Hoseya 13
13
Isirɛla Mɔgɛnuna Kiti Laban Mari Bolo
1Fɔlɔ nun, ni Ifɛrɛm bɔnsɔn-mɔgɛnu kumara, wole Isirɛla bɔnsɔn-mɔgɛ toenu si kilan. Wo ya wo yɛ bɛn Ifɛrɛm bɔnsɔn-mɔgɛnu ma. Kɔnɔ bawo anu bara don Beyali kɔ-koe rɔ, wo le ya a ma, anu halaki-koe tɛgɛra. 2Hali wo, anu tora wodi-gbɛ laleela ka anu ma bɛsɛ la. Hadama-den-hɛnkili le ya wodi-gbɛ kɛ lalee, ado hadama-dan le ya a ladan. Anu ban a ladanna, anu ko, “Wo ni sarakɛ bɔ a ye de!” Min tenbira wo la, fan min nadannɛ turɛla muninyɛ la dɔrɔn, mɔgɛnu bi wonu sunbula tagbayi! 3Ka a tɛgɛ wo ma, anu si tunu yen, iko duri. Anu si ma iko fɔrɔn, fɔnyɔ ye tala min na. Anu mani de iko ta-sisi min bi bɔla nyandan-bɔn kuma.
4Mari ya a fɔ Isirɛla mɔgɛnu ye ko, “Wota Mari Alla le nde la min nara wo la ka bɔ Iyipiti nyamanɛ rɔ. Alla-gbɛrɛkɛ fenfen sa wo bolo nde kɔma, ado wola kisilɛ le nde kelan la. 5#Tɔn-Fɔɛ-Fila-Nyɔgɛ 8.11-17 Nde le ya wo fɛ-bira wula-magbalanɛ rɔ. 6Wo kenɛ nyamani-hakikɛ kɛ rɔ, wo makoe bɛɛ nyinyara ha wo wasara. Wo kɔma, wo wasira ka nyina nde, Mari ko. 7Woletɔ n si kɛ wo ma iko yarɛ. N si wo makɔni kilɛ la iko kuli. 8N si kɛ wo ma iko sogo-ferema-yuwan, ala dan wa tunu a ma. A si wo buyi laka. A ye kɛla wo ma kan min, a ye wo dɔnna nyɔ le sa! N si wo rafarafara iko sogo-dalamɛ si a ma nya min.
9“N si wole, Isirɛla mɔgɛnu kasara pɔ! Wo wa ma, yon si wo dɛnbɛ gbɛ? 10#1 Samuwɛli 8.5-6 Wo ya a fɔ nun ko wo ye nyinina mansɛ anubɛ kun-tiginu ma kɔnɔ wonu si ke wo lakisila kama? 11#1 Samuwɛli 10.17-24; 15.26 Hali n kɔrɔtɔnɛ, n sɔnta wola mansaya-koe ma. Wo kɔma, n ya mansaya-koe bɔ wo tɛma fanan nta kɔrɔtɔ kelan wo la.
12“Wo sɔn anubɛ wo hakɛ ara sɛbɛ nun, bi ko ma. A bɛɛ lamaranɛ kan tinɛ do rɔ, yanba ti yalan anu ma kan min. 13Wole Isirɛla mɔgɛnu, fɛrɛ ye wo bolo, wo ni to wo niyi la kɔnɔ wo sa sɔnna fɛrɛ wo la. Wo mani de iko dan min sɔrɔn-wati ara ke kɔnɔ a ni a ban bɔ-koe ma fɔnyɔ la. 14#1 Kɔrɛnti 15.55 Nde, Mari ti wo kunyɛ bɔ lakira bonda-dɛ la, ni wo ma, ka wo bɔ sayɛ sɛnbɛ kɔrɔ tun! Ile sayɛ, i ni na ila fitinɛ la i bolo. Ile lakira, na ila kasarɛ la. Nde, Mari ti kinikini wo ma. 15Hali wo sabatira iko binyɛ, n si fɔn-kalamɛ lana ka bɔ tele-bɔɛ wara la min si wola kɔlɔnnu anubɛ wola tenkenu tagbala todo! Wola fen-kolomɛnu namara tinɛnu ta si kolonya filili! 16Wola Samariya so-karantan si tɔrɔ ka a tɛgɛ ala murutiyɛ ma nde, Alla ma. Wole Samariya kɛnu kunyɛ si to kɛlɛ rɔ ka wola dannu gbesi dugi la ka wola musu-kolomɛnu buyi laka faan la.”
Kuranko Common Language Bible © The Bible Society in Sierra Leone, 2006.