Malakayi 3
3
1 #
Matiyu 11.10; Maraka 1.2; Luka 1.76; 7.27 Mari Sɛnbɛ-Bɛɛ-Tigi ko a ye ala kilayɛ lanala min si kilɛ rabɛn a ye. Wo kɔma, wo ye wo Tigi min nyinina, wo si na a Bato-Bɔn la tiriya! Kilayɛ min yen-sɔgɔ-bɛrɛbɛrɛ ye wo la, wo si na ka a nyɛrɛta sarama-kan wara-koe fɔ.
2 #
Yowɛli 2.11; Lankɛnimayɛ 6.17 Mari kɛ wa na wati min, yon si ke tola a niyi la a kɔrɔ? Ale wa bɔ gbɛ rɔ, yon si kanan? A wa bɔ gbɛ rɔ wati min, a si ma iko sefini-diyamɛ min si nɔgɛ bɛɛ toronde kura-nɔgɔnɛ la. A si ma fanan iko numɛnuna tɛ min si nɛgɛ lalee bandin, ka a kɛndɛ bɔ a boe yala. 3A si kiti sa a kilɛ fɛ iko siyaki min bi wodi-gbɛ laleela ka a bɛrɛ bɔ a boe yala. Iko siyaki ye sɛnɛ anubɛ wodi-gbɛ sɛninyala nya min, Mari si saraka-masɔlɛnu fanan sɛninya wo nya na le. Woletɔ saraka-masɔlɛ wonu si ke saraka-hakikɛnu bɔla Mari ye. 4Wo kɔma, Yerusalɛm so-burɔ-mɔgɛnu anubɛ Yuda kɛnu si na sarakɛnu na Mari ye minnu si a hɛnɛ iko anu duruta a mala nya min nun.
5Mari Sɛnbɛ-Bɛɛ-Tigi ko a si bɔ gbɛ rɔ wo ye ka ko-yogoma-kɛlɛnu makuma. A duru wo, a yɛlɛn wo, a foninya-sereya-fɔla wo, minnu bi wɔli-kɛlɛnu kensunyala anu sarɛnu kuma wo, a kɛɛ-musu bolo-labirala wo, a kelenni bolo-labirala wo, a sundan bolo-labirala wo, ado anu fenfen sa a gbiliyala, a si wo bɛɛ kiti!
Yaka Bɔ-Koe
6Mari ko Mari le ale la. A ti yɛlɛma muk! Ka a tɛgɛ wo ma, a ko wole Yakoba kegeyɛnu, wo la ma ban natola wɛ. 7A ko wole bɔra wo benbanu denu na. Wonu ya ata tɔnnu boloka. Wonu ma sɔn anu bira koe ma. Mari ko wo ni sɛgi a ma tun, a si a ya-lamunun wo la. Kɔnɔ a ko wole ye a fɔla ko, “Ma si nfen ma min si a ma, ma ni sɛgi a ma?” 8Kɔnɔ Alla ye wo manyinikala ko a bɛnnɛ mɔgɛ ni ale Alla kensun, wa? Wo ma telen kɔnɔ a ko wo ye a kensunna. Wole ye a fɔla ko, “Ma ye a kensunyala kama?” A ko wo ye a kensunna yakanu anubɛ kɔ-fannu tɔ. 9Mari ko a ara wo dama danka bawo Isirɛla mɔgɛ bɛɛ ye a kensunyala gbɛ! 10#Saraka-Masɔlɛnuta Tɔnnu 27.30; Yilan-Yilan Koe 18.21-24; Tɔn-Fɔɛ-Fila-Nyɔgɛ 12.6; 14.22-29; Nihɛmaya 13.12 A bɛnta, a ni yaka min nyɔgɔn sɔrɔn wo bolo, a ko wo ni na wo dama la Bato-Bɔn la woletɔ dɔn-fan ra si boroko-baraka nyɔ rɔ. Mari ko wo ni a rasuma. A ko wo si a yen ni a ti san-kolo-dɛnu naka ka fen-nyima-siyaman nayigi wo ma biribiri! 11A ko a ti sɔn tunbinu ni wola ki-fannu tinya. Wola ki-fannu si gbɔ tisikiri! 12Wo kɔma, a ko duninya sibole bɛɛ si wo kele ko mɔgɔ-sewanɛnu bawo wola nyamanɛ si ma sigi-tina-hakikɛ la.
Allata Kinikinɛ Wara-Koe
13Mari ko wo ya kuma-gbondanɛ fɔ a ma. Kɔnɔ wo ya a manyinika ko, “Ma ya nfen fɔ i ma nun?” 14A ko wo ya a fɔ ko, “Ka Alla bato, fufafuyi le wo la. Ni ma ya ala kumɛnu bira ka a yira ale Mari Sɛnbɛ-Bɛɛ-Tigi la ko ma ara nimisa mala ko-yogomɛnuna ko la, wo si nfen nyinya ma ma?” 15Alla ko wole mirinɛ ko mɔgɔ-wasinɛnu denu dɔrɔn sewanɛ. Karagbɛlɛnu bara-koe ye tala yarɔ. Wo mirinɛ ko hali anu bi Alla rasumanna anuna ko-yogoma-ladan la, a sa anu tɔrɔla.
16Wo kɔma, minnu bi Alla gbiliyala, wonu bi kirabɔla anu nyɔgɔn na. Mari ye a wɔlɔ matɔlɔla wonu na. Anu bi min bɛɛsi fɔla, a ye wonu namɔɛnna. Mɔgɛ min bɛɛsi ye Alla gbiliyala, wonu tɔgɛ sɛbɛnɛ Allata hɛnkili-lamiri-buku rɔ. 17Mari Sɛnbɛ-Bɛɛ-Tigi ko anu si ma ata mɔgɛ la. Mari ko a wa a halala-mɔgɛnu kundɛn lunyɛ min, anu si ma atɛ la. Iko fa si kinikini ala dan ma nya min min bi wɔli kɛla a ye, Alla fanan si kinikini ata mɔgɛ wonu ma wo nya na le. 18A ko mɔgɛnu si dan-nafarɛ yen ata mɔgɔ-telennɛnu anubɛ karagbɛlɛnu tɛma. A ko dan-nafarɛ si yen fanan a gbiliyalɛ anubɛ a lafɛyalɛnu tɛma.
Kuranko Common Language Bible © The Bible Society in Sierra Leone, 2006.