Hoseya 11
11
Allata Keninteya-Yira-Koe Ala Mɔgɔ-Murutiyanɛnu Na
1 #
Bɔ-Koe-Iyipiti 4.22; Matiyu 2.15 Mari ko, “Fɔlɔ nun, wole Isirɛla bɔnsɔn dɔgɔ tumɛ min, wo diyara n ye iko n halala-dan!
N ya wo kele ka bɔ Iyipiti.
2N bi wo kelela nya min,
wo ye wo kan-kɔ sɔla n na wo nya na le.
Wole nta mɔgɛnu ya sarakɛnu bɔ wola bɛsi Beyali ye
ka isɛnti mintan wola bɛsɛ doi wonu ye.
3Hali wo, nde ya wole, Isirɛla mɔgɛnu tɛtɛ.
N ya wo bi ka wo sigi n kɔnkɔn tɔ
kɔnɔ wo ma n wɔli-nyima lɔn.
4N ya wo madon n na kinikinɛ anubɛ keninteyɛ la
ka wo sigi n kian kuma ka wo mayɛgɛyɛgɛ.
N ya n mayigi wo ye ka wo de-nyini.
5“Wo ya wo ban wo ya-lamununna n na woletɔ n ko fɔ wo wa ta Iyipiti,#11.5 Iyipiti: Anu ba a fɔ Iyipiti, anu bi a sankala Asiriya ma. ado fɔ Asiriya wa sigi wo kun na. 6Kɛlɛ si wola soe tarɛ don-dɛnu keri ka wola soenu ban fegba! N si wole nta mɔgɛnu tɔrɔ bawo wo miri ko wo ye tonyɛ le tɔ. 7Ka wo kan-kɔ sɔ n na, wo nɔrɔnɛ wo ma fatifati! Wo si to gbele-gbelenna ka a tɛgɛ dunɛ wo ma min siginɛ wo kuma kɔnɔ mɔgɔ-wo-mɔgɔ ti dunɛ wo bɔ wo kuma.
8 #
Tɔn-Fɔɛ-Fila-Nyɔgɛ 29.23
“N si ile Isirɛla don bolo tɔ kama?
N si wo boloka kama?
N si wo kasara kama
iko n ya a ma nya min Adima anubɛ Sebom soe la?
N ti sɔn wo kasara-koe ma.
Nta keninteyɛ da rakolo wo ye.
9N ti wo tɔrɔ nta diminya-belebele la.
N ti Isirɛla kasara tun
bawo nde, Alla le, hadama-den ma.
Nde sɛninyanɛ wo tɛma,
ado n diminyanɛ ti na wo wara.
10“N ba nyɛɛ wo yogenu ma iko yarɛ min bi wɔrɔndɔla, wo si bila n fɛ. Wo si wo buri nala ka bɔ tele-yigi wara la. 11Wo burimatoe si na ka bɔ Iyipiti anubɛ Asiriya nyamanɛ rɔ iko kangbɔɛ. N si a ma, bɛɛ ni sigi a halala-soe rɔ. Nde, Mari nyɛrɛ kan le kɛ la.”
Isirɛla anubɛ Yuda Kiti-Koe Mari Bolo
12Mari ko, “Wole Isirɛla mɔgɛnu bara n nafoo foninyɛ anubɛ yanfanteyɛ la. Ha bi, Yuda mɔgɛnu murutiyanɛ nde, Alla-sɛninyanɛ ma, lanaya-tigi, kɔni.
Kuranko Common Language Bible © The Bible Society in Sierra Leone, 2006.