Matiyu 22
22
Kɔnyɔ-Masɔɛ Wara Koe
(Luka 14.15-24)
1Yisa wulita tilinu sala mɔgɛnu ye tun. 2A ko, “Alla min bi Arinyɛni tɔ, wota mansayɛ mani de iko mansɛ min ya ala den-keila kɔnyɔ-masɔɛ rabɛn. 3Kɔnyɔ-masɔɛ sara minnu kɔrɔ, a ya ala wɔli-kɛlɛnu sɔ wonu kele tinɛ kɔnɔ wonu ma sɔn nala. 4Woletɔ kɔnyɔ-masɔɛ sara minnu kɔrɔ, a ya a sara ala wɔli-kɛla-gbɛrɛnu na ko, ‘Wo ta a fɔ wonu ye ko koe bɛɛ ra ara bɛn. N bara turɛnu anubɛ ninki-den-tɔlɔnɛnu faga. Ma ara fan bɛɛ rabɛn. Anu ni na kɔnyɔ-masɔɛ rɔ!’ 5Kɔnɔ minnu kelenɛ, wonu ma anu tole masɔ wo la. Anu tara anu nyɛrɛ makoenu tɔ. Kelen tara ala sɛnɛ rɔ. Do tara feri-kɛ-tinɛ. 6Kɔnɔ donu fanan ya ala wɔli-kɛlɛnu bira ka anu gbesi ka anu faga. 7Mansɛ diminyara bɛrɛkɛ! A ya ala kɛlɛ-dannu nata mɔgɔ-fagalɛ wonu faga tinɛ ka anuna soe mintan. 8Wo kɔma, a ya ala wɔli-kɛlɛnu kele tun. A ko, ‘Ma ara kɔnyɔ-masɔɛ rabɛn kɔnɔ n ya minnu kele, a ma kɛn, anu ni na tun. 9Nba, wo ta wo sɔ kila-tangbɛnu tɔ. Wo wa mɔgɔ-wo-mɔgɔ yen, wo ni wonu kele kɔnyɔ-masɔ-ladiyɛ ma.’ 10Nba, wɔli-kɛlɛnu tara kila-tangbɛnu tɔ. Anu ya mɔgɛ min bɛɛ yen, anu ya wonu nadɛn, a nyima wo, a yogoma wo, a bɛɛ. Kɔnyɔ-masɔ-ladiya-bɔn fara mɔgɛnu na pim!
11“Mansɛ tara ladɛn rɔ. A ya minnu kele, a ya wonu mafɛlɛn. Yaga, a ya kei do yen kɔnyɔ-masɔ-duruki#22.11 Kɔnyɔ-masɔ-duruki: Min ba kɔnyɔ-masɔ-ladiyɛ rabɛn mɔgɛnu ye nun, wo nyɛrɛ le ye duruki karala mɔgɛ wo bɛɛ ye anu si min bila anu kan na ladiyɛla ko la. sa wo kan na. 12Mansɛ ya a manyinika ko, ‘N bɔ, ile donta yan kama, kɔnyɔ-masɔ-duruki sa i kan na?’ A ma ke fenfen fɔla. 13#Matiyu 8.12; 25.30; Luka 13.28 Mansɛ ya a fɔ ala wɔli-kɛlɛnu ye ko, ‘Wo ni a bole anubɛ a kian lakiri ka a lakɛ pinpi rɔ pon! Mɔgɛnu si di ka anu nyin masɔgɔ dumɛ rɔ kan min.’ ”
14Yisa ya kumɛ wo kundon ko, “Mɔgɔ siyaman kelenɛ kɔnɔ minnu yabɔnɛ, wonu ma siya.”
Duti-Sara-Ko Nyinikalɛ
(Maraka 12.13-17; Luka 20.20-26)
15Farisinu tara ka gbundu kiri anu si ta Yisa da-kɔrɔbɔ nya na. 16Anu ya anuna karan-dan donubɛ Mansa Hɛrodila fɛ-bilalɛnu nata Yisa ma. Wonu ko, “Karan-mɔgɔ, ma ya a lɔn ko mɔgɔ-telennɛ le ile la. I ye mɔgɛnu karanna tonyɛ la Alla sako rɔ. I ti kilan mɔgɔ-wo-mɔgɔ la, ado bɛɛ rakɛn ile yala. 17Nba, i miriya ye kama? Ka duti sara Romu nyamani-kun-tigi wara, mala tɔn-tinyɛ le wo la, ka, a sa wo nya? Wo fɔ ma ye.”
18Kɔnɔ gbundu-koe min kirinɛ a kan ma, Yisa ya wo bɛɛ lɔn. Woletɔ a ko, “Wole nyɛrɛ-mayiralɛnu, wo ye n da-kɔrɔbɔ-koe rɔ nfenna? 19Wo ni duti-wodi do yira n na!” Anu nara wodi-mɛlan do la a ma. 20A ya anu manyinika ko, “Yon yakɔrɛ anubɛ a tɔgɛ ye kɛ ma?”
21Anu ya a yabi ko, “Romu nyamanɛ kun-tigi-ba.”
Nba, Yisa ya a fɔ anu ye ko, “Romu nyamani-kun-tigitɛ ye min na, wo ni wo di ale ma. Allatɛ ye min na, wo ni wo di Alla ma.”
22Anu ya wo lamɔɛn tumɛ min, anu kawara kati! Anu bɔra a fɛ ka ta anu ye.
Furi Lawuli-Ko Nyinikalɛ
(Maraka 12.18-27; Luka 20.27-40)
23 #
Kɛwɔlɛnu 23.8
Tele kelan wo rɔ, Sadusi#22.23 Sadusi: Yahudiyanuna dina do le kɛ la. Anuna tɔnnu gbɛlɛ iko Farisinutɛ kɔnɔ anu ma la melika-koe anubɛ lawuli-koe la mumɛ! donu nara Yisa wara. (Wonu denu bi a fɔla ko mɔgɛnu ti wuli ka bɔ sayɛ rɔ.) 24#Tɔn-Fɔɛ-Fila-Nyɔgɛ 25.5 Anu ya Yisa manyinika ko, “Karan-mɔgɔ, Nɛbi Musa ya ma karan ko, ‘Ni kei fagara, a ma den to, a na-kelen-nyɔgɛ ni kɛɛ-musi wo bi alako wo ni dan sɔrɔn kei wo ye min fagara.’ 25Nba, kei na-kelen-nyɔgɔ wɔrɔnfila ye nyɔ nun. Anu kɔrɔ ya musi furu. A fagara. A ma den to. Ala musi tora kei wo tagbara-sɛ ye. 26Ale fanan mara wo nya le. A sawa nyɔgɛ fanan mara wo nya le. Ala ban, a wɔrɔnfilɛ bɛɛ fagara wo nya na le. 27Wo kɔma, musi nyɛrɛ fagara. 28Nba, furinu ba wuli tumɛ min, musi wo si ma yontɛ la anu tɛma, ado a sigira anu dama wara nun?”
29Yisa ya anu yabi ko, “Wo ara sama feu! Wo ma Allata kitabu lɔn anubɛ Allata sɛnbɛ. 30Furinu ba wuli tumɛ min, anu si ma iko Arinyɛnitɔ-melikanu. Keinu ti musi furu. Musinu ti ta kei-wara-sigi rɔ. 31Nba, ka furi-lawuli-koe fɔ, Alla ya min fɔ wo ye, wo ma wo karan bɛ, wa? A sɛbɛnɛ ko 32#Bɔ-Koe-Iyipiti 3.6 Iburayimata Alla le ale la anubɛ Isiyakata Alla anubɛ Yakobata Alla. Wo kɔrɛ le ko mɔgɔ-nimɛnuta Alla le ale la, furinuta ma.”
33Nyama ya wo lamɔɛn tumɛ min, anu kawara Yisala karan ma.
Tɔn-Belebele Wara-Koe
(Maraka 12.28-34; Luka 10.25-28)
34Farisinu ya a lamɔɛn tumɛ min ko Yisa ara Sadusinu dɛ latogon don, anu fanan ya anu nyɔgɔn nadɛn. 35#Luka 10.25-28Anuna tɔn-karan-mɔgɛ do ya a raya a da-kɔrɔbɔɛ ma nyinikalɛ do fɛ. 36A ko, “Karan-mɔgɔ, tɔn nyamintan kolo tɔn bɛɛ ko?”
37 #
Tɔn-Fɔɛ-Fila-Nyɔgɛ 6.5
Yisa ya a yabi ko, “A sɛbɛnɛ ko, ‘I ni ita Mari Alla keni i yisi bɛɛ la anubɛ i sɔndɔmɛ bɛɛ la anubɛ i hɛnkili bɛɛ la.’ 38Tɔn wo kolo tɔn bɛɛ ko. 39#Saraka-Masɔlɛnuta Tɔnnu 19.18 A fila nyɔgɛ min tugunnɛ wo la, wo le kɛ la ko, ‘I ni i sigi-nyɔgɛ keni iko i nyɛrɛ.’ 40Alla ya tɔn min bɛɛ di Nɛbi Musa ma anubɛ nɛbi doinuna karan bɛɛ dunnɛ tɔn filɛ kɛ la.”
Nyinikalɛ ka Bɛn Allata-Mɔgɔ-Yabɔnɛ Ma
(Maraka 12.35-37; Luka 20.41-44)
41Farisinu nadɛnnɛ tumɛ min, Yisa ya anu manyinika ko, 42“Wota miriya ye kama Allata-Mɔgɔ-Yabɔnɛla ko la? Yon bɔnsɔn ye ale la?”
Anu ya a yabi ko, “Mansa Dawuda bɔnsɔn le.”
43Yisa ya anu manyinika ko, “Nfenna worɔ, Allala Ni-Sɛnimɛ ya a ma, Mansa Dawuda ya a kele ko, ‘Mari’? Ado nfan, Mansa Dawuda ya a fɔ ko,
44 #
Yaburi 110.1
‘Mari ya a fɔ nta Mari ye ko
a ni a sigi a bolo-nyimama-kɔɛn wara la
ha ale Mari ni a yogenu sa a tontɛ kɔrɔ.’
45Nba, ni Mansa Dawuda ya a kele ko, ‘Mari,’ Allata-Mɔgɔ-Yabɔnɛ si bɔ Dawuda bɔnsɔn rɔ kama worɔ?”
46Hali dafa, mɔgɔ kelen ma a tɛgɛ. Ka a dabira wo tele ma, mɔgɔ-wo-mɔgɔ ma sisi a manyinikala nyinikali-gbɛrɛ la tun.
Kuranko Common Language Bible © The Bible Society in Sierra Leone, 2006.