Yowɛli 3
3
Sibolenu Kiti-Koe Alla Bolo
1Wo wati wa ke, Yuda anubɛ Yerusalɛm kɛnu bi nya min nun fen-tigiyɛ la,
Mari ko a si wo lasɛgi wo gbɛ rɔ wo nya na tun.
2A ko a si sibole bɛɛ kundɛn lɛɛ do rɔ min tɔgɛ Kiti Sa Lɛɛ.#3.2 Kiti Sa Lɛɛ: Lɛɛ wo tɔgɛ le “Yɛhosafati” Hiburu-kan rɔ.
A ko a si anu kiti nyɔ rɔ
ka a tɛgɛ anu bara min ma wole, ata mɔgɛnu na.
A ko anu bara wole, Isirɛla mɔgɛnu tanyɛnsɛn duninya-tonko-nanɛ bɛɛ rɔ
ka wola nyamanɛ tala anu nyɔgɔn na.
3Mari ko anu bara korɔn lakɛ mɔgɔ-biranɛ wonuna ko la iko siyaman,
ni min si to min ye.
Anu ya Isirɛla den-keinu fɛlɛn alako anu ni yɛlannu-sarɛ sɔrɔn.
Anu ya Isirɛla sunkurɔnnu ma baan-sɔnkɛ la.
4 #
Aiseya 14.29-31; 23.1-18; Yɛrɛmaya 47.1-7; Isikiyɛli 25.15–28.26; Emɔsi 1.6-10; Sɛfanaya 2.4-7; Sakaraya 9.1-7; Matiyu 11.21-22; Luka 10.13-14 Mari ya Filisiti nyamanita-mɔgɛnu anubɛ Taya anubɛ Saidon so-burɔ-mɔgɛnu manyinika, ni anu bi min mala kɛ la, ni anu bi ale Mari tayili sara le la wo rɔ. Nba, ni wo le, ale Mari ko ale fanan si a tayili sara anu na tiriya! 5A ko wo ara ata sɛnɛ anubɛ wodi-gbɛnu bi ka ta wonu na wola bɛsi-kɔ-tinɛnu tɔ. 6A ko wo ara ata mɔgɛnu bira Yuda nyamanɛ anubɛ Yerusalɛm soe burɔ ka ta anu mayira Kirisi kɛnu ma pon! 7Kɔnɔ a ko kaka, wo ara ala mɔgɛ minnu mayira, a si na wonu na tun ka bɔ kan tinɛ wonu tɔ. A ko a si a ma, wole fanan na iko wo ara a ma ata mɔgɛnu na nya min. 8A ko ale nyɛrɛ si a ma, Yuda nyamanita-mɔgɛnu ni wola dannu san ka ta anu mayira Sabiya kɛnu ma pon! Ale Mari kan le kɛ la.
9Wo ni kɛ fɔ bɛɛ ye duninya rɔ ko,
“Bɛɛ ni a rabɛn kɛlɛla ko la.
Wo ni wola kɛlɛ-kurugbɛnu kele.
Wola kɛlɛ-dan bɛɛ ni anu gbɛrɛn anu nyɔgɔn ma ka kɛlɛ labui anu yogenu ma.
10 #
Aiseya 2.4; Maika 4.3 Wola nunakɛnu ni wola dɛɛnu gbesi faannu na wo ye
ka wola sɔnbɛnu gbesi tanbɛnu na.
Hali mɔgɔ-rafaganɛnu ni kɛlɛ kɛ.
11Wole sibole minnu bi Yuda nyamanɛla foolɛ rɔ,
wo ni wo latiriya nala
ka wo kun bɛn lɛɛ rɔ.”
E, Mari, ila kɛlɛ-dannu nayigi anu kan ma.
12Mari ko, “Fɔ sibole wonu ba anu tabɛn kɛlɛ-kɛ-koe la
ka na Kiti Sa Lɛɛ rɔ.
Sibole minnu bi wola foolɛ rɔ, n si anu kiti lɛɛ wo rɔ.
13 #
Lankɛnimayɛ 14.14-16, 19-20; 19.15 Anu wunduyogo dɔgɔma-ma-de!
Wo ni anu kunyɛ tɛgɛ a daga rɔ iko fui-fen-tɛgɛtɛ.
Wo ni anu burun sagbayi,
iko mɔgɛ wa numunu-siyamɛ burun, a yi-lamara-tinɛ la ni fa,
ado ni anu hakɛnu mara yi wo la, a lamara tinɛ bɛɛ la si fa tɛf!”
14Mɔgɔ waga yirika-siyaman nadɛnnɛ Kiti Sa Lɛɛ kɛ rɔ.
Marita tele si anu taran lɛɛ wo rɔ.
15Tele anubɛ karɛ si fin wulɔn.
Hali lolenu, anu mɛlan ti yen.
Alla Duwa-Koe Ala Mɔgɛnu Ye
16 #
Emɔsi 1.2
Mari kulu-mayɛlɛnɛ si bɔ Yerusalɛm kɔnkɔ-sɛnimɛ kuma.
Dugi anubɛ san-kole si yɛrɛyɛrɛn.
Kɔnɔ hali wo, a si ala mɔgɛnu kumafunfan.
17A ko wole, Isirɛla mɔgɛnu si a lɔn wati wo rɔ
ko wota Mari Alla le ale la.
A ko ale le ye a mayigila ata kɔnkɔ-sɛnimɛ kuma.
A ko Yerusalɛm soe si ma so-sɛnimɛ la.
Sibolo-gbɛrɛnu ti nɔ-ko sɔrɔn a ma tun!
18Mari ko wo wati si a taran, kɔnkɛnu yamatogonnɛ ki-fannu na.
I tara kɔnkɔ-wo-kɔnkɔ ma, i si kolo-fannu taran nyɔ, wo si minnu burun.
Yi-worɔn min bɛɛsi ye Yuda nyamanɛ rɔ, wo bɛɛ la si fa yi la tɛf!
Tenke do si bɔ Mari Bato-Bɔn la
ka yigi lɛɛ do rɔ min tɔgɛ Akasiya#3.18 Akasiya: Kɔlɔma kɛ mani de iko ma si min kele ko, “Sunkurɔnna kole.” lɛɛ.
19Mari ko Iyipiti si ma wula-da-rakolɔn la.
Idɔm si ma nyamani-kasaranɛ la.
Wo ye mala bawo anu nara bui Yuda nyamanɛ ma
ka mɔgɔ-magbalanɛnu faga nyɔ.
20-21Mari ko a si wonu tayili sara.
A ko mɔgɔ-yilikinɛ wonu ti to anu niyi la.
Yuda nyamanɛ anubɛ Yerusalɛm soe rakolonyanɛ ni taran muk,
ado Mari ko a mayiginɛ si to Yerusalɛm a Bato-Bɔn la tolon!
Kuranko Common Language Bible © The Bible Society in Sierra Leone, 2006.