Aiseya 53
53
1 #
Yɔni 12.38; Romu 10.16 Mɔgɛnu bi a fɔla ko,
“Ma ara min namɔɛn Alla bolo kɛ la, yon bi lala wo la?
Yon bara Marita fanka yen koe kɛnu tɔ?”
2A luruba-lurubɛ Alla yala iko ki-fen-hakikɛ min suli ye dugu-gbalanɛ rɔ.
Kɔnɔ hadama-dan yɛ-bɔ-kunya-wo-kunya sa a la.
A yen-nya si a ma, a mafɛlɛn-sɔgɛ ti mɔgɛ bira.
3Mɔgɛnu bara anu ban a la ka a magboya.
Tɔrɔyɛ anubɛ dumɛ da ra kolo a kuma
ha a mapɛsɛkɛrɛyara.
Wo ya a ma, mɔgɔ ma ke a mafɛlɛnna.
Mɔgɔ ma a yakɔrɔ yira a la bawo anu ma a yatɛ fenfen na.
4 #
Matiyu 8.17
A ya a mun tɔrɔyɛ ma male lela ko la.
A ya mata dumɛ bi a nyɛrɛ ma.
A tenbi tɔrɛ wo kun na,
ma miri ko Alla le ye a tɔrɔ tinɛ.
5 #
1 Pita 2.24
Ala tanban bɛɛ tɛgɛra ma sɔn-yogomɛnu denu ma.
Ma hakɛnu denu ya a ma, a ramɔsɔkɔn-mɔsɔkɔnta.
A gbesira alako male ni yisi-kimɛ sɔrɔn.
Ala bosa-gbɛ le ya a ma, ma ara kɛndɛyɛ sɔrɔn.
6 #
1 Pita 2.25
Ma dama ara yilan-yilan iko sagɛnu.
Bɛɛ ara ta a kun fɛ.
Kɔnɔ Mari ara tɔrɔyɛ sigi ale ma
ka a tɛgɛ mala ko-yogomɛnu ma.
7 #
Lankɛnimayɛ 5.6
A ma kuma-wo-kuma fɔ a latifi-tafilɛnu ma.
A madenɛ iko anu bi nala saga-dan min mala sarakɛ la.
A radenɛ don, iko anu bi nala sagɛ min siyi matɛgɛla.
Hali da-nya-fa kelan, a ma tɛgɛ.
8 #
Kɛwɔlɛnu 8.32-33
Mɔgɛnu ya a bira boloko-yogomɛ-kɛ ka a yiliki.
A fagara, a ma a nyɔgɔn to.
Anu ya a faga ala mɔgɛnuna ko la.
9 #
1 Pita 2.22
Anu ya a togon karagbɛlɛnu dafɛ.
Anu ya a sa nɔnfulu-tigita kanbɛ rɔ.
A ma karagbɛlɛya kɛ tele-kelen-bɛrɛni!
Ado nfan, yanfanteya-kuma-wo-kuma sa a da rɔ.
10Ala tɔrɔyɛ ya Mari hɛnɛ feu!
Ata sayɛ mara yiliki-sarakɛ la.
Hali wo, a siyi-fɛ si yanya, ado a si a kebilɛnu yen.
Min bɛɛ sigira a ma, wo le ya a ma, Mari miriya bɔra.
11Ala tɔrɔyɛ mumɛ bɛɛ wa tenbi a kun na, wo si a laban a bolo sewɛ ma.
Wo kɔma, a ni to a lɔnna ko a ma tɔrɔ-fu kɛ.
Mari ko ata wɔli-kɛlɛ si a ma, mɔgɔ-siyaman na ni telen Mari ye.
A si ta anu hakɛ la a bolo.
12 #
Maraka 15.28; Luka 22.37 Mari ko a si mɔgɔ-siyaman ma aletɛ la.
Mɔgɔ-siyaman si ma a halalɛ la iko mansɛnu bi fan min sɔrɔnna kɛlɛ rɔ.
A ya a nyɛrɛ niyi di foninsereyɛ la.
Mɔgɛnu ya a bira iko ko-yogoma-kɛlɛ
A tara mɔgɔ-siyaman hakɛ la a bolo
ka makotolɛ nyini hakɛ-tiginu ye a bolo.
Kuranko Common Language Bible © The Bible Society in Sierra Leone, 2006.