelelɛ#9.10 Duti-makelelɛ: Yahudiya min bi duti makelela anu na-kelen-nyɔgɛnu bolo ka a don Romu kɛnu bolo, wo bɔrɔbɔnɛ mɔgɛnu bolo. A sɔgɛ ye Yahudiyanu na nun ko anu ni hɔrɔya ka bɔ Romu kɔrɔ. siyaman anubɛ hakɛ-tigi siyaman nara ka sigi ale anubɛ ala karan-dannu fɛ nyɔ. 11Farisi donu ya wo yen min kɛ, anu ya a fɔ Yisala karan-dannu ye ko, “Nfenna wo karan-mɔgɔ ye fen-dɔn-kɛla duti-makelelɛnu anubɛ hakɛ-tiginu fɛ?”
12Yisa ya anu kan lamɔɛn nkɛkuna, a ya a fɔ anu ye ko, “Mɔgɛ minnu kɛndɛ, wonu mako sa bɛsi-bɔlɛ la fɔ minnu kirɛ. 13#Matiyu 12.7; Hoseya 6.6 Wo ta kumɛ kɛ kɔrɛ nyini Allata kitabu rɔ ko, ‘A sa nyinina saraka-soge ma ma bolo fɔ kinikinɛ,’ bawo n ma na mɔgɔ-telennɛnu kele tinɛ fɔ hakɛ-tiginu alako wonu ni bila n fɛ.”
Sun-Don-Koe Nyinikalɛ
(Maraka 2.18-22; Luka 5.33-39)
14Yɔni-Batasi-Kɛlɛ gba-fɛ-bilalɛnu nara Yisa wara ka a manyinika ko, “Malebɛ Farisinu bi sunyɛ donna tuma-wo-tuma kɔnɔ nfenna ila karan-dannu ti sunyɛ don mumɛ?”
15Yisa ya anu yabi ko, “A ye wo burɔ ko mɔgɛ minnu bi kɔnyɔ-masɔɛ rɔ, fananta kɔnyɔ-tigi ye anu fɛ, wonu si di, wa? Wo ti ma mumɛ! Kɔnɔ a wati wa ke, anu ba kɔnyɔ-tigi#9.15 Kɔnyɔ-tigi: Yisa ye a nyɛrɛ le ma kɛ la. wo bi anu tɛma tumɛ min, anu si sunyɛ don worɔ.
16“Mɔgɛ ti kura-kundu-kɛndɛ#9.16 Kura-kundi: Yisa ye tili min tɛgɛla kɛ, wo kɔrɛ le ko dina-kurɛ ti sa dina-kɔrɛ kuma. A filɛ bɛɛ si tinya. bi ka duruku-kɔrɛ labɛtɛrɛ wo la bawo a kɛndɛ wo ra si don ka duruku-kɔrɛ wo rafara ka tenbi a fɔlɔtɛ la. 17Mɔgɔ ti ke baan lamarala gbolo-bɔrɔ-kɔrɛ#9.17 Gbolo-bɔrɔ-kɔrɛ: Wo wati rɔ, anu duruta baan lamarala gbolo-bɔrɛnu tɔ. rɔ. Ni a ya wo ma, a wa kanfa, a si gbolo-bɔrɔ-kɔrɛ wo rafara. Baan wo si bon. Gbolo-bɔrɛ wo si tinya. Kɔnɔ baan la ni mara gbolo-bɔrɔ-kurɛ rɔ. A filɛ bɛɛ la si mara a kin na worɔ.”
Mɔgɛ Donu Nakɛndɛya-Koe
(Maraka 5.21-43; Luka 8.40-56)
18Nba, Yisa ye kɛ fɔla anu ye tumɛ min, Yahudiyanuna kun-tigi do nara a wara ka a nyɛnkin a kɔrɔ. A ko, “Nna dunmusi faga-san le. I yandi, na. I ni i kɔɛn sa a kuma alako a niyi ni sɛgi a rɔ tun.”
19Nba, Yisa ya a lasɔ. Anubɛ ala karan-dannu bilara kun-tigi wo fɛ.
20-21Anu tamatoe, musi do ye nyɔ musinuna kirayɛ ye min na san tan-ni-fila kɔrɔ. A ya a fɔ a yisi rɔ ko, “Ni n ya n bole tugu ala duruki da-gbole la dɔrɔn, n si kɛndɛya.” Woletɔ a nara Yisa kɔma ka a bole tugu ala duruki da-gbole la.
22Yisa ya a tintan tumɛ min, a ya ale musi yen. A ya a fɔ a ye ko, “N na, i yisi ni kimɛ! Ila dɛnkɛninyɛ ara i lakɛndɛya.” Musi wo kɛndɛyara wati kelan wo kɔrɔ tiriya!
23Nba, anu ke, Yisa donta kun-tigi wola bɔn la. A ya saya-sigi-salɛnu anubɛ saya-di-kɛlɛnu yen tumɛ min, 24a ko, “Wo bɛɛ bɔ yan! Dunmusu kɛ fagani ma. A ye kinɔgɛ le tɔ dɔrɔn.” Anu dama ya Yisa mayɛlan dabira. 25Mɔgɛnu banta bɔla nya min wo, Yisa donta furi wo kuma bɔn la ka a bira a bole ma. Dunmusi ya a lasɔ. 26Wo yen mɔgɛnu bolo, ala kabana-ko-mankan nyɛnsɛnta nyamanɛ wo kan tinɛ bɛɛ rɔ.
Fiyon Filɛ Lakɛndɛya-Koe
27Yisa bɔra nyɔ tumɛ min, kei-fiyon fila bilara a fɛ. Anu bi gbele-gbelenna ko, “Mansa Dawudala dan, kinikini ma ma!”
28Yisa donta bɔn la tumɛ min, kei-fiyon filɛ wonu nara a wara. A ya anu manyinika ko, “Wo lanɛ a la ko n si ke wo yɛ lakala, wa?”
Anu ya a yabi ko, “Ma tigi, ɔnde!”
29Nba, Yisa ya a bole tugu anu yɛ la. A ko, “A ni ma wo ye iko wo dɛnkɛninyanɛ nya min!” 30Tiriyɛ wo rɔ, anu yɛ lakara. Yisa ya anu makawandi bɛrɛkɛ! A ko, “Wo kana kɛ fɔ mɔgɔ-wo-mɔgɔ ye de!”
31Kɔnɔ anu tara Yisata kabana-koe wo nyɛnsɛn nyamanɛ wo kan tinɛ bɛɛ rɔ.
Nyinato Bobe Kɛndɛya-Koe
32Nba, mɔgɔ filɛ wonu bi bɔla bɔn la ka wo, mɔgɛ donu nara kei do la Yisa wara min ti ke kumala bawo nyinatoe le. 33Yisa ya nyinɛ gben nya min wo, kei wo ya kumɛ dabira. Mɔgɛ bɛɛ kawara! Anu ko, “Ma ma kɛ nyɔgɔn kabana-koe yen bɛ Isirɛla nyamanɛ rɔ mumɛ!”
34 #
Matiyu 10.25; 12.24; Maraka 3.22; Luka 11.15 Kɔnɔ Farisinu ya a fɔ ko, “Nyina-mansɛ le ye sɛnbɛ wo dila a ma ko a ni nyinɛnu gben.”
Yisa Kinikini-Koe Mɔgɛnu Ma
35 #
Matiyu 4.23; Maraka 1.39; Luka 4.44 Nba, Yisa tara so-wɛnu anubɛ so-mɛsɛnu tɔ. A ya mɔgɛnu kɔndɔn ka anu karan Yahudiya-dina-bɔnnu na. A ya kibara-nyimɛ kawandili bɔ ka kiraya-sufa bɛɛ lakɛndɛya mɔgɛnu na. 36#Yilan-Yilan Koe 27.17; 1 Mansɛnu 22.17; 2 Ko-Kɔrɔta-Karan 18.16; Isikiyɛli 34.5; Maraka 6.34 A ya nyama yen tumɛ min, a yisi lafara kinikinɛ la anuna ko la bawo anu kɔndɔfilinɛ. Anu ti ke anu nyɛrɛ fɛ-birala iko sagɛ minnu fɛ-birala sa. 37#Luka 10.2Nba, a ya a fɔ ala karan-dannu ye ko, “Fui-fan-tɛgɛtɛ kolo kɔnɔ a tɛgɛlɛnu ma siya. 38Wo ni sɛni-tigi madiya alako a ni wɔli-kɛlɛnu nata ala fui-fan tɛgɛ tinɛ.”
Kuranko Common Language Bible © The Bible Society in Sierra Leone, 2006.