Yasowa 5
5
1Amora mansɛ min bɛɛ ye tele-yigi wara la anubɛ Kenan mansɛ bɛɛ minnu bi kɔgɔ-yi dafɛ, wonu ya a lamɔɛn tumɛ min ko Mari ya Yorodan bɛ gbala Isirɛla mɔgɛnu yarɔ, anu kilanta Isirɛla mɔgɛnu na ka a dan-natenbi. Anu mara iko mɔgɔ-faganɛnu bawo anu yisi ara tinya feu!
Keinuna Kemininya-Koe Kiligali
2-6 #
Yilan-Yilan Koe 14.28-35
Anu bi bɔla Iyipiti tumɛ min, kei bɛɛ kemininyanɛ le nun kɔnɔ anu ya dan minnu sɔrɔn wulɛ rɔ san bi-nani wo kɔrɔ, wonu ma kemininya wo wati rɔ. Kei min bɛɛ bɔra Iyipiti nyamanɛ rɔ, min bɛɛ si ke kɛlɛ kɛla, kɔni, wonu fagara wulɛ rɔ wo wati rɔ bawo anu ya Marila tɔnnu tinya. Mari ya a fɔ ko anu ti don Kenan nyamani-nyimɛ rɔ iko Mari ya lanyiri kiri anu benbanu ye nya min, fɔ kina minnu bɔra Iyipiti, wonu ba ban fagala wulɛ rɔ tumɛ min. Woletɔ Mari ya a fɔ Yasowa ye ko, “I ni kuri donu nadan muri la ka Isirɛla keinu nakemininya wonu na.” Yasowa ya a ma iko Mari ya a fɔ a ye nya min. A ya Isirɛla kei bɛɛsi lakemininya ka kan tinɛ wo tɔgɔ sa “Kemininya kɔnkɛ.” 7Woletɔ bɔnsɔn-kurɛ kɛ minnu sɔrɔnta wulɛ rɔ, Yasowa ya wonu nakemininya.
8-9Mari ya a fɔ Yasowa ye ko, “Wo ya wo nyɛrɛ sanka Iyipiti kɛnu ma anuna kemininyabɛlitayɛla ko la kɔnɔ n bara wola miliya-koe bɔ wo ma bi.” Woletɔ anu ya kan tinɛ wo tɔgɔ sa Kiligali.#5.9 Kiligali: Wo kɔrɛ le ko, miliya-koe ara bɔ anu ma. Ha bi, anu bi a kelela wo nya. Anu tora nyɔ ha anu kɛndɛyara.
10 #
Bɔ-Koe-Iyipiti 12.1-13
Isirɛla mɔgɛnu bi Kiligali lɛɛ rɔ Yɛrikɔ da kɔrɔ tumɛ min, anu ya Kanan-Ko-Ladiyɛ kɛ anuna karɛ fɔlɛ tele tan-ni-nani wurɛ la. 11Wo banda kɛ, anu ya fui-fen-yilannɛ ani dɛgɛ-yɛlɛbɛlɛ dɔn Kenan nyamanɛ rɔ. 12#Bɔ-Koe-Iyipiti 16.35 Wo kɔma, Allata biredi#5.12 Allata biredi: Mari si dɔn-fen min nayigi Isirɛla mɔgɛnu ma, wo tɔgɛ le “manna” anuna kan rɔ. wo ma yigi anu ma tun bawo wo san la anu ya Kenan dɔn-fen-dɔn dabira.
Yasowa anubɛ Marita Kɛlɛ-Kun-Tigi
13Yasowa gbɛrɛnta Yɛrikɔ ma tumɛ min, a ya mɔgɛ do yen sɔnɛ a yakɔrɔ, faan ye a bole tɔ. Yasowa tara a wara la ka a fɔ a ye ko, “I ye male le fɛ, ka, ma kɛlɛ-nyɔgɛ le ile la?”
14Kei wo ya a yabi ko, “Marila kɛlɛ-den-kun-tigi le nde la.”
Yasowa ya a sa dugi ma a kɔrɔ ka a bato. A ya a fɔ kei wo ye ko, “Ila wɔli-kɛlɛ le nde la. I ye a fɛ, n ni nfen ma?”
15Marila kɛlɛ-den-kun-tigi ya a fɔ a ye ko, “Ila sanbarɛ bɔ i kian rɔ. I sɔnɛ kan min wo la, dugu-sɛnimɛ le wo la.” Yasowa ya a ma iko kei wo ya a fɔ a ye nya min.
Kuranko Common Language Bible © The Bible Society in Sierra Leone, 2006.