Aiseya 32
32
Mansa-Nyimɛ Na-Koe
1Wati do ye nala, mansɛ si taran min si mɔgɛnu namara telenbagayɛ rɔ. Ata mɔgɔ-banu si to ko-telennɛ mala. 2Anu kelen-kelennamɛ-bɛɛ si ma iko toge min si mɔgɛnu tanka bandɛ anubɛ fɔnyɔ ma. Wonu si ma iko yi-kimɛ dugu-ragbalanɛ rɔ. Anu si ma iko fara-gbilɔn-bɛ-ninɛ dugu-fafanɛ rɔ. 3Mɔgɛnu bi nyinina min ma, anuna kun-tigi wonu yɛ bɛnnɛ si to wonu ma. Anu tole rabalannɛ a lamɔɛn-koe la fanan. 4Anu si anu muin mɔgɛnu kɔrɔ ka hɛnkilimaya-koenu nadan. Anu si kusanya kumɛ manunkula. 5Wo wati rɔ, mɔgɔ-wo-mɔgɔ ti a miri ko gbiliya-koe le kuntanyɛ la, ni wo ma, ko kensunte telenta. 6Kun-takolɔn si kuntanya-kumɛ le fɔ ka a miri ko-yogomɛnu ma. A kɛ-nya anubɛ a darɔ-kan, wo bɛɛ manɛ Alla manyini-fan le la. Mɔgɛ wo ti dɔgɔma di kɔnkɔtoe ma. A ti yi di kan-nagbalatoe ma. 7Hɛnkili-tinyanɛ si kuntanya-kumɛnu fɔ ka karagbɛlɛya-koenu nadan. Anu si yanfɛ ladan alako anu si bolo-kolɔnnu tabunden foninyɛ la nya min. A si a ma, bolo-kolɔn ni foo a yoe la. 8Kɔnɔ gbiliya-mɔgɛ si ko-telennɛ ladan. A si a sɔ gben, ko-telennɛla ko la.
Kiti anubɛ Sɛgi-Koe Gbɛ Rɔ
9Wole musi minnu bi wo diya, hɔnya sa wo kan na, wo ni wo tole masɔ n kan la. 10Kaka di wo la kɔnɔ kɛ-nyɔgɔn-tumɛ yari, wo kɔndɔfilinɛ bawo kɔn-gbo fenfen ti taran wo si min nadɛn wo nyɛrɛ ye. 11Wo siginɛ ladiyɛ rɔ, hɔn sa wo la kɔnɔ wo ni yɛrɛyɛrɛn kumakɔɛ bolo. Wo ni wo gbu-makolonya ka wo buta kiri kasa-kurɛ la. 12Wo ni wo kɔgɔ ragbesi yisi-tinya bolo bawo dɔn-fen wo dɔn-fen sa wola wɔli-kɛ-tinɛnu tɔ. 13Fenfen sa nyɔnu tɔ wɔnɛ kɔma. Minnu sewanɛ nun anuna bɔnnu na wo, minnu sewanɛ anuna soenu tɔ nun wo, wo ni di wonuna ko la. 14Hali mansɛla bolon-rakolonyanɛ si to, ado wola so-karantan fanan si ma wo nya. Mɔgɛnu siginɛ bɔn minnu na anubɛ anuna kila-mafɛlɛn-bɔnnu si ma tonbɔn la. Bintɔ-sofɛlɛnu anubɛ kolo-fannu dɔrɔn si to anu de-nyinina nyɔ.
15Kɔnɔ Alla si ata Sɛnbɛ layigi ma ma tun. Dugu-gbɛlɛmɛ si yɛlɛma dugu-lamonɛ la. Ki-fannu si nɔrɔn dugu-lamonɛ rɔ. 16Telenbagayɛ anubɛ latelan si taran kan tinɛ bɛɛ rɔ. 17Yisi kimɛ anubɛ lafɛrɛ si taran nyamanɛ wo tɛngbɛnya bɛɛ rɔ bawo mɔgɛnu bi ko-telennɛ mala. 18Hɔnyɛ si bɔ Allata mɔgɛnu kan la, bɛɛ si to yisi-kimɛ anubɛ lafɛrɛ rɔ. 19Hali banda-kole wa wola gbɔngbɔnnu takerikeri ka wola soenu tinya, 20mɔgɛnu sewanɛ si to. Yi-siyaman si taran wola ki-fannu kɔrɔ. Wola kolo-fannu de-nyini-fan si siyaya.
Kuranko Common Language Bible © The Bible Society in Sierra Leone, 2006.