Aiseya 37
37
Nɛbi Aiseya Manyinika-Koe Mansa Hɛsakaya Bolo
(2 Mansɛnu 19.1-7)
1Mansa Hɛsakaya ya kumɛ wonu namɔɛn tumɛ min, a ya ala duruki rafara yisi-tinyɛ bolo. A tara kasa-kurɛ#37.1 Kasa-kurɛ: Mɔgɛ si kasa-kurɛ don a kan na alako ka a yira mɔgɛnu na ko anu kɔndɔfilinɛ bɛrɛkɛ! don a kan na. A tara Mari Bato-Bɔn la. 2Ilayakim min bi bolon-mafɛlɛnna wo, anubɛ Sɛbana min bi ala kɛdi-sɛbɛla wo, anubɛ saraka-masɔla-kun-tiginu wo, Mansa Hɛsakaya ya wonu nata nde, Emɔsila den Nɛbi Aiseya ma. Wonu fanan tara kasa-kurɛ la anu kan na. 3Mansa Hɛsakaya ya a fɔ anu ye ko anu ni a fɔ nde, Nɛbi Aiseya ye ko, “Tɔrɔ-tele le bi la. Ma ye tɔrɔyɛ anubɛ yarabiyi kɔrɔ bi. Ma mani de iko musi min bi mui-koe rɔ kɔnɔ sɛnbɛ sa a bolo tun den sɔrɔn tinɛ. 4Asiriya mansɛ ara ala kandɛ lana Alla-nimɛ masɔrɔn tinɛ. Alamɛ ita Mari Alla ya a masɔrɔn-kan wo lamɔɛn ka a masɔrɔnnɛ wo tɔrɔ. Woletɔ male Yakoba kegeya-toe minnu tonɛ, i ni Alla madiya ma ye.”
5Nde, Aiseya ya Mansa Hɛsakayata kilayɛ lamɔɛn tumɛ min, 6nde fanan ya n sara Mansa Hɛsakaya wara. N ko, “Ni Asiriyanu bi a fɔla ko Mari ti ke anu kisila, hali kumɛ wo ma a rakilan. 7Mari si a ma, Asiriya mansɛ ni kumɛ do lamɔɛn. Wo si a ma, anubɛ ala mɔgɛnu ni anu buri tala anuta nyamanɛ rɔ. Mari si a ma, anu ni ale mansɛ faga nyɔ rɔ.”
Mari Madiya-Koe Yuda Mansa Hɛsakaya Bolo
(2 Mansɛnu 19.8-19)
8Asiriya mansɛla kandɛ wo ya a lamɔɛn ko anuna mansɛ ara bɔ Lesi soe burɔ ka ta Libina kɛnu kɛlɛ tinɛ. Kandɛ wo tara a manyinika tinɛ. 9Asiriya Mansa Sɛnakaribu ya a lamɔɛn tumɛ min ko Sudan Mansa Teriheka ara na Iyipiti kɛlɛ-dannu na a bolo a kan ma Asiriya nyamanɛ rɔ, ale Sɛnakaribu ya kɛdi sɛbɛ Mansa Hɛsakaya ma Yuda nyamanɛ rɔ. 10Min sanɛ kɛdi wo rɔ, a ko, “Ile lanɛ ita Alla min na, wo ara a fɔ i ye ko i ti sa nde, Sɛnakaribu bole tɔ. Kɔnɔ i kana sɔn, a ni i mayuwaya. 11N bara min sigi nyamanɛ doinu ma, i wara wo lamɔɛn? I lanɛ a la ko i kunyɛ si bɔ n bolo tɔ? 12N benbanu ya Koson kɛnu nɔ anubɛ Hɛran kɛnu anubɛ Resɛfu kɛnu anubɛ Idɛn kɛnu minnu bi Tɛlasa nyamanɛ rɔ, ado wonuna bɛsɛnu ma ke anu kunkala n benba wonu bolo. 13Hamati kɛnuna mansɛ ye mintɔ? Arapadi kɛnuna mansɛ ye mintɔ? Sifafeyim kɛnuna mansɛ ye mintɔ? Hena kɛnuna mansɛ ye mintɔ? Ifa kɛnuna mansɛ ye mintɔ?”
14Kɛdi wo ke Mansa Hɛsakaya ma Yuda nyamanɛ rɔ, a ya a rakaran. A tara Mari Bato-Bɔn la ka kɛdi kɛ sa nyɔ rɔ Mari ye. 15A donta madiyali-kɛ rɔ, a ko, 16#Bɔ-Koe-Iyipiti 25.22 “E, Isirɛlata Mari Alla, ile min mayiginɛ melika filɛ muninyɛ tɛma tɔn-kenkirɛ kuma. Alla, ile le kelen pe le duninya rɔ. Ile le ya san-kole anubɛ dugu-kole dan. 17Kɔnɔ Mari, i wɔlɔ matɔlɔ ka i kolan maka. I ni a yen min bi sigila ma ma. E, Alla-nimɛ, i wɔlɔ matɔlɔ i masɔrɔn-kan la Sɛnakaribu bolo. 18Mari, bɛɛ ya a lɔn ko Asiriya mansɛnu bara nyamani-siyaman kasara 19ka anuna bɛsɛnu mintan, ado ma ya a lɔn ko Alla ma wonu na. Kɔlɔma anubɛ kuru-lɛsɛnɛ le wonu na dɔrɔn. Anu nadannɛ hadama-dan bolo la. 20I yandi, mata Mari Alla, ma tanka Asiriyanu masibɛ ma alako duninya bɛɛ ni a lɔn ko ile Mari kelen pe le Alla la.”
Mansa Hɛsakaya Yisi-Sa-Kumɛ Fɔ-Koe Mari Bolo
(2 Mansɛnu 19.20-37)
21Wo kɔma, Nde, Nɛbi Aiseya ya kilayɛ lata Mansa Hɛsakaya ma n ko, “Mari ara ila madiyalɛ yabi. 22A ko Yerusalɛm kɛnu si tɛgɛ Asiriya Mansa Sɛnakaribu rɔ ka a mayɛlɛn. 23A ko ale Sɛnakaribu mirinɛ ko a ye yon nafɛyala? A sa Isirɛlata Mari Alla-sɛnimɛ gbiliyala, 24fɔ a ye kilayɛnu nanala ka a nyɛrɛ matɔgɔ. A ko ale Sɛnakaribu ye a fɔla ko anubɛ ala kirindinu ya Lɛbanan kɔnkɔ-layan-bɛnu nɔ ka kɔlɔma-layan-bɛnu nawuya hali ka ta gbɔngbɔn-makilannɛ bɛɛ kɔrɔ. 25A ye a nyɛrɛ matɔgɔla ko a ye kɔlɔnnu sinna sibolo-gbɛrɛnu barɛnu tɔ. A ko anubɛ ala kɛlɛ-dannu bara Iyipiti bɛnu gbala anu kian la.
26“A ko ale Sɛnakaribu ma a lamɔɛn ko Marita miriya le kɛ la? Ado nfan, a ye wo dafa tinɛ le. Mari le ya sɛnbɛ di ale Asiriya mansɛ ma ka so-kunbɛnu yɛlɛma tonbɔnnu na. 27Mɔgɛ minnu bi so-kunbɛ wonu tɔ, wonu kumakɔra. Anu kilanta dɔgɔma-ma-de! Mɔgɛ wonu kun mayɛlɛmanɛ iko taraba-tele wa sɔ yerima-fɛrɛn san la.
28“Mari ko a ya Sɛnakaribu wara-koe bɛɛ lɔn, ado a ko a ya a don-woe anubɛ a bɔ-woe lɔn. Mari ko a ya a lɔn Sɛnakaribu ye diminyala a ma nya min. 29A ko a ara diminya min kɛ, Mari ara wo nya-yen. A ko a ara ala wasinteyɛ lɔn. Mari ko a si a sunyɛ-sɔgɔ-lunyɛ la ka karafɛ kɛ a dɛ ma ka a lasɛgi a gbere fɛ a bɔra kan min.”
30Wo kɔma, nde, Nɛbi Aiseya ya a fɔ Mansa Hɛsakaya ye tun ko, “Nyina, fɔ wo ya ki-fen-bananu dɔn. Yari, fɔ wo wa wonu gba-mabunsannu dɔn. Yari kɔ, wo si wola ki-fannu ki ka wola fui-fannu fui. Wonu ba ke tumɛ min, wo si wonu tɛgɛ. San sawa, ko-nya kɛnu si ma tamasere la wo ye 31ko a mɔgɛ toe min tonɛ Yuda nyamanɛ rɔ, wonu si sabati iko ki-fan min bi a suli layigila dugi rɔ pon, ka gbɔ-nyimɛ kɛ. 32Mɔgɛnu si to anu niyi la Yerusalɛm soe burɔ nyɔ kɔnkɛ kuma bawo Mari ara ban a latɛgɛla wo nya na le.”
33Nde, Nɛbi Aiseya ya a fɔ Mansa Hɛsakaya ye tun ko, “Mari ara kɛ le fɔ Asiriya mansɛ wara-koe rɔ ko a ti a kunyɛ ladon soe kɛ burɔ. A ko ka kalabɛn kelen bɛrɛn nakɛ soe burɔ yan, wo ti ma tun. Hali ala kɛlɛ-dannu ti gbɛrɛn soe ma tun! Hali ka bɔnkɛ ladɛn tarɛ fɛ anu si yɛlɛ min ma, wo ti ma anu bolo muk! 34Mari ko a nara gbere min fɛ, a ye sɛgila wo le fɛ. A ti a kunyɛ ladon soe burɔ. 35Mari ko ka a tɛgɛ ata gbiliyɛ anubɛ ata lanyiri ma a ya min kiri Mansa Dawuda ye, a si soe kɛ latanka.”
36Marita melika yigira Asiriyanuna dagɛ rɔ. A ya mɔgɔ waga kɛmɛ kelen mɔgɔ waga bi-segin ani mɔgɔ waga loli faga Asiriyanu tɔ (185,000). Bandɛ kanɛ, wonu furi taranta nyɔ. 37Woletɔ ale Sɛnakaribu sɛgira a kɔma Ninɛfa soe burɔ. 38Lunyɛ do, ale Sɛnakaribu ye ala Bɛsi Nisirɔki kɔ tinɛ tumɛ min, ala den fila Adamɛlɛki anubɛ Sarisa tara anu fa wo faga nyɔ. Wonu ya anu buri tala Ararati nyamanɛ rɔ. Ala dan do min tɔgɛ Isahadɔn, wo sigira a gbɛ rɔ.
Kuranko Common Language Bible © The Bible Society in Sierra Leone, 2006.