Aiseya 2
2
Habadan Yisi-Kimɛ Wara-Koe
(Maika 4.1-3)
1Alla ya sarakanɛ min don nde, Emɔsila den Aiseya bolo ka a tɛgɛ Yuda nyamanɛ anubɛ Yerusalɛm soela ko ma, wo le kɛ la.
2“Wati si na, Marita Bon-Sɛnimɛ sɔnɛ kɔnkɛ min kuma kɛ la,
wo si ma kɔnkɔ-layan-bɛ la ka tenbi kɔnkɛ bɛɛsi la mɔgɛ bɛɛ yala.
Sibolo-gbɛrɛ bɛɛ si na ke nyɔ.
3Anu si na a fɔ ko,
‘Ma ni Marita kɔnkɛ yɛlɛ wona ka ta ke Marita Bon-Sɛnimɛ ma, Isirɛla mɔgɛnuta Alla, kɔni.
Ma si tagama nya min, Mari si wo yira ma la iko a ye nyinina a ma nya min.
Marita karan si bɔ Yerusalɛm.
A si kuma ata mɔgɛnu ye nyɔ le.’
4 #
Yowɛli 3.10
“Mari si kɛlɛ-nyɔgɔnyɛ ban duninya-sibolenu tɛma.
Mari si yisi-kimɛ lana anu tɛma ha anu si anuna faannu yɛlɛma sɛnɛ-kɛ-dɛɛnu na.
Anu si tanbɛnu yɛlɛma wɔrɔtɛnu na.
Woletɔ duninya-mɔgɛnu ti anu tabɛn kɛlɛ-kɛ-koe ma anu nyɔgɔn kan ma.
Anu ti anu nyɔgɔn kɛlɛ tun.”
5Nba, wole Yakoba kegeyɛnu, Mari ye wan-takanɛ min dila ma ma, ma ni tagama wo rɔ.
Wasinteyɛ Ban-Koe
6E, Alla, i wara i ban ila mɔgɛnu na, Yakoba kegeyɛnu, kɔni. Nyamanɛ kɛ lafanɛ nya-nyini-kɛlɛnu na ka bɔ tele-bɔɛ wara la anubɛ Filisiti nyamanɛ rɔ. Ila mɔgɛnu bi sibolo-gbɛrɛnuna namunyɛ bila. 7Ila mɔgɛnuna nyamanɛ lafanɛ sɛnɛ anubɛ wodi-gbɛ la, ado fen-kolomɛnu ti ban anu bolo. Soeenubɛ kirindinu fanan ti ban anu bolo. 8Anuna nyamanɛ lafanɛ bɛsɛnu na, anu ya min nadan anu bole la, kɔni. Anu bi wonu kɔla.
9Hadama-dan damasi si miliya ka yarabi. Mari, i kana anu makoto mumɛ!
10 #
Lankɛnimayɛ 6.15; 2 Tɛsalonaika 1.9 Wole Isirɛla mɔgɛnu, wo ni wo dogon farannu na kɔnkɛnu tɔ. Wo ni dugu-kɔrɔ-kilɛnu sa alako wo si bɔ Marita fondo-bɔɛ kɔrɔ nya min. Wo ni wo dogon ala sɛnbɛ anubɛ ala gbiliyɛ kɔrɔ. 11Wati ye nala, hadama-dannuna wasinteyɛ si ban. Anuna nyɛrɛ-kɔrɔtɛ si kasara. A ye tola Marita gbiliyɛ kelen pe le ma. 12Wo tele wa ke, wasintenu wo, nyɛrɛ-kɔrɔtanɛnu wo, anubɛ sɛnbɛ-tiginu, Mari Sɛnbɛ-Bɛɛ-Tigi si wonu famayigi. 13A si Lɛbanan kɔlɔma-layan-bɛnu nabui anubɛ ka Basan nyamanɛ kɔlɔma-kunbɛnu bunden. 14Kɔnkɔ-layan-bɛnu anubɛ gburukulinu, a si wonu tii mɛmɛ, ka anu takɛnya. 15San-bɔnnu anubɛ so-latankanɛnuna tara-belebelenu, a si wonu nabui fugbu! 16Hali anuna kulun-belebele-hakikɛnu, a si wonu natunu yi kɔrɔ. 17-18A si hadama-dannuna wasinteyɛ ban ka anuna nyɛrɛ-kɔrɔta-fan wonu kasara. Anuna bɛsɛ wonu si tunu yen! Mari kelen pe si to gbiliyɛ rɔ wo wulun tele.
19Mari wa na dugu layɛrɛyɛrɛn tinɛ tumɛ min, mɔgɛnu si na anu dogon farannu na kɔnkɛnu tɔ. Anu bi dugu-kɔrɔ-kilɛnu sala alako anu ni bɔ Marita fondo-bɔɛ kɔrɔ. Anu bi anu dogonna ala sɛnbɛ anubɛ ala gbiliyɛ kɔrɔ. 20Tele wo wa ke tumɛ min, anuna bɛsɛ minnu nadannɛ sɛnɛ anubɛ wodi-gbɛ la, mɔgɛnu si wonu nakɛ a rɔ. Anu si wonu to tula-gbɛnu anubɛ tosɛnu ye. 21Mari wa na dugu layɛrɛyɛrɛn tinɛ tumɛ min, mɔgɛnu si na anu dogon farannu na kɔnkɛnu tɔ. Anu bi dugu-kɔrɔ-kilɛnu sala alako anu ni bɔ Marita fondo-bɔɛ kɔrɔ. Anu sɛbɛ donnɛ ka anu dogon Marita sɛnbɛ anubɛ gbiliyɛ kɔrɔ.
22Wo kana lanaya sa hadama-dan rɔ tun! Tɔnɔ-wo-tɔnɔ sa wo la.
Kuranko Common Language Bible © The Bible Society in Sierra Leone, 2006.