Yemesi 3
3
Dɛnkɛninya-Mɔgɛ Dɛ-Mara-Koe
1N na-kelen-nyɔgɛnu, wo siyaman kana ma karan-mɔgɛnu na bawo wo ya a lɔn ko male karan-mɔgɛnuta kiti si gbɛlɛya mɔgɔ-gbɛrɛnutɛ ko.
2Ma dama si sama tuma siyaman. Mɔgɛ min ti sama kumɛ rɔ hali doni, wo tigi kanbalinɛ le feu! A si ke a nyɛrɛ matankala le fanan. Fɛɛ ti taran a la ko-wo-ko rɔ. 3Ma si karafɛ don soee dɛ ma alako a ni ma sako kɛ. Kan tinɛ min di ma ye, ma si ke ka a lata nyɔ. 4Nba, wo ni wo miri yi-kuma-kulɔn ma. Hali a kolo, fɔn-belebele-wɛ si ta a la kɔnɔ mɔgɛ si a kunyɛ latelen lalɛ#3.4 Lalɛ: Lalɛ kɛ, subolo fila le. Doi, anu bi yi bɔla wo la, ni wo ma, anu si kulɔn tintan wo le la fanan. Lalɛ doi, wo ye kulɔn kɔrɔ le. Wo fanan si kulɔn tintan de. la kulɔn kolo min ko. 5Ma dɛ fanan manɛ le iko lalɛ kɛ. A dɔgɔ kɔnɔ a si a nyɛrɛ matɔgɔ ko-wɛnu tɔ.
Ta-nɛ si fira-belebele mintan. 6Ma dɛ mani de iko ta-mɛlan. A dɔgɔ ma fɛrɛ rɔ kɔnɔ a si ta-belebele tugu. A lafanɛ ko-yogomɛ la. A si ko-yogomɛ nyɛnsɛn kan tinɛ bɛɛ rɔ! A si tɛ tugu mala nimayɛ kɛ la nya bɛɛ ma iko tɛ min bi nala ka bɔ nyahanama nyɛrɛ rɔ.
7Mɔgɛ si ke ka dali-fen-su-bɛɛ kolo. A mara firarɔ-sogo la wo, a mara kona la wo, a mara sagan-fen na wo, hali yɛgɛ, mɔgɛnu bara wonu kolo. 8Kɔnɔ mɔgɔ-wo-mɔgɔ ma ke wɛ a dɛ kolola ha bi. Fen-yogomɛ le, ado a ti ke marala. A lafanɛ munku-yogomɛ la! 9#Ko-Dabirɛnu 1.26 Ma ye baraka birala ma Mari anubɛ ma Fa Alla ye ma dɛ min na, ma hadama-den-nyɔgɛ min nadannɛ Allala muninyɛ rɔ, ma ye wo dankala ma da kelen pe wo le la tun! 10Baraka-bira-kumɛ anubɛ dankali-kumɛnu bi bɔla da kelan wo le tɔ. N na-kelen-nyɔgɛnu, wo ma bɛn hali, 11ado yi-diyamɛ anubɛ yi-kunayanɛ ti ke bɔla tenke kelen tɔ mumɛ! 12Toro-kuri ti ke gbɔla mankore#3.12 Mankore: Min sɛbɛnɛ yan, wo le ɔlifi la. Kɔlɔma-su do le min gbɔɛ anubɛ a tuli dɔn di. la. Nɔnbɛ ti ke gbɔla tore la. Kɔgɔ-yi fanan ti ke yi-diyamɛ labɔla.
Hɛnkili min Bɔnɛ San Ma, wo Wara-Koe
13Hɛnkilimɛ anubɛ ko-lɔnnɛ do ye wo tɛma, wa? A ni wo yira a tagama-nya anubɛ a kɛ-nya-nyimɛnu tɔ. A ni wonu kɛ famayigi anubɛ hɛnkilimayɛ rɔ. 14Kɔnɔ ni keliya-yogomɛ ye i yisi rɔ, ado i ye koe bɛɛ bɛnna i nyɛrɛ le ma dɔrɔn, i kana i nyɛrɛ matɔgɔ ka a tɛgɛ ila hɛnkilimayɛ ma. I wara tonyɛ boloka worɔ ka foninya-yogoma-wɛ sa tele la. 15Hɛnkili-su wo ma yigi ka bɔ Arinyɛni tɔ. Hadama-danta kɛ-nya-yogomɛ anubɛ duninyatɛ le wo la. Setanɛ bolo-gbɛ le wo la, 16ado keliyɛ anubɛ min bi nyinina fan bɛɛsi ma a nyɛrɛ ye, ni wonu bi kan min, sɔnkɔ-sɔnkɛ anubɛ ko-yogoma-sufa-bɛɛ ye nyɔ le.
17Kɔnɔ hɛnkili min bɔnɛ san ma, a fɔlɔtɛ ye min na, a sɛnima. A yisi-kimanɛ fanan. A dinyanɛ. A madiya-koe ma gbɛlɛ. A fanɛ kinikinɛ la. A ye kɛwɔli-nyimɛnu kɛla. A ti lafisayalɛ kɛ. A ti a nyɛrɛ kɔrɔta. 18Nyimayɛ ye tɔnɛ min nabɔla, kɛlɛ-makimalɛnu denu ya wo ki. Tɔ-a-la, yisi-kimɛ si tɛgɛ nyɔ.
Kuranko Common Language Bible © The Bible Society in Sierra Leone, 2006.