Habakuku 3
3
Alla Matara-Koe Nɛbi Habakuku Bolo
1Nɛbi Habakukuta mataralɛ le kɛ la.
2Mari, i wara koe min bɛɛsi ma nun, n bara wonu namɔɛn.
N bara kawa wonuna ko la.
I taranta ko-makawanɛ minnu kɛla nun,
a sɔgɛ ye n na, i ni wonu ma tun mata wati kɛ rɔ.
Hali i fonde bɔnɛ, i ni kinikini ma ma.
3Ile Alla ye nala tun ka bɔ Idɔm nyamanɛ rɔ.
Ile Alla min sɛnima, ile si na ka bɔ Paran kɔnkɔ#3.3 Idɔm anubɛ Paran: Alla fɔlɔn ya a ma, Isirɛla mɔgɛnu ya ale Alla lɔn kan-tina filɛ kɛnu tɔ. nyamanɛ rɔ.
Duninya anubɛ san-kole lafanɛ ile Allata kinyɛ la
min si a ma, mɔgɛ bɛɛ ni i tanto dugu-kole bɛɛ kuma.
4I namatoe-mɛnsan ye tiila i ma iko san-sɛran.
Ile Allata fanka-dogonnɛ i kɔɛn min tɔ, wo mɛnsan ye tiila i ma.
5I si kiraya-fitinɛ lata i yarɔ.
Sayɛ si ile sagaran.
6Ile Alla wa dan kan min, dugu si yɛrɛyɛrɛn nyɔ rɔ.
Hali i wa i kolan tɔnkɔn sɔ minnu na, wonu kun ma si kɔ.
Kɔnkɛ minnu bara mɛ, wonu si tii nya-kun-kelen ka ma lɛɛ la.
Hali i wara i tontɛ sɔ kɔnkɛ minnu kuma nun, wonu fanan si tii mɛmɛ!
7N ya a yen nna ko-rayirɛ rɔ, Kusan-kebila-mɔgɛnu bi kilanna dɔgɔma-ma-de!
Midiya kɛnu bi yɛrɛyɛrɛnna kilan bolo.
8Mari, ila fondo-bɔɛ le ya a ma, i ya yinu gbesi a rɔ
ka kɔgɔ-yi fara?
I kɔrɔtɔnɛ anu ma, wa?
Ade, i nara i mayiginɛ banda-finyɛnu kuma
ka nɔlɛ di ila mɔgɛnu ma.
9I ya banda-nyin-masɔgɛ rabɛn i yogenu bon-koe la.
Ila yinu bara dugi rafara warr!
10Kɔnkɛnu bara i yen tumɛ min, anu tora yɛrɛyɛrɛnna.
San-kole ya a dɛ bɔ banda-yi kɔrɔ.
Yi min bi dugu kɔrɔ, wo ya dugi punsɔgɔ kurɔn bolo.
A tora tugula a rɔ.
11 #
Yasowa 10.12-14
Ila banda-nyin-masɔgɛ-mɛnsan tenbi tiila a ma,
ado anu bi malan-malanna,
wo kɔma, tele anubɛ karɛ tora sɔni anu gbɛ rɔ.
12I fondo-bɔnɛ ya duninya ratɛgɛ i sako la.
I fondo-bɔnɛ ya sibolo-gbɛrɛnu nunku i tontɛ la.
13I tara ila mɔgɛnu nakanan-tinɛ
ka ta ila mansa-yabɔnɛ kisi.
Mɔgɛ minnu karagbɛlɛ, i wara wonuna kun-tigi kasara
ka a gba-fɛ-bilalɛnu halaki pɔ!
14Anuna kɛlɛ-dannu nara ma kan ma tumɛ min iko fɔnyɔ ka ma ranyɛnsɛn,
anu bara anu nyɛrɛ kɔrɔbi iko minnu bi bolo-kolɔnnu tɔrɔla dogɔn tɔ
kɔnɔ ila banda-nyin-masɔgɛ donta anuna kɛlɛ-den-kunyɛ rɔ pirin!
15Ila soeenu ya kɔgɔ-yi ratɛntɛn
ha a kanfara.
16N ya kɛ damasi lamɔɛn tumɛ min, n kumakɔra.
N da-gbole tora yɛrɛyɛrɛnna kumakɔɛ bolo.
N kolenu mara yɔrɔyɔrɔ!
N kiannu tora yɛrɛyɛrɛnna n kɔrɔ sigisigi!
Kɔnɔ n si n tade ka ma yogenu tɔrɔ-tele makɔnɔ Mari bolo.
17Hali toro-gbɔ sa a la,
hali nɔnbɔ-gbɔ sa a la,
hali ɔlifi-gbɔ sa a la,
hali ki-fen sa mala-a-la ma bolo,
hali mala sagɛ dama fagara,
mala wɔrɛ ta ni kolonya
18kɔnɔ hali wo, n si nyagalen ka sewa
bawo Mari Alla le nna kisilɛ la.
19 #
2 Samuwɛli 22.34; Yaburi 18.33 Ma tigi Mari le n sɛnbɛ la.
A ya n kian banban dugi ma iko mina
ka n nakanan kɔnkɛnu kuma.
Kuranko Common Language Bible © The Bible Society in Sierra Leone, 2006.