Matiyu 25
25
Sunkurun Tan Wara Koe
1 #
Luka 12.35
“Koe kɛnu ba ma tumɛ min, Alla min bi Arinyɛni tɔ, ata mansayɛ si ma iko sunkurun tan minnu ya anuna lɛnpunu bi ka ta kɔnyɔ-tigi labɛn kilɛ la. 2Mɔgɔ loli, kun-takolɔn le wonu na, a to loli, hɛnkilimɛ le wonu na. 3Kun-takolɔn wonu ya anuna lɛnpunu bi kɔnɔ anu ma na tulu-gbɛrɛ la anu bolo. 4Kɔnɔ hɛnkilimɛnu ya miran donu nafa tuli la ka na wonu na anu bolo anubɛ min bi anuna lɛnpunu tɔ. 5Kɔnyɔ-tigi ma na yona, woletɔ sunkurɔn wonu ya anu dabira ka yunkun. Anu kinɔgɔra.
6“Suyi tɛma, gbele-gbelen-kan bɔra ko, ‘Kɔnyɔ-tigi ara na! Wo na a labɛn!’ 7Sunkurun tan kundenta ka anuna lɛnpunu tabɛn. 8Kun-takolon loli wonu ya a fɔ hɛnkilimɛnu ye ko, ‘Wo ni ma kɔ wola tuli do rɔ bawo mala lɛnpunu bi dufenna.’
9“Hɛnkilimɛnu ya anu yabi ko, ‘Ade, a ti a bɔ ma dama bolo wona. Wo ta a ferelɛnu bara ka do san wo nyɛrɛ ye.’
10“Woletɔ sunkurun-kun-takolɔn wonu tara tulu san tinɛ. Anu tara tumɛ min, kɔnyɔ-tigi nara anu kɔma. Sunkurun loli minnu tabɛnnɛ, wonu donta a fɛ kɔnyɔ-masɔ-ladiyɛ rɔ. Nba, wɔli-kɛlɛnu ya nyɔ-dɛ latogon.
11 #
Luka 13.25
“Wo kɔma, sunkurɔn doi wonu nara. Anu ko, ‘N fa! N fa! Dɛ laka ma ye, ma ni don!’
12“Kɔnɔ kɔnyɔ-tigi ya anu yabi ko, ‘Nde ma wo lɔn mumɛ!’ ”
13Yisa ko, “Nba, wo ni wo yɛ lakalan bawo wo ma n na-tele anubɛ a wati lɔn.
Wɔli-Kɛla Sawɛ Wara-Koe
(Luka 19.11-27)
14 #
Luka 19.11-27
“Alla min bi Arinyɛni tɔ, ata mansayɛ si ma ka le. Kei do bɔra a warɛ ka ta tagama rɔ. A ya ala wɔli-kɛlɛnu kele ka a bolo-fannu kerifa anu na. 15A ya fan do don anu kelen-kelennamɛ-bɛɛ bolo iko anuna kusanyɛ ye nya min. A ya sɛnɛ-bɔrɔ loli don kelen bolo. A ya bɔrɔ fila don do bolo. A ya bɔrɔ kelen don do bolo. Wo kɔma, a tara tagama rɔ.
16“Wɔli-kɛlɛ min ya sɛnɛ-bɔrɔ loli sɔrɔn, wo tara tiriya ka feri kɛ ata sɛnɛ la. A ya bɔrɔ-loli-gbɛrɛ sɔrɔn tɔnɛ la. 17Wɔli-kɛlɛ min fanan ya sɛnɛ-bɔrɔ fila sɔrɔn, wo fanan ya a ma wo nya le. A ya bɔrɔ-fila-gbɛrɛ sɔrɔn tɔnɛ la. 18Kɔnɔ wɔli-kɛlɛ min ya sɛnɛ-bɔrɔ kelen sɔrɔn, wo tara ka denkɛ sin dugi rɔ ka a tigila sɛnɛ dogon nyɔ.
19“Wati-yan tenbira tumɛ min, wɔli-kɛlɛ wonu tigi sɛgira ka anuna wodi dan. 20Wɔli-kɛlɛ min ya sɛnɛ-bɔrɔ loli sɔrɔn, wo nara ka sɛnɛ-bɔrɔ loli-gbɛrɛ don a bolo. A ko, ‘N fa, i ya sɛnɛ-bɔrɔ loli don n bolo, sɛnɛ-bɔrɔ loli-gbɛrɛ mafɛlɛn n bara min sɔrɔn tɔnɛ la.’
21“A tigi ko, ‘Wɔli-kɛla-nyimɛ, lanaya-mɔgɛ, i wara ko-nyimɛ kɛ! I wara lanayɛ kɛ ko-dɔgɔmanɛ rɔ, woletɔ n si a kinama-wɛ don i bolo. I ni don, ma ni sewa ma nyɔgɔn fɛ!’
22“Wo kɔma, a ya sɛnɛ-bɔrɔ filɛ don min bolo, wo nara. A ko, ‘N fa, i ya sɛnɛ-bɔrɔ fila don n bolo. Sɛnɛ-bɔrɔ fila-gbɛrɛ mafɛlɛn, n bara min sɔrɔn tɔnɛ la.’
23“A tigi ko, ‘Wɔli-kɛla-nyimɛ, lanaya-mɔgɛ, i wara ko-nyimɛ kɛ! I wara lanayɛ kɛ ko-dɔgɔmanɛ rɔ, woletɔ n si a kinama-wɛ don i bolo. I ni don, ma ni sewa ma nyɔgɔn fɛ!’
24“Wo kɔma, wɔli-kɛlɛ min ya sɛnɛ-bɔrɔ kelan sɔrɔn, wo nara. A ko, ‘N fa, n ya a lɔn ko i wara-koe gbɛlɛ. I ye min tɛgɛla, mɔgɔ-gbɛrɛ ya wo fui. I ma sugi ki kan min, i ye a gbɔɛ kerila nyɔ. 25N kilanta, woletɔ n tara ka ila sɛnɛ dogon dugi rɔ. Wo le kɛ la! Itɛ le. A bira.’
26“A tigi ko, ‘Ile, wɔli-kɛla-fuyi! Tinya-mansa-yogomɛ! Ile yala, n bi min tɛgɛla, mɔgɔ-gbɛrɛ le ya wo fui, nyɛ? N ma sugi ki kan min, n bi a gbɔɛ kerila nyɔ, nyɛ? 27Nba, a fisa nun, i ni nna sɛnɛ dɔndɔ alako n ba na tumɛ min, n ni a bɛɛ sɔrɔn anubɛ a tɔnɛ. 28Awa, wo ni wo bi a bolo wona. Wo ni a di sɛnɛ-bɔrɔ tan-tigi ma 29#Matiyu 13.12; Maraka 4.25; Luka 8.18 bawo fan do ye min bolo, do si sa wo kuma wonu ye. A si siyaman sɔrɔn. Kɔnɔ fen sa min bolo, hali a dɔgɔmanɛ min bi a bolo, wo si bi a bolo. 30#Matiyu 8.12; 22.13; Luka 13.28Nba, wo ni wɔli-kɛla-fufafuyi kɛ lakɛ pinpi rɔ pon! Mɔgɛnu si di nyɔ ka anu nyin masɔgɔ dumɛ bolo.’
Kiti-Tɛgɛ-Laban Wara-Koe
31 #
Matiyu 16.27; 19.28 “Nde, Hadama-dan wa na nta mansayɛ rɔ tumɛ min nta melikanu fɛ, n si n sigi nta mansaya-sigi-fan rɔ. 32Duninya-mɔgɛ bɛɛ la si dɛn n yakɔrɔ. N si anu fara kurun fila la iko saga-fɛ-biralɛ si sagɛnu fara baanu na nya min. 33N si sagɛnu nadɛn n bolo-nyimɛ rɔ ka baanu nadɛn n bolo-maran rɔ. 34Wo kɔma, nde, mansɛ si a fɔ n bolo-nyimarɔ-mɔgɛnu ye ko, ‘N Fa Alla ara ata duwɛ layigi wole min kuma, wo na! Wo na mansayɛ sɔrɔn min tabɛnnɛ wo ye kebi duninya danta. 35Kɔnkɛ ya n bira tumɛ min, wo ya dɔn-fan di n ma. N kan lagbalata tumɛ min, wo ya yi di n ma. A taranta, bɔn sa n bolo min kɛ, wo ya n yiya wo warɛ. 36N gbu-makolɔn tumɛ min, wo ya n fɛrɛya-bɔ. N kirayara, wo ya n fɛ-bira. N bi yele la tumɛ min, wo tara n kɔndɔn.’
37“Telenbagɛnu si a fɔ nde, mansɛ ye worɔ ko, ‘Mari, ma ya i kɔnkɔtoe yen tumɛ nyamintan ka dɔn-fan di i ma? Ma ya i kan-lagbalanɛ taran tumɛ nyamintan ka yi di i ma? 38Ma ya i taran, bɔn sa i bolo tumɛ nyamintan ka i yiya ma warɛ? Ma ya i gbu-makolɔn taran tumɛ nyamintan ka i fɛrɛya-bɔ? 39Ma ya i kirɛ yen tumɛ nyamintan ka i fɛ-bira? Ma ya i yen yele la tumɛ nyamintan ka i kɔndɔn?’
40“Nde, mansɛ si anu yabi ko, ‘Wo ni wo hɛnkili to kɛ ko! Min dɔgɔ nta mɔgɛnu tɛma, wo ya wo ma wo mɔgɔ kelen na, wo ya a ma nde le la wo la!’
41“Wo kɔma, minnu bi n maran rɔ, n si a fɔ wonu ye ko, ‘Wo ni wo bɔ n fɛ, wole min bi Allala dankɛ kɔrɔ! Wo ta habadan-tɛ rɔ min tabɛnnɛ Setanɛ anubɛ ata melikanu ye! 42Kɔnkɛ ya n bira kɔnɔ wo ma sɔn dɔn-fan dila n ma. N kan lagbalata kɔnɔ wo ma sɔn yi dila n ma. 43A taranta, bɔn sa n bolo kɔnɔ wo ma sɔn n yiyala wo warɛ. N gbu-makolɔn tumɛ min, wo ma sɔn n fɛrɛya-bɔla. N kirayara, wo ma sɔn n fɛ-birala. N taranta yele la kɔnɔ wo ma sɔn n kɔndɔnna.’
44“Nba, anu si n yabi ko, ‘Mari, ma ya i kɔnkɔtoe yen tumɛ nyamintan, ka, i kan-lagbalanɛ, ka, bon sa i bolo, ka, i gbu-makolɔn, ka, i kirayanɛ, ka, i ye yele la, ma ma sɔn i dɛnbɛna?’
45“Nde, mansɛ si anu yabi ko, ‘Wo ni wo hɛnkili to kɛ ko! Min dɔgɔ nta mɔgɛnu tɛma, wo ma wo ma wo la min kɛ, wo ma a ma nde le la wo la!’
46 #
Daniyɛli 12.2
“Nba, wonu si ta habadan-tɔrɔyɛ rɔ kɔnɔ telenbagɛnu si ta habadan-nimayɛ rɔ.”
Kuranko Common Language Bible © The Bible Society in Sierra Leone, 2006.