Bɔ-Koe-Iyipiti 34

Tɔn-Walan-Kurɛ Sɛbɛ-Koe

(Tɔn-Fɔɛ-Fila-Nyɔgɛ 10.1-5)

1Mari ya a fɔ Musa ye ko, “I ni kuru-walan filɛ lɛsɛ iko a fɔlɔtɛ. I ya kuru-walan fɔlɔtɛ minnu tatii, nta kumɛ minnu sɛbɛnɛ wonu ma, n si wonu sɛbɛ kɛnu ma tun. 2I rabɛn ka n taran Sinayi kɔnkɛ kuma sɔgɔma. 3Mɔgɔ-wo-mɔgɔ kana yɛlɛ i fɛ hali ka taran kɔnkɛ bu la. Hali wola kolo-fannu kana anu de-nyini kɔnkɛ kɛ kɔrɔ.”

4Musa ya kuru-walan filɛ lɛsɛ iko a fɔlɔtɛnu. A ya kuru-walan filɛ wonu bi ka yɛlɛ Sinayi kɔnkɛ kuma sɔgɔma iko Mari ya a fɔ a ye nya min. 5-6#Bɔ-Koe-Iyipiti 20.5-6; Yilan-Yilan Koe 14.18; Tɔn-Fɔɛ-Fila-Nyɔgɛ 5.9-10; 7.9-10 Mari ya ala kumɛ latɔnbagaya. A yigira banda-fin-gbɛ wo rɔ ka tenbi Musa yakɔrɔ. A ya a sereka-tɔgɛ fɔ a ye ko, “Mari le nde la. Kinikini mansɛ le nde la. N ti diminya yona. Keninteyɛ waranɛ n tɔ. Telenbaga le nde la. 7N si nta nyimayɛ yira mɔgɔ waga siyaman na. N si mɔgɛnu makoto anuna hakɛ-yogomɛnu na. Hakɛ-tigi minnu si anu ban n na, n si wonu tɔrɔ. Hali anuna dannu ha ka ta a sigi anu tolo-birɛnu na anubɛ anu tolo-bira-sɔɛnu, n si wonu fanan tɔrɔ.”

8A ma mɛ, Musa ya a madu dugi ma ka Mari bato. 9A ko, “E, Mari, ni n di i ye, i yandi, i ni ta ma tɛma kamasɔrɔn ila mɔgɛ kɛnu tengberenta. I ni mala yogoyɛ anubɛ mala hakɛ makoto ka ma ma i halalɛ la.”

Lanyiri Fɔ-Koe Tun ka A Banban

(Bɔ-Koe-Iyipiti 23.14-19; Saraka-Masɔlɛnuta Tɔnnu 23.4-44; Tɔn-Fɔɛ-Fila-Nyɔgɛ 7.1-5; 16.1-17)

10Mari ko, “Mabɛ Isirɛla mɔgɛnu si lanyiri kiri ma nyɔgɔn tɛma bi. N si ko-makilannɛnu ma ila mɔgɛnu yala, kebi duninya danta min nyɔgɔn ma ma wɛ mɔgɛnu yala. N bi nala nta kabana-koe minnu mala wo ye, ita mɔgɛ minnu bi i fɛ, wonu bɛɛsi si wonu yen anu yɛ la. 11N bi min bɛɛsi fɔla wo ye bi, wo ni wonu ma. N si Amoranu anubɛ Kenannu anubɛ Hɛtinu anubɛ Perasanu anubɛ Hefanu anubɛ Yebusinu gben wo yarɔ. 12Wo ni a ma wo fɛrɛma wo nyɛrɛla ko la. Wo ye tala kan tinɛ min, wo kana lanyiri kiri nyamanita-mɔgɛ wonu ye alako anu kana ma gbɛrɛ la wo ye. 13#Tɔn-Fɔɛ-Fila-Nyɔgɛ 16.21 Yanni wo ni wo ma, wo ni anuna saraka-mintan-tinɛnu tinya. Anu bi kuri minnu kɔla, wo ni wonu takerikeri. Anu bi anuna bɛsɛ min kelela Asura,#34.13 Asura: Anu ya kɔlɔma le lɛsɛ ka a ma musila muninyɛ la. Bɛsɛ wo tɔgɛ le Asura. wo ni wo tinya. 14Wo kana alla-dogbɛrɛ kɔ bawo wota Mari Alla le nde la min si wo makeliya. N ti sɔn n senɛ ma.

15“Wobɛ nyamanita-mɔgɛ wonu kana lanyiri kiri wo nyɔgɔn tɛma. Wo kana sarakɛnu bɔ anuta allanu ye bawo anu donu si wo kele saraka dɔn tinɛ. 16Wo ni a ma wo fɛrɛma. Wo kana sɔn anuna dunmusinu furula wola den-keinu ye kamasɔrɔn wonu ba don anuna bɛsi-kɔɛ rɔ tumɛ min, anu kana wola den-keinu kɔndɔfili ka anu nadon anuna bɛsi-kɔ-koe rɔ. 17#Bɔ-Koe-Iyipiti 20.4; Saraka-Masɔlɛnuta Tɔnnu 19.4; Tɔn-Fɔɛ-Fila-Nyɔgɛ 5.8; 27.15 Wo kana fenfen nalee ka a ma bɛsɛ la wo nyɛrɛ ye wo si min kɔ.

18 # Bɔ-Koe-Iyipiti 12.14-20; Saraka-Masɔlɛnuta Tɔnnu 23.6-8; Yilan-Yilan Koe 28.16-25 “Wo ni Biredi-Yɛlɛbɛlɛ-Dɔn-Ladɛn kɛ. Wo ni to biredi-yɛlɛbɛlɛ dɔnna tele wɔrɔnfila kɔrɔ a wati-latɛgɛnɛ rɔ Abibu#34.18 Abibu: Anuta Abibu karɛ wo mara anuta karɛ fɔlɔtɛ la san la. Kurankɔɛnu si a fɔ ko “Bafuyi,” ni wo ma, “Taraba-tele.” Tubabu-kan rɔ, “April.” karɛ la iko n ya a fɔ wo ye nya min. Wo si ladɛn wo kɛ karɛ wo ma kamasɔrɔn wo bɔra Iyipiti nyamanɛ rɔ karɛ wo le la.

19 # Bɔ-Koe-Iyipiti 13.2 “Wo kɔma, ni musu-wo-musu ya den-kei fɔlɔtɛ sɔrɔn, ntɛ le dan wo la, hali a mara wola kolo-fannuta den fɔlɔtɛ la, a keimɛnu, kɔni. Kɔnɔ wo ni wola den-keinu kunka. 20#Bɔ-Koe-Iyipiti 13.13 Ni sofɛlɛ le, wo ni anuna den fɔlɔtɛnu kunka saga-dannu na. Ni wo ma sofɛli-dan wonu kunka, wo ni anu kan keri.

“Mɔgɔ-wo-mɔgɔ bolo lakolɔn kana ta nta ladɛn wonu kuma.

21 # Bɔ-Koe-Iyipiti 20.9-10; 23.12; 31.15; 35.2; Saraka-Masɔlɛnuta Tɔnnu 23.3; Tɔn-Fɔɛ-Fila-Nyɔgɛ 5.13-14 “Wo ni wola wɔlɛ kɛ tele wɔrɔ kɔrɔ kɔnɔ a tele wɔrɔnfila nyɔgɛ ma, wo ni wo sulen, hali sɛnɛ-sa-wati le anubɛ ni a tɛgɛ-wati le, wo ni wo sulen tele wo ma.

22 # Saraka-Masɔlɛnuta Tɔnnu 23.15-21, 39-43; Yilan-Yilan-Koe 28.26-31 “Wo ni Dɔn-Fen-Kun-Fɔlɛnu-Tɛgɛ-Ladɛn kɛ, wo wa wola dɔn-fen-kun-fɔlɛnu tɛgɛ wati min. Wo wa ban wola dɔn-fannu tɛgɛla wati min, wo ni Lele-Sɔɛ-Ladɛn fanan kɛ. 23-24N ba ban sibolo-gbɛrɛnu gbenna wo yarɔ ka wola nyamanɛ lakoloya tumɛ min, kei bɛɛsi ni ta n bato tinɛ san-bo-san iko sawa. Wo tenbi ladɛn wonu tɔ tumɛ min, wo hɛnkili la ni tɛgɛ ko nde, Alla si a ma, wo yogenu ti wola nyamanɛ bi wo bolo wo kɔma kilɛ la.

25 # Bɔ-Koe-Iyipiti 12.10 “Wo tenbi kolo-fen-sarakɛ dila nde ma tumɛ min, wo kana anubɛ biredi di nde ma nya-kun-kelen isiti ye min tɔ. Wo kana saraka-sogo-toe to ha sɔgɔma Kanan-Ko-Ladiyɛ kuma.

26 # Tɔn-Fɔɛ-Fila-Nyɔgɛ 24.21; 26.2 “Wo ni wola dɔn-fen kun-fɔlɛ, a kiri fɔlɔtɛ di nde, Mari Alla ma.

“Wo kana baa-dan te a na kin-yi la.”#34.26 Kin-yi: Sibolo-gbɛrɛkɛ-mɔgɛnu si a ma wo nya, woletɔ a ti bɛn Allata mɔgɛnu ni sanka anu ma.

27Mari ya a fɔ Musa ye ko, “I ni nta kumɛ kɛnu sɛbɛ kamasɔrɔn n bara lanyiri min bɛɛsi kiri mabɛ Isirɛla mɔgɛnu tɛma bi, wo bɛɛ ye tɔn kɛnu tɔ.” 28Musa tora Mari fɛ nyɔ su bi-nani, tele bi-nani. A ma fen dɔn. A ma yi min. Alla ya tɔn wonu sɛbɛ kuru-walan wonu ma, Tɔn Tan, kɔni.

Musa Bɔ-Koe Kɔnkɛ Kuma

29-30 # 2 Kɔrɛnti 3.7-16 Musa ye Sinayi kɔnkɛ yigila tumɛ min tɔn-walan filɛ wo la a bolo, a yakɔrɛ ye malan-malanna kamasɔrɔn a kumara Mari fɛ. Aruna anubɛ Isirɛla mɔgɛ bɛɛ ya anu yɛ lata Musa ma tumɛ min, anu ya a yen a yakɔrɛ ye malan-malanna. Anu kilanta anu madonna a la kɔnɔ ale Musa ma a lɔn a yakɔrɛ ye malanna. 31Wo kɔma, Musa ya Aruna anubɛ kun-tiginu kele tumɛ min, wonu tara a wara. Musa kumara anu ye. 32Woletɔ Isirɛla mɔgɛ bɛɛsi ya anu madon a la. Mari ya kumɛ min bɛɛsi fɔ Musa ye Sinayi kɔnkɛ kuma, a ya wo bɛɛsi latenbi mɔgɛnu ma.

33Musa banta wo bɛɛsi fɔla anu ye tumɛ min, a ya kurɛ burun a yɛ la. 34Kɔnɔ Musa tenbi Marita Fani-Bɔn la tumɛ min, a si kurɛ wo bɔ a yɛ la Mari yakɔrɔ. Alla wa kumɛ minnu fɔ a ye nyɔ, a si bɔ ka wonu fɔ Isirɛla mɔgɛnu ye. 35Isirɛla mɔgɛnu ba Musa yakɔrɔ-malannɛ wo yen tumɛ min, a si kurɛ wo burun a yɛ la tun. A si to a mala wo nya tuma-wo-tuma.

Currently Selected:

Bɔ-Koe-Iyipiti 34: KCLB

Highlight

Copy

Compare