Matiyu 3
3
Yɔni-Batasi-Kɛlɛta Kawandili-Koe
(Maraka 1.1-8; Luka 3.1-18; Yɔni 1.19-28)
1San yirika tenbinɛ, Yɔni-Batasi-Kɛlɛ ya kawandili-bɔɛ dabira wulɛ rɔ Yudiya nyamanɛ rɔ. 2#Matiyu 4.17; Maraka 1.15 Yɔni ye a fɔla mɔgɛnu ye nun ko, “Wo ni tubi ka wo kɛ-nyanu yɛlɛma bawo Alla min bi Arinyɛni tɔ, wota mansayɛ ara gbɛrɛn!” 3#Aiseya 40.3 Ado nfan, Nɛbi Aiseya taranta kumala Yɔni kɛ lela ko la nun. A ya a fɔ ko,
“Mɔgɛ do ye gbele-gbelenna wulɛ rɔ. A ye a fɔla ko,
‘Bɛɛ ni kilɛ laka Mari ye.
Bɛɛ ni kila latelennɛ ladan a ye.’ ”
4 #
2 Mansɛnu 1.8
Duruki min nadannɛ nyomo-siyi la, Yɔni ya wo don a kan na ka a butɛ kiri sogo-gbole la. A taranta kɔndɔnnu anubɛ liyi dɔnna nun. 5Mɔgɛnu tora nala a wara ka bɔ Yerusalɛm anubɛ Yudiya nyamanɛ tɛngbɛnya bɛɛ rɔ anubɛ nyamanɛ minnu bi Yorodan bɛ dafɛ. 6Anu ya anu sɔ anu hakɛnu na tumɛ min, a ya anu batasi Yorodan bɛ rɔ.
7 #
Matiyu 12.34; 23.33 Yɔni ya Farisi#3.7 Farisinu: Yahudiyanuna dina min faranɛ filɛ la, wo mɔgɛ do le Farisi kɛnu na. Anu ya tɔn donu sa Musata tɔnnu kuma ka a lagbɛlɛya mɔgɛnu kuma. anubɛ Sadusi#3.7 Sadusi: Yahudiyanuna dina min faranɛ filɛ la, wo do le Sadusi kɛnu na. Anu ti tɔn bɛɛ bira iko Farisinu. Anu ma la melika-koe anubɛ furi-lawuli-koe la. siyaman yen nala a wara tumɛ min anu batasi-koe la, a ya a fɔ anu ye ko, “Wo sɔn yogo iko duguma-fannu. Allala diminyɛ min bi nala, yon ya a fɔ wo ye ko wo si ke bɔla wo kɔrɔ? 8Wo ni koe donu kɛ minnu si a yira ko wo ara wo kɛ-nyanu yɛlɛma. 9#Yɔni 8.33 Wo ya wo miri ko Iburayima manɛ wo benba la min kɛ, wo ti tɔrɔyɛ sɔrɔn. N bi a fɔla wo ye, hali kuri kɛnu, Alla si ke wonu mala dannu na Iburayima ye! 10#Matiyu 7.19 Yende#3.10 Yende: Kurankɔɛ donu si a fɔ ko, “Tɛgɛran.” kɔrɔ ara bi ka kɔlɔma-kurinu tɛgɛ anu sulinu tɔ. Kɔlɔma min gbɔɛ ma di, a bɛnta, a ni tɛgɛ ka a lakɛ tɛ rɔ.
11“N bi wo batasila yi rɔ alako mɔgɛnu ni a lɔn ko wo ara tubi ka wo kɛ-nyanu yɛlɛma. Kɔnɔ ale min bi nala nde kɔma, wo si wo batasi Allala Ni-Sɛnimɛ la anubɛ tɛ min si wo sɛninya. A makawara nde ko pirr! Nde ma bɛn, hali ka ala sanbarɛ bi a ye. 12Ala fɛrɛ labɛnnɛ ka ala fui-fan bɛɛ rafɛ gbere-kole ma. A si a bɛrɛ ladɛn ka a layɛlɛ birɛ la kɔnɔ a si a fofe anubɛ a fɔrɔn mintan tɛ la, ado tɛ wo ti dufen dɛɛ!”
Yisa Batasi-Koe Yɔni Bolo
(Maraka 1.9-11; Luka 3.21-22)
13Wo wati rɔ, Yisa bɔra Kalili sigisɔn rɔ ka ta Yɔni bara Yorodan bɛ fɛ alako a ni a batasi. 14Kɔnɔ Yɔni ya a raya ko Yisa ni a miriya wo yɛlɛma. Yɔni ko, “A ma bɛn, nde ni ile batasi. Ile ni nde batasi!”
15Kɔnɔ Yisa ya a yabi ko, “A ni ma wo nya na bawo a bɛnnɛ, ma ni koe bɛɛ kɛ iko a di Alla ye nya min.” Wo le ya a ma, Yɔni sɔnta.
16Yɔni ya Yisa batasi. A bɔra yi rɔ nkɛkuna, san-kolo-dɛ lakara. A ya Allala Ni-Sɛnimɛ yigimatoe yen iko kangbɔɛ. Wo sigira a kuma. 17#Ko-Dabirɛnu 22.2; Yaburi 2.7; Aiseya 42.1; Matiyu 12.18; 17.5; Maraka 1.11; Luka 9.35 Wo kɔma, kuman-kan bɔra Arinyɛni tɔ, a ko, “N nyɛrɛ diyana-dan le kɛ la min wara-koe ara n hɛnɛ feu!”
Kuranko Common Language Bible © The Bible Society in Sierra Leone, 2006.