Saraka-Masɔlɛnuta Tɔnnu 23

Ladɛn-Sɛnimɛnu Bira-Nya

1-2Mari ya tɔn kɛnu di Musa ma ka a fɔ Isirɛla mɔgɛnu ye ka a tɛgɛ ladɛn-koenu ma anu nyɔgɔn fɛ anu tenbi Alla batola tumɛ min. 3#Bɔ-Koe-Iyipiti 20.8-10; 23.12; 31.15; 34.21; 35.2; Tɔn-Fɔɛ-Fila-Nyɔgɛ 5.12-14 Mari ko a ya tele wɔrɔ di ma ma ka mala wɔlɛnu kɛ kɔnɔ a tele wɔrɔnfila nyɔgɛ, a ko ma ni ma sulen wo rɔ. Mari ko a tele wɔrɔnfila nyɔgɛ wo ma, ma kana wɔlɛ kɛ kɔnɔ ma si ma ladɛn ka Mari Alla bato. Ma tara kan-bo-kan, a tele wɔrɔnfila nyɔgɛ wo, Maritɛ le wo la. 4Ma si na ladɛn donu kɛ wati do kɔnɔ ma ye wonu mala wati min, wo le kɛnu na.

Kanan-Ko-Ladiyɛ anubɛ Biredi-Yɛlɛbɛlɛ-Dɔn-Ladɛn

(Yilan-Yilan Koe 28.16-25)

5 # Bɔ-Koe-Iyipiti 12.1-13; Tɔn-Fɔɛ-Fila-Nyɔgɛ 16.1-2 Kanan-Ko-Ladiyɛ kɛ da si bira mata san karɛ fɔlɛ, tele tan-ni-nanɛ, fitiri magben ma. Wati wo nyɛrɛ si ma Mari gbiliya wati la. 6#Bɔ-Koe-Iyipiti 12.14-20; 23.15; 34.18; Tɔn-Fɔɛ-Fila-Nyɔgɛ 16.3-8 Karɛ wo tele tan-ni-loli nyɔgɛ ma, ma si Biredi-Yɛlɛbɛlɛ-Dɔn-Ladɛn fanan kɛ. Tele wɔrɔnfila kɔrɔ, ma ye biredi-yɛlɛbɛlɛ kɛ dɔnna isiti sa a rɔ. 7Tele wɔrɔnfilɛ kɛ tele fɔlɔtɛ ma, ma si ma kundɛn ka Alla bato. Tele wo nyɛrɛ rɔ fanan, ma ti wɔlɛ kɛ wulɔn iko ma duruta ma halala-wɔlɛnu kɛla nya min. 8Mari ko ma ni mala dɔn-fen-sarakɛnu di ale nyɛrɛ ma tele wɔrɔnfilɛ wo kɔrɔ. A tele wɔrɔnfila nyɔgɛ wo fanan ma, ma si ma ladɛn ka Mari bato tun, ado ma kana ma halala-wɔlɛ fanan kɛ.

Dɔn-Fan Kun Fɔlɛnu Di-Koe Mari Ma

(Yilan-Yilan Koe 28.26-31)

9-10Ma wa ke Kenan nyamanɛ rɔ ka mala dɔn-fen kun-fɔlɛnu tɛgɛ wati min, Mari ko ma ni anu kiri fɔlɔtɛnu bi ka a don saraka-masɔlɛ bolo. 11Saraka-masɔlɛ si wonu bi. Sulen-Tele banda kɛ ma, a si wonu dantɛgɛ Mari ma a kilɛ fɛ alako Mari si sɔn ma la nya min. 12Mari ko saraka-masɔlɛ tenbi dɔn-fen kun-fɔlɛ kiri fɔlɔtɛ dantɛgɛla Mari ma tele min nyɛrɛ rɔ, ma si na kolo-fen-saraka-mintantɛ la Mari ye, san-kelen-saga-dan fɛɛ sa min na, 13anubɛ pani-kunbɛ-nya fila dɛgɛ la min tamaganɛ tuli la. Dɔn-fen-sarakɛ kɛ mintan-sumɛ si a diya don Mari rɔ. Wo kɔma, Mari ko ma ni na nɔnbɔ-gbɔ-yi kilasi-nya nani la ka a kofu sarakɛ kɛnu ma. 14Mari ko ni ma ma atɛ fɔlɔn bɔ mala dɔn-fannu kun-fɔlɛ la, ma kana a bila ma dɛ rɔ, hali doni. A kuran le wo, a mintan de wo, a manɛ biredi la wo, a tenɛ de wo, ma kana a dɔn fɔ Maritɛ fɔlɔn ba bɔ a la. Mari ko habadan-tɔn le kɛ la min siginɛ ma kuma.

15Ka a dabira Sulen-Tele banda kɛ ma, ma nara mala dɔn-fen kun-fɔlɛnu na Mari ye lunyɛ min, Mari ko ma ni lɔgɔkun wɔrɔnfila dan ka a fɔlɔ wulɔn tele ma. 16Lɔgɔkun wɔrɔnfilɛ kɛ banda kɛ nyɔgɛ wo ma, Mari ko ma ni na mala dɔn-fen kun-fɔlɛ do la ale ye wulɔn. 17Tele wo nyɛrɛ ma, denbaya-tigi bɛɛsi ni na biredi-lɔngbɔn fila la min nadannɛ isiti la dɔn-fen kun-fɔlɛ dɛgɛ-munke pani-kunbɛ-nya fila la ka wonu ma kɔ-fan la Mari ye. 18Wo kɔma, Isirɛla mɔgɛ bɛɛsi ni na san-kelen-saga-den wɔrɔnfila la anubɛ tura kelen anubɛ saga-yigi, fɛɛ sa minnu na ka kɛnu sa biredi-lɔngbɔn filɛ kɛnu kuma. Kolo-fan kɛnu si ma saraka-mintantɛ la Mari ye anubɛ wo nyɔgɔn dɛgɛ-munke anubɛ wo fanan nyɔgɔn nɔnbɔ-gbɔ-yi. Sarakɛ kɛnu mintan-sumɛ si a diya don Mari rɔ. 19#Bɔ-Koe-Iyipiti 23.16; 34.22; Tɔn-Fɔɛ-Fila-Nyɔgɛ 16.9-12 Wo kɔma, Mari ko ma ni na baa-kɔrɔn kelen na ka wo ma ma hakɛ-sarakɛ la anubɛ san-kelen-saga-yigi fila ka wonu ma yisi-kima-sarakɛ la Mari ye. 20Saraka-masɔlɛ si biredi anubɛ saga-den filɛ dantɛgɛ Mari ma a kilɛ fɛ kɔnɔ sarakɛ wonu daganɛ saraka-masɔlɛnu denu ye. Saraka-sɛnimɛnu denu bi. 21Tele wo nyɛrɛ rɔ, ma kana wɔlɛ mumɛ kɛ kɔnɔ ma ni ma ladɛn ka Mari bato wulɔn. Mari ko ladɛn-kɛ-tɔn siginɛ ma kuma ma tara kan-bo-kan ka a dabira bi ma ha wo tumɛ min di ale Mari ye. Ma kana a boloka.

22 # Saraka-Masɔlɛnuta Tɔnnu 19.9-10; Tɔn-Fɔɛ-Fila-Nyɔgɛ 24.19-22 Mari ko ni mɔgɛ min bi ala dɔn-fan tɛgɛla ala sɛnɛ rɔ, a kana a tɛgɛ ha a konko dɛ ma anubɛ a mabunsannu. Mari ko ka wonu to fugarɛnu anubɛ sundannu ye bawo ale le ma Mari Alla la min ya kɛ fɔ.

Buri-Fɛ-Ladɛn

(Yilan-Yilan Koe 29.1-6)

23-24Mata san karɛ wɔrɔnfila tele fɔlɛ ma, Mari ko ma ni mala wɔlɛnu boloka. Ni ma ya buru-fɛ-kan lamɔɛn, ma si ta ka ma kundɛn ka ale Mari bato. 25Ma tenbi tala ladɛn wo rɔ, ma si na mala sarakɛnu na ma bolo.

Hakɛ-Yamatogon-Ladiyɛ

(Yilan-Yilan Koe 29.7-11)

26-27 # Saraka-Masɔlɛnuta Tɔnnu 16.29-34 Mala san karɛ wɔrɔnfilɛ tele tan ma, Mari ko ma si ma ladɛn wo rɔ ka sunyɛ don ka ta mata hakɛ-yamatogon-sarakɛnu na ale ye. 28A ko ma kana wɔlɛ mumɛ kɛ wulɔn kamasɔrɔn ma Hakɛ-Yamatogon-Tele le wulɔn tele la. 29Kɔnɔ Mari ko ni min ya fan dɔn wulɔn tele rɔ, wo mɔgɛ kana a miri tun ko Maritɛ le mɔgɛ wo la. 30Ni min wɔlita wulɔn tele rɔ, Mari nyɛrɛ si wo faga. 31Mari ko tɔn kɛ siginɛ ma kuma ma tara kan-bo-kan ka a dabira bi ma ha tumɛ min di ale ye. 32Ka a fɔlɔ ma karɛ wɔrɔnfilɛ, a tele kɔnɔntɛ fitiri-magben ma ha a tele tan fanan fitiri-magben ma, ma si wo le ma mata Sulen-Tele do la. Ma kana fenfen dɔn.

Lele-Sɔɛ-Ladɛn

(Yilan-Yilan Koe 29.12-40)

33-34 #Tɔn-Fɔɛ-Fila-Nyɔgɛ 16.13-15#23.33-34 Fasi kɛnu yabasanta alako ka kumɛ kɛnu kɔrɛ lɔn Kurankɔ-kan rɔ a kila-bɛrɛbɛrɛ fɛ. Anu yabasannɛ ka le 33, 34, 39, 35, 40, 36, 42, 43, 41, 37, 38, 44. Mari ko ma wa ban mala dɔn-fannu tɛgɛla wati min, ma ni Lele-Sɔɛ-Ladɛn#23.33 Lele: Kurankɔɛ donu si a fɔ ko, “Gba,” ni wo ma, “Bugi.” dabira mata karɛ wɔrɔnfilɛ a tele tan-ni-loli ma ka ladɛn wo kɛ tele wɔrɔnfila kɔrɔ. 35Ma kana wɔli-wo-wɔli kɛ a tele fɔlɔtɛ ma fɔ ka ma ladɛn wulɔn ka Mari bato. 40Tele wo nyɛrɛ rɔ, ma si mala kɔn-gbɔ-hakikɛ donu keri. Ma si na tin-yanbɛnu firifirila san ma anubɛ kɔlɔma minnu yanba-kun siyaman bi a la. Ma ye ladɛn kɛ kɛla wo nya ka mata Mari Alla gbiliya. 36Mari ko ma ni mata dɔn-fan kɔ-fan di a ma tele wɔrɔnfilɛ kɛ tele kelen-kelan bɛɛsi ma. 42-43Mari ko ma si mala bɔnnu boloka ka ta ma sigi lele wonu na tele wɔrɔnfila kɔrɔ. Mari ko ma si kɛnu ma woletɔ mala kegeyɛnu#23.43 Kegeyɛ: Kurankɔɛ donu si a fɔ ko, “Kɛyakɛyɛ.” si anu miri mala bɔ-wati ma Iyipiti nyamanɛ rɔ anubɛ mala fani-bɔn kɛnu ma wulɛ rɔ yan bawo ale le mata Mari Alla la min ya ma labɔ yɔɔnyɛ rɔ Iyipiti nyamanɛ rɔ. A tele segin nyɔgɛ ma, ma si ma ladɛn wulɔn fanani ka mata dɔn-fen kɔ-fan di Alla ma tun ka ale bato. Ma kana wɔli-wo-wɔli kɛ. 41Ka a dabira bi ma, tɔn kɛ ye mabɛ ma kegeyɛnu kuma.

37Ma ara ladɛn min bɛɛsi wara-koe fɔ kɛ la, Mari ko ma si ata gbiliyɛ yira a la saraka-bɔ-nya kɛnu fɛ, dɛgɛ-saraka-bɔ-nya wo, saraka-mintantɛ bɔ-nya wo, nɔnbɔ-gbɔ-yi saraka-bɔ-nya wo, anubɛ saraka-dɔntɛnu bɔ nya. 38Mala ladɛn-tele kɛnu denu sanɛ Sulen-Telenu kuma. Mari ko a ara sarakɛ minnuna ko fɔ kɛnu na, wonu denu sanɛ tele-wo-tele-sarakɛ anubɛ yisi-sewani-sarakɛ anubɛ lanyiri-kanbali-sarakɛnu kuma.

44Musa ya Isirɛla mɔgɛnu nabila Mari-bato-nya ladɛn tɔn kɛnu na.

Currently Selected:

Saraka-Masɔlɛnuta Tɔnnu 23: KCLB

Highlight

Copy

Compare