Aiseya 55
55
Alla Kinikini-Koe Ata Mɔgɛnu Ma
1 #
Lankɛnimayɛ 21.6; 22.17 Mari ko ni minnu kan lagbalanɛ,
wonu ni na anu min.
Ni wodi sa minnu bolo,
wonu ni na dɔn-fen bi tinɛ.
Wo ni na nonɛ anubɛ min-kɛ-fan min,
wo ti fenfen bɔ.
2I si wodi labɔ fan dola ko rɔ min ti i fa?
I si i sara-kunyɛ lagbana, kɔnkɛ ni to i niginigila?
Ni wo ya wo tole masɔ ale Mari la, wo si to fen-diyamɛnu dɔnna.
Dɔn-fan min bi i sɔndɔmɛ wasala, i si to wo dɔnna.
3 #
Kɛwɔlɛnu 13.34
A ko wole, ata mɔgɛnu, wo ni wo tole masɔ a la ka wo gbɛrɛn a ma.
Wo ni wo tole masɔ a la.
A si niyi di wo ma.
A ko a si habadan-lanyiri kiri wo ye
iko a ya Dawuda yili-madiya nya min
ata keninteya-dan-natɛgɛbɛlɛ la.
4Mari ya Dawuda ma kun-tigi anubɛ kɛlɛ-kurugbɛ la sibolenu ye.
Mari ya ata fanka mayira anu na Dawuda le tɔ.
5Wo ma sibole minnu lɔn kɔrɔma la, wo si wonu kele kan-tina-kelen,
ado sibole minnu ma wo lɔn, wonu burimatoe si na wo wara.
Kɛ damasi si ma bawo wole Isirɛlata Mari Alla-sɛnimɛ le wara gbiliyɛ di wo ma.
6Mari-nyini-tumɛ le kɛ la yanni tele ni ta wo ma,
ado a rakele-tumɛ le kɛ la bawo a gbɛrɛnnɛ wo ma.
7Karagbɛlɛ bɛɛ ni a kɛ-nya boloka
ka anu miriyanu yɛlɛma.
Anu ni anu ya-lamunun mata Mari Alla la,
a si kinikini anu ma ka anu makoto feu!
8Mari ko wo miriya anubɛ ale miriya kelen ma anu na.
Wo kɛ-nya anubɛ aletɛ, kelen ma anu na.
9Iko san-kole anubɛ dugu-kole fɛ-yan anu nyɔgɔn na nya min,
a kɛ-nya anubɛ a miriya fɛ-yan wotɛnu na wo nya na le pon!
10 #
2 Kɔrɛnti 9.10
Mari ko ata kumɛ mani de iko bandɛ anubɛ duri ye dugu-yi kɛla nya min,
anu si ki-fannu nananfa.
Mɔgɛ si sugi anubɛ dɔn-fan sɔrɔn ki-fan wonu tɔ.
11Marita kumɛ ye wo nya na le.
Ala kumɛ ti ma fufafuyi la.
Ala kumɛ bɛɛ si bɔ-a-la iko ale ye nyinina a ma nya min.
12Wo kunyɛ sewanɛ si bɔ biralɛ rɔ ka nyɔ boloka yisi-kimɛ rɔ.
Kɔnkɛnu anubɛ gburukulinu si bara sigi-sa-tinɛ wo yala.
Kɔlɔma bɛɛ si lɛnkɛ gbesi.
13Wɔnɔ-firɛnu si yɛlɛma kɔlɔma-hakikɛnu na.
Kala-dugi si ma firɛ la.
Kɛ wa ma tumɛ min, wo hɛnkili ni to bilala Marita lanyiri ko.
Kɛ si ma habadan-misalɛ la min ti tinya muk!
Kuranko Common Language Bible © The Bible Society in Sierra Leone, 2006.