Aiseya 23
23
Sarakanɛ Wara-Koe Taya Soela Ko La
1 #
Isikiyɛli 26.1–28.19; Yowɛli 3.4-8; Emɔsi 1.9-10; Sakaraya 9.1-4; Matiyu 11.21-22; Luka 10.13-14 Sarakanɛ le kɛ la Taya kɛnuna ko la.
Wole kulun-tawɔli-kɛlɛ minnu bi kɔgɔ-yi kuma, wo ni wo dɛ bolobɔ di-kɛ-tinɛ. Wo bɔra Taya soe min tɔ, wo ara kasara pɔ! Nyɔ-bɔnnu wo, a kulun-nasɔ-tinɛ wo, wo bɛɛ ara tinya pɔ! Wo wa sɛgi ka bɔ Saiparasi tumɛ min, wo si a mankan lamɔɛn. 2Wole Saidon yilanu! Wo ni wo made diyi-kɛ la. Wola kulun-naburilɛnu bara wo ma nɔnfulu-tiginu na. 3Wonu bi anu burila kɔgɔ-yi kuma ka ta fui-fannu bi Iyipiti nyamanɛ min fɛ-yan yan na! Wonu bi fere-kɛ-tinayɛ la nyamanɛ bɛɛ rɔ.
4Ile Saidon soe. I wara yarabi pɔ! Hali kɔgɔ-yi-dumɛ-tɛmɛ ara a ban i la. Kɔgɔ-yi si a fɔ ko a ma den-wo-den sɔrɔn. A ma den-wo-den makolo.
5Iyipiti kɛnu ba a lamɔɛn ko Taya soe ara tii, anu yisi si tɔrɔ anu ma.
6Wole Tasisi kɛnu, wo ni wo dɛ sa-a-rɔ di-kɛ-tinɛ ka a tɛgɛ Taya bu-koe ma. Wo sɛgi wo warɛ Sipeni nyamanɛ rɔ. 7Bi ko ma, Taya so-diyamɛ min da ara tɛgɛ nun, ile Taya wo le kɛ la bi, wa? Mɔgɛnu ma taran bɔla soe kɛ la nun ka ta so-kurɛnu datɛgɛ? 8Duninya mumɛ bɛɛ ye so-karantan kɛ yilanu gbiliyala nun. Yon ya Taya kɛ tinya-koe rabɛn nun? 9Mari Sɛnbɛ-Bɛɛ-Tigi le ya a rabɛn. A ya ko-rabɛn-kɛ alako ka tɔn sigi ila wasinteyɛ la anubɛ ka ila mɔgɔ-banu namiliya.
10Wole Taya kɛnu,#23.10 Taya kɛnu: Min sɛbɛnɛ Hiburu-kan rɔ, wo ma gbɛ yan. Kitabu donu si Tasisi soe wara-koe fɔ, ni wo ma Sipeni. Anu si wonu tɔgɔ ratɛgɛ bawo Taya kɛnuna kulun-belebelenu denu si na nyɔ. fɔ wo wa ma sɛni-salɛnu na iko Iyipiti kɛnu bi nya min bawo kulun-nasɔ-tina woo sa wola nyamanɛ rɔ tun. 11Mari ara a kɔɛn kɔrɔbi kɔgɔ-yi dafɛ-nyamanɛnu kasara-koe la. A ara a latɛgɛ ko fɔ a wa Kenan kɛnuna so-gbɛlɛmɛnu kasara. 12Ile Saidon soe, ita sewɛ ara ban. Ila mɔgɛnu bi tɔrɛ rɔ. Hali anu ya anu buri tala Saiparasi yi-tɛma-dugi rɔ, anu kunyɛ ti bɔ gbaran rɔ.
13Wo ni wo yɛ lata Babilɔn nyamanɛ ma. Nyamani ma a la tun. Asiriyanu buira anu ma ka anuna tarɛnu nabui ka a tonbon-nɛ to. Sogo-feremɛnu denu siginɛ nyɔ gbɛ!
14Wole min bi kulun naburila kɔgɔ-yi kuma, wo ni wo dɛ bolobɔ di-kɛ-tinɛ! Wo lanɛ soe min na bɛrɛbɛrɛkɛ, wo le ara tinya kɛ la pɔ!
15San bi-wɔrɔnfila si tenbi, mansa kelenta wati, kɔni, mɔgɔ ti a miri Taya soe ma wo wati rɔ. Ni san wonu bara ban, Taya soe kɛ si ma iko anu bi yɛlɛn-musi min sigi sala ko,
16Ile yɛlɛn, keinu bara nyina ila ko la.
Ila bɔlɔn bi ka soe ratagama.
Ila siginu sa ka ila bɔlɔn fɔ
min si a ma, keinu yili ni to i ko tun!
17San bi-wɔrɔnfilɛ wo wa ban, Mari si sɔn wole Taya kɛnu ni sɛgi anuta wɔli-kɔrɔ-yogomɛ ma tun. Wo si fen-mayirɛ-kɛ duninya mumɛ ma tun. 18Wo ye tɔnɛ min bɛɛ sɔrɔnna yilayɛ rɔ, wo si a lasɛgi ale Mari ma fɔrɔsɛ la. Wo ti a lamara wo nyɛrɛ ye. Kɔnɔ wo ye Marita wɔli-kɛlɛnu sarala wodi wonu denu na.
Kuranko Common Language Bible © The Bible Society in Sierra Leone, 2006.