Aiseya 4
4
1Wo wati wa ke, musu wɔrɔnfila si kei kelan bi. Anu si a fɔ ko, “Ma si ke ma nyɛrɛ dunɛ la le kɔnɔ a di ma ye ma ni sigi i tɔgɛ rɔ alako ma kana to ma furubɛlɛ la.”
Yerusalɛm Sabati-Koe Tun
2Wati ye nala, Mari si a ma, fui-fannu anubɛ ki-fannu ni to sabatila. Isirɛla mɔgɛ toe minnu bi tola, wonu si nyagalen ka a tɛgɛ ki-fan wonu sabati-nya ma nyamanɛ wo rɔ. 3Alla ara ban a latɛgɛla min kɛndɛ si to Yerusalɛm soe burɔ, wonu si kele ko mɔgɔ-sɛnimɛnu. 4Mari si kiti sa ka Yuda nyamanita-mɔgɛnu sɛninya. Ata sɛnbɛ si Yerusalɛm yele ku a ma ka yiliki bɔ a ma. 5#Bɔ-Koe-Iyipiti 13.21; 24.16 Wo kɔma, Mari si banda-fin-gbɛ lana tele rɔ Yerusalɛm kuma anubɛ min bɛɛ ladɛnnɛ nyɔ. Wo si ma ta-mɛlan anubɛ ta-sisi la suyi rɔ. Allata gbiliyɛ si soe yamatogon ka a lakanan. 6Ata gbiliyɛ si ma ninɛ la soe ye ka a tɛgɛ telela ko ma. Nyɔ si ma kan-tina-latankanɛ la. Gbɔrɔndɛ anubɛ fɔnyɔ ti ke nyɔ ma.
Kuranko Common Language Bible © The Bible Society in Sierra Leone, 2006.