Saraka-Masɔlɛnuta Tɔnnu 3
3
Yisi-Kima-Sarakɛ
1“Min tenbi nala ninki la ka a ma yisi-kima-sarakɛ la Mari ye, a mara a keima la wo, a mara a musuma la wo, fɛɛ kana taran a la. 2A si ninki wo bi ka na a la Marita Fani-Bɔn tenbi-bolɔn dafɛ. Saraka-bɔlɛ si a bole sa ninki kunyɛ kuma ka a kan natɛgɛ nyɔ. Saraka-Masɔla Aruna kebila-mɔgɛ donu si na ninki wo yele la saraka-bɔ-tinɛ ka a lakɛ saraka-bɔ-tinɛ tɔnkɔn nanɛ ma. 3-4A si a burɔ-kɛɛnnu bi anubɛ a kɔ-kili filɛ ka wonu sa a benya-bɛrɛ kuma. Anu si wonu sawɛ bi ka anu mintan Mari ye gburr! 5Anu si yisi-kima-sarakɛ kɛnu bi ka anu sa saraka-mintantɛnu kuma tɛ rɔ. Anu si anu damasi mintan anu nyɔgɔn fɛ. Sarakɛ kɛnu mintan-sumɛ si a diya don Mari rɔ bɛrɛkɛ!
6“Min tenbi nala sagɛ la, ni wo ma, baa la a bolo, a mara a keima la wo, a mara a musuma la wo ka wo ma yisi-kima-sarakɛ la, fɛɛ kana taran a la. 7-8Ni mɔgɛ do nara saga-sarakɛ la Mari ye, a ni a bole sa a kunyɛ kuma ka a kan natɛgɛ Marita Fani-Bɔn yarɔ. Saraka-masɔlɛ donu si na a yele la ka a lakɛ saraka-bɔ-tinɛ tɔnkɔn nanɛ ma. 9A si a kɛɛnnu bi anubɛ ka a fɔlɔ a kɔ-kuri ma ha a kɔ-sungban anubɛ a burɔ-kɛɛnnu 10anubɛ a kɔ-kili filɛ ka wonu sa a benya-bɛrɛ kuma. 11Saraka-masɔlɛ si wonu bi ka anu mintan gburr! A soge min bi tola, wo si ma dɔn-fen-sarakɛ la saraka-masɔlɛnu ye.
12-13“Ni mɔgɛ do nara baa-sarakɛ la Mari ye, a ni a bole sa a kunyɛ kuma ka a kan natɛgɛ Marita Fani-Bɔn yarɔ. Saraka-masɔlɛ donu si na a yele la ka a lakɛ saraka-bɔ-tinɛ tɔnkɔn nanɛ ma. 14-15A si a burɔ-kɛɛnnu bi anubɛ a kɔ-kili filɛ ka wonu sa a benya-bɛrɛ kuma. 16Saraka-masɔlɛ si wonu bi ka anu mintan gburr! Wonu mintan-sumɛ si a diya don Mari rɔ. A kɛɛn mumɛ, Maritɛ le. 17Isirɛla mɔgɔ-wo-mɔgɔ kana sogo-wo-sogo kɛɛn dɔn, ni wo ma, a yele. Wo siginɛ kan-bo-kan, tɔn le kɛ la Isirɛla mɔgɛnu ye habadan!”
Currently Selected:
Saraka-Masɔlɛnuta Tɔnnu 3: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
