Matiyu 27
27
Yisa ye Pailɛti Yakɔrɔ Tumɛ Min
(Maraka 15.1; Luka 23.1-2; Yɔni 18.28-32)
1Subaga-dɛ ma, saraka-masɔla-wɛ bɛɛ anubɛ Yahudiya-kɛmɔgɛnu ya anu nyɔgɔn nadɛn ka sɔn Yisa faga-koe ma. 2Anu ya a kiri yɔlɔkɛ la ka ta a don Romu kun-tigi Pailɛti bolo.
Yudasi Faga-Koe
(Kɛwɔlɛnu 1.18-19)
3 #
Kɛwɔlɛnu 1.18-19
Yudasi min ya Yisa don anu bolo tɔ, wo ya a yen tumɛ min ko anu bara Yisa yiliki, a nimisara. A ya wodi-gbɛ bi-sawɛ wo lasɛgi saraka-masɔla-wɛnu anubɛ Yahudiya-kɛmɔgɛnu ma. 4A ko, “N bara hakɛ kɛ ka mɔgɔ-magbalanɛ ladon wo bolo tɔ, ado a ye nala fagala!”
Anu ya a fɔ a ye ko, “Malela ko sa wo rɔ. Ila koe le wo la!”
5Yudasi ya wodi wo fili Alla-Bato-Bɔn burɔ. A tara. Wo kɔma, a tara a nyɛrɛ dun yili la.
6Saraka-masɔla-wɛnu ya wodi wo matɔnbɔn. Anu ko, “Yele-wodi le kɛ la. Ni ma ya kɛ sa Alla-Bato-Bɔn wodi kuma, wo si mala tɔn tinya.” 7Anu banta a rabɛnna tumɛ min, anu ya wodi wo bi ka bɔnku-daga-sɔlɛla dugi san wo la ka nyɔ ma sundan togon tinɛ la. 8Wo le ya a to, ha bi, anu bi dugi wo kelela ko, “Yele-Dugi.”
9 #
Sakaraya 11.12-13
Nba, Nɛbi Yɛrɛmaya ya min fɔ, wo bɔra-a-la bawo a ko, “Isirɛla mɔgɛ donu sɔnta ka a san wodi-gbɛ bi-sawɛ min na, anu ya wo bi 10ka bɔnku-daga-sɔlɛla dugi san wo la iko Mari ya a fɔ n ye nya min.”
Yisa Fɛsɛfɛsɛ-Koe Pailɛti Bolo
(Maraka 15.2-5; Luka 23.3-5; Yɔni 18.33-38)
11Yisa sɔra Romu kun-tigi Pailɛti yakɔrɔ. Wo ya Yisa manyinika ko, “Yahudiyanuna mansɛ le ile la, wa?”
Yisa ya a yabi ko, “Ɔn, a ye iko i wara a fɔ nya min.” 12Kɔnɔ saraka-masɔla-wɛnu anubɛ Yahudiya-kɛmɔgɛnu ya a maburi minnu na, a ma fenfen fɔ wonu tɔ.
13Wo kɔma, Pailɛti ya a fɔ a ye ko, “Anu bi i maburila koe min bɛɛ la, i sa wonu namɔɛnna, wa?”
14Kɔnɔ hali dafa, Yisa ma a tɛgɛ. Woletɔ Pailɛti kawara a ma kati!
Yisa Faga-Koe Latɛgɛ-Koe
(Maraka 15.6-15; Luka 23.13-25; Yɔni 18.39–19.16)
15Nba, san-bo-san Kanan-Ko-Ladiyɛ kuma, anu si mɔgɔ kelen yabɔ ale kun-tigi si min kunka. 16Wo wati ya a taran, mɔgɛ do ye yele la bɛɛ ya min lɔn, a tɔgɔ Yisa-Barabasi. 17Nyama ladɛnta tumɛ min, Pailɛti ya anu manyinika ko, “Wo ye a fɛ, n ni yon boloka wo ye, Yisa-Barabasi, ka, Yisa anu bi min kelela ko Allata-Mɔgɔ-Yabɔnɛ?” 18A ya a lɔn serr, ko Yahudiyanuna kun-tiginu bara Yisa don a bolo keliyɛ lela ko la.
19Pailɛti siginɛ kiti-bɔn la tumɛ min, ala musi ya kilayɛ lata a ma ko, “I kana fenfen ma mɔgɔ-magbalanɛ wo la bawo n tɔrɔta nna kiyo rɔ suyi tenbinɛ kɛ rɔ ala ko la kati!”
20Saraka-masɔla-wɛnu anubɛ Yahudiya-kɛmɔgɛnu ya a lagbɛlɛya nyama kuma ko anu ni Pailɛti manyinika Barabasi boloka-koe ma ka ale Yisa faga. 21Nba, kun-tigi Pailɛti ya anu manyinika ko, “Wo ye a fɛ, n ni yon boloka wo ye mɔgɔ filɛ kɛnu tɔ?”
Anu ya a yabi ko, “Barabasi!”
22Pailɛti ya anu manyinika ko, “Anu bi Yisa min kelela Allata-Mɔgɔ-Yabɔnɛ, wo ye a fɛ, n ni nfen ma wo la worɔ?”
Anu dama ya sɔnkɔ layɛlɛ ko, “A gbangban kɔlɔma ma!”
23Kɔnɔ Pailɛti ya anu manyinika ko, “A ya ko-yogomɛ nyamintan kɛ?”
Anu sɔnkɔra ha ka a dan natenbi ko, “A gbangban kɔlɔma ma!”
24 #
Tɔn-Fɔɛ-Fila-Nyɔgɛ 21.6-9
Pailɛti ya a yen tumɛ min ko a ti nɔ-ko sɔrɔn anu ma, ado sɔnkɔ-sɔnkɛ ye nala bɔla-a-rɔ le, a ya yi bi ka a bole laku nyama yala. A ko, “Ndeta sa kei kɛ faga-koe rɔ! Wota kɛwɔli le wo la!”
25Nyama bɛɛ ya a fɔ a ye tun ko, “A faga-ko-tɔrɛ ni to male anubɛ mala dannu kuma!”
26Ale Pailɛti ya Barabasi boloka. A ya a ma, anu ya Yisa gbesi ka a don anu bolo a gbangban-koe la kɔlɔma ma.
Yisa Mayɛlɛn-Koe Kɛlɛ-Dannu Bolo
(Maraka 15.16-20; Yɔni 19.2-3)
27Nba, Pailɛtila kɛlɛ-dannu ya Yisa bi ka ta a la ala bɔn la. Anu dama ya a lafoo. 28Anu ya a mawuran ka duruku-yan-wulenmɛ#27.28 Duruku-yan-wulenmɛ: Nyamanɛ wo mɔgɛnuna mansaya-tamasere le nun. don a kan na. 29Anu ya wɔnɛ ma mansaya-fulɛ la ka wo sigi a kunyɛ la ka kɔlɔma don a bolo-nyimɛ rɔ. Wo kɔma, anu ya anu nyɛnkin a kɔrɔ a mayɛlɛn-koe la. Anu ko, “Yahudiyanuna mansɛ, alamɛ i mɛra!” 30Anu ya anu nɔgɔ-yi kɛ a ma. Anu ya kɔlɔma wo bi a bolo ka a gbesi a kunyɛ rɔ. 31Anu banta a mayɛlɛnna tumɛ min, anu ya duruku-yan wo bɔ a kan na ka a nyɛrɛta fanɛnu don a ma tun. Anu tara a la a gbangban tinɛ kɔlɔma ma.
Yisa Gbangban-Koe Kɔlɔma Ma
(Maraka 15.21-32; Luka 23.26-43; Yɔni 19.17-27)
32Anu bi tala tumɛ min, anu bɛnta kei do la ka bɔ Sairini soe burɔ min tɔgɛ Saimon. Anu ya a fɔrɔsɛ ka Yisala faga-kɔlɔma bi. 33Anu nara ke kan tinɛ do min tɔgɛ Kalakata min kɔrɛ le ko, “Kun-kole ye kan min.” 34#Yaburi 69.21 Gbɛɛ min yabasannɛ fen-kunayanɛ la min si a ma, a ti dumɛ lɔn bɛrɛkɛ, anu ya wo di Yisa ma alako a ni a min. Kɔnɔ a ya a mafɛlɛn a nagan la tumɛ min, a ma sɔn a min-koe ma.
35 #
Yaburi 22.18
Anu ya a gbangban kɔlɔma ma. Wo kɔma, anu ya korɔn lakɛ ala durukinu tatala-koe ma anu nyɔgɔn tɛma. 36Wo kɔma, anu sigira a kandan tinɛ. 37Mɔgɛnu ya a maburi minna ko la, anu ya wo sɛbɛ ka a sa a kunyɛ kuma. A ko, “Yahudiyanuna Mansa Yisa le kɛ la.” 38Mɔgɔ fila min kɛnɛna buila mɔgɛnu ma, anu ya wonu gbangban kɔlɔmanu ma Yisa fɛ, kelen a bolo-nyimɛ rɔ, kelen a bolo-maran rɔ.
39 #
Yaburi 22.7; 109.25 Mɔgɔ-tenbimatoenu ya anu kunyɛ radɔn#27.39 Kunyɛ radɔn: Kurankɔ-musinu ba anu bole fɔ, koe min bara ma, wo diyara anu ye. Kɛnu si anu kunyɛ radɔn. Yisa ma ka a lafɛya. 40#Matiyu 26.61; Yɔni 2.19 Anu ko, “Ile. I ko i si Alla-Bato-Bɔn wayan ka a sɔ tun tele sawa kɔrɔ! Ni Allatalata dan le ile la, i nyɛrɛ lakisi. Yigi ka bɔ kɔlɔma ma gbɛ!”
41Saraka-masɔla-wɛnu anubɛ tɔn-karan-mɔgɛnu anubɛ Yahudiya-kɛmɔgɛnu fanan ya a mayɛlɛn wo nya le. 42Anu ko, “A ya mɔgɛnu kisi kɔnɔ a ti ke a nyɛrɛ lakisila! Ni Isirɛlata mansɛ le ale la, a ni yigi ka bɔ kɔlɔma ma kaka, ma si dɛnkɛninya a ma! 43#Yaburi 22.8 A lara Allatala la. A ko Allala dan le ale la. Nba, ma ni a mafɛlɛn, ni a sɔgɛ ye Alla la ka a lakisi!”
44Hali bui-ma-kɛlɛ minnu gbangbanta kɔlɔmanu ma a fɛ, wonu fanan ya a lafɛya wo nya na le.
Yisa Niyi-Bɔ-Koe
(Maraka 15.33-41; Luka 23.44-49; Yɔni 19.28-30)
45Tele latelan, pinpi burunta nyamanɛ wo bɛɛ kuma ha hawa sawa. 46#Yaburi 22.1 Tele-makima-wati, Yisa gbele-gbelenta. A ko, “Ilaya, Ilaya, lama sabakatani?” Wo kɔrɛ le, “Nta Alla, nta Alla, i wara n boloka nfenna?”
47Mɔgɛ donu sɔnɛ nyɔ, wonu ya a kan lamɔɛn. Anu ko, “A ye Nɛbi Ilaya le rakele tinɛ wo la!” 48#Yaburi 69.21 Mɔgɔ kelen ya a buri tiriya ka sefuna-fuyi bi ka a layigi gbɛɛ-kunayanɛ rɔ. Wo kɔma, a ya a dun kɔlɔma kunyɛ la ka a ma ko Yisa ni a min a la.
49Kɔnɔ donu ko, “A makɔni, ma ni a yen ni Nɛbi Ilaya si a lakisi!”
50Yisa ya a kan labɔ tun bɛrɛkɛ, ka a niyi laban lafɛ.
51 #
Bɔ-Koe-Iyipiti 26.31-33
Nba, yorolan min dunnɛ Alla-Bato-Bɔn tɛma, wo farata fila la ka a dabira a kuma ha a kɔrɔ. Dugi yɛrɛyɛrɛnta ha kurinu tatiira. 52Kanbɛnu nakara.#27.52 Kanbɛnu: Yahudiyanuna kanbɛnu mani iko faran-nɛnu. Allala mɔgɛ minnu bara faga#27.52 Faga: Kiriki-kan ko anu kinɔgɔnɛ kɔnɔ wo kɔrɛ le ko anu faganɛ nun. fɔlɔ-nun, wonu siyaman wulita ka niyi lafɛ tun. 53Anu bɔra kanbɛnu tɔ, ado Yisa wulita ka bɔ furinu tɛma tumɛ min, anu tara so-sɛnimɛ rɔ Yerusalɛm, mɔgɔ siyaman ya anu yen kan min.
54Kɛlɛ-den-kun-tigi anubɛ ala kɛlɛ-dan minnu bi Yisa kandanna, wonu ya dugu-yɛrɛyɛran yen tumɛ min, anubɛ koe min bɛɛ kera, anu kumakɔra kati! Anu ko, “Alla nyɛrɛta dan le kɛ la nun serr!”
55 #
Luka 8.2-3
Musu siyamɛ minnu bilara Yisa fɛ a dɛnbɛn-koe rɔ ka bɔ Kalili, wonu bi nyɔ nun. Anu sɔra wula-yan la ka a mafɛlɛn. 56Mariyama Magadala kɛ ye wonu tɛma anubɛ Mariyama, Yemesi anubɛ Yusufu na, kɔni, anubɛ Sɛbɛdila dannu, wonu na.
Yisa Togon-Koe
(Maraka 15.42-47; Luka 23.50-56; Yɔni 19.38-42)
57Wurɛ kera tumɛ min, nɔnfulu-tigi do nara ka bɔ Arimatiya soe burɔ. A tɔgɛ Yusufu. Yisala karan-dan le wo fanan na. 58A tara Pailɛti wara ko anu ni Yisa furi don a bolo. Pailɛti ya a fɔ ko anu ni Yisa furi don ale Yusufu bolo. 59Nba, Yusufu ya a bi ka a kasankɛ linɛn-kura-kurɛ la. 60Anu ya a sa ale Yusufula kanbɛ rɔ min sinnɛ farɛ rɔ. Wo kɔma, a ya kuru-belebele makuru-kurun ka a sa kanba-dɛ la. A tara. 61Mariyama Magadala kɛ anubɛ Mariyama doi siginɛ nyɔ. Anu yɛ bɛnnɛ kanbɛ ma.
Kanba Kandannɛnu Bara-Koe
62Sulen-Tele wo ma, saraka-masɔla-wɛnu anubɛ Farisinu tara Pailɛti wara. 63#Matiyu 16.21; 17.23; 20.19; Maraka 8.31; 9.31; 10.33-34; Luka 9.22; 18.31-33 Anu ko, “N fa, foninya-fɔlɛ wo ya min fɔ wo tumɛ a kɛndɛ, ma hɛnkili tonɛ wo ko. A ko tele sawa wa tenbi tumɛ min, a si wuli tun ka bɔ furinu tɛma. 64Nba, i ni a fɔ ko anu ni kanbɛ wo kandan gben, ha a tele sawa nyɔgɛ. Woletɔ ala karan-dannu ti ke tala ka a furi kankan. Ni anu ya wo ma, anu si a fɔ ko, ‘A ara wuli ka bɔ furinu tɛma,’ ado foninya-laban kɛ si yogoya ka tenbi a fɔlɔtɛ la worɔ.”
65Pailɛti ya a fɔ anu ye ko, “Wo ni a kandannɛnu bi. Anu ni a kandan anu se-koe-bɛɛ la.”
66Woletɔ anu tara ka kanbɛ latogon a kin na ka mandan sa farɛ wo ma. Anu ya a kandannɛnu to nyɔ.
Kuranko Common Language Bible © The Bible Society in Sierra Leone, 2006.