Aiseya 26
26
Kisi-Ko-Bɛtinu
1Wati ye nala, mɔgɛnu si to bɛti kɛ bɔla Yuda nyamanɛ rɔ.
Mala soe ragbɛlɛ.
Alla nyɛrɛ-nyɛrɛ ye ala tarɛ kumafunfanna.
2Wo ni soe tarɛ-don-dɛ laka.
I ni a ma, sibolo-telennɛ ni don,
sibole minnuna mɔgɛnu bi ko-latelennɛ kɛla, kɔni.
3Mari biranɛ minnu bolo gben,
ka a ma anu yigi la,
a ye yisi-kima-bɛrɛbɛrɛ dila wonu ma.
4La Mari la tolon!
A si to ma lakananna burubukai!
5Minnu wasinɛ, a si wonu makimɛ.
Anu siginɛ so-latankanɛ minnu tɔ, a si wonu kasara.
A si wola tara-layan-bɛ labui gbangban rɔ.
6Minnu tɔrɔnɛ, wonu si tenbi so-labuinɛ wo kuma
ka ta tagamana a kuma dafi-dafi!
7Mari ya kilɛ rakɛnya ala mɔgɔ-nyimɛ ye!
I ya a ma, anuna kilɛ latelenta.
8Ma ye i sako kɛla ka ma yigi sa ile rɔ.
Ma ye nyinina fan min bɛɛsi ma, ile le wonu kun-bira-yili la ma ye.
9A la wa fin, i sɔgɛ si n tabɔ dɔgɔma-ma-de!
Banda wa ka, a ni ma iko ma ni taran ma nyɔgɔn fɛ.
Ni ile ya duninya-mɔgɛ bɛɛ kiti, anu si a lɔn telenbagayɛ ye nya min.
10Hali i ye ko-nyimɛ kɛla karagbɛlɛnu ye,
anu ti anu degen ko-telenni-kɛ ma.
Hali mɔgɔ-telennɛnu taranta nyamanɛ kɛ rɔ,
anu bi karagbɛlɛyɛ kɛla.
Anu ma ila kabana-koe lɔn fenfen na.
11 #
Hiburunu 10.27
Mari, i yogenu ma a lɔn mumɛ, ko i si anu tɔrɔ dɛɛ!
Anu namiliya le serr, anu ni tɔrɔ.
I ya tɔrɔ-dagɛ min namara anu ye, i ni wo rawuya anu kunyɛ ma.
Ita mɔgɛnu di i ye nya min, i ni wo yira anu na.
12Mari, i wara ma lama-a-la.
Ma ara fan bɛɛ sɔrɔn i baraka le tɔ.
13Mata Mari Alla, ma taranta sibolo-gbɛrɛnu kɔrɔ nun
kɔnɔ hali wo, ma Mari kelen pe le ile la.
14Kɔnɔ ma ye minnu kɔrɔ nun, wonu bara faga.
Wonu ti beli tun.
Hali anu pulan ti bɔ bawo i wara ban anu kasarala nun.
Mɔgɔ-wo-mɔgɔ miri sa anu ma tun.
15Mari, i wara ma makofu kosɛbɛ!
I wara mala nyamanɛ da lasa belenna,
ado wo ara a ma, i wara gbiliya-belebele sɔrɔn.
16Mari, i wara ita mɔgɛnu tɔrɔ nun,
anu kɔndɔfilinɛ wati min, anu ya i matara wɛwɛ rɔ.
17Kɔnɔ Mari, i wara a ma, ma ara ma dɛ sa-a-rɔ
iko musi bui wa a lamaga.
18Hali ma ye dumɛ wo rɔ,
ma ma fenfen sɔrɔn nyɔ fɔ fɔnyɔ.
Ma ma ke mala nyamani-kunyɛ bɔla gbaran rɔ.
Fenfen ma ma munanfaga nyɔ.
19 #
Daniyɛli 12.2
Mala mɔgɛ minnu bara faga nun kɔrɔma la,
wonu niyi si sɛgi anu tɔ tun.
Anu niyi si bila anu bagbuyi rɔ.
Minnu bɛɛ ye kinɔgɔla kaburu rɔ,
wonu si kunden ka sewa-sigi sa.
Iko duri ye a diya donna gbangban rɔ nya min,
Mari fanan bi niyi lasɛgila mɔgɔ-fagani-kɔrɛnu tɔ wo nya na le.
Sɛgi-Koe Gba-Kɔrɛ Rɔ
20E, nta mɔgɛnu, wo don wola bɔnnu na ka don-dɛ balan wo nyɛrɛ ma wati-kundu-ni kɔrɔ. Wo ni wo dogon sogbe, ha Allata fondo-bɔɛ ni ban. 21Mari ye nala bɔla ata kan-tina-sɛnimɛ rɔ san-kole rɔ. A ye nala mɔgɛnu tɔrɔla dugu-kole kuma anuta hakɛla ko la. Anu ya mɔgɛ min bɛɛsi faga dogɔn tɔ, wo bɛɛ si bɔ gbɛ ma wulɔn. Minnu bara faga nun, bɔnkɛ ti a sansan wonu ya ma tun mumɛ!
Kuranko Common Language Bible © The Bible Society in Sierra Leone, 2006.