Bɔ-Koe-Iyipiti 32

Ninki-Danla Muninyɛ Ladan-Koe

(Tɔn-Fɔɛ-Fila-Nyɔgɛ 9.6-29)

1 # Kɛwɔlɛnu 7.40 Mɔgɛnu ya a yen tumɛ min ko Musa ara mɛ Sinayi kɔnkɛ kuma, anu ya anu kundɛn Aruna dafɛ. Anu ya a fɔ a ye ko, “Musa min nara ma la ka bɔ Iyipiti nyamanɛ rɔ, ma ma a lɔn min bara ma a la. I lasɔ ma fɛ ka bɛsɛ do ladan ma ye min si sɔ ma yarɔ.”

2Aruna ya a fɔ anu ye ko, “Sɛnɛ minnu bi wola musinu anubɛ wola dannu tole la, wo ta wonu bi. Wo ni na anu na n bara.” 3Anu nara sɛnɛ-tolola-fan wonu na ka anu don Aruna bolo. 4#1 Mansɛnu 12.28; Kɛwɔlɛnu 7.41 A ya wonu bira anu bolo ka anu lee ka a ma ninki-danla muninyɛ la.

Isirɛla mɔgɛnu ya a fɔ ko, “E, mata bɛsɛ le kɛ la min nara ma la ka bɔ Iyipiti nyamanɛ rɔ.”

5Aruna ya wo yen tumɛ min, a ya saraka-mintan-tinɛ sɔ ninki-danla muninyɛ wo yarɔ. A ya a fɔ anu ye ko, “Nba, sinan tele si ma ladiya-tele la Mari ye.” 6#1 Kɔrɛnti 10.7 Bandɛ kanɛ, anu suruta nala saraka-mintantɛnu anubɛ yisi-kima-sarakɛnu na. Anu ya anu de-nyini ka anu min. Wo kɔma, musi wo, kei wo, anu ya bolola-tolɔn dabira.

7Anu bi wo kun na, Mari ya a fɔ Musa ye kɔnkɛ kuma ko, “I buri yigila kamasɔrɔn i wara na mɔgɛ minnu na ka bɔ Iyipiti nyamanɛ rɔ, wonu bara yɛlɛma ka yogoya. 8N bara kilɛ min yira anu na, anu bara bɔ wo fɛ tiriya! Anu bara ninki-danla muninyɛ ladan ka a kɔ ka sarakɛnu bɔ a ye. Anu bi a fɔla ko anuta bɛsɛ le wo la min nara anu na ka bɔ Iyipiti nyamanɛ rɔ.”

9Mari ya a fɔ Musa ye tun ko, “N bara mɔgɛ kɛnu yen. Anu tole gbɛlɛ dɔgɔma-ma-de! 10Woletɔ i kana n nakala. Nta diminyɛ si wara anu kuma ka anu ban sa! N si ile ma bɔnsɔn kurɛ dabirɛ la.”

11 # Yilan-Yilan Koe 14.13-19 Musa ya ata Mari Alla madiya. A ko, “Mari, i wara ila mɔgɛ minnu nabɔ Iyipiti nyamanɛ rɔ ita sɛnbɛ-wɛ la, ila diminyɛ si wara wonu kuma nfen na? 12Ni i ya wo ma, Iyipiti kɛnu si a fɔ ko i ya mɔgɛ kɛnu nabɔ nyɔ alako i ni anu ban dugu-kole kuma. I yandi, i fonde yɛlɛma ka kinikini anu ma. I ye nala ko-yogomɛ min mala anu na, i yandi, i kana wo ma anu na. 13#Ko-Dabirɛnu 22.16-17; 17.8 I miri ila wɔli-kɛlɛnu ma, Iburayima wo, Isiyaka wo, anubɛ Yakoba. I ma lanyiri kiri anu ye nun ko i si anu bɔnsɔn siyaya iko sanma-lolenu? I ma lanyiri kiri anu ye nun ko i si lanyiri-nyamanɛ wo di anu ma ka nyamanɛ wo ma anu halalɛ la?”

14Wo le ya a ma, Mari ya a fonde yɛlɛma. A ma ala mɔgɛ wonu kasara tun.

15-16Wo kɔma, Musa ya kuru-walan filɛ wonu bi Marita tɔn sɛbɛnɛ min tɔnkɔn filɛ ma. Alla nyɛrɛ le ya kuru-walan wonu nadan ka ala tɔnnu sɛbɛ wonu ma. Musa ye kɔnkɛ wo yigila tumɛ min ka ta mɔgɛ wonu taran, 17Yasowa ya mɔgɛnu sɔnkɔ-sɔnkɔ-kan lamɔɛn. A ya a fɔ Musa ye ko, “A manɛ iko mɔgɛnu bi kɛlɛla dagɛ rɔ.”

18Musa ko,

“Ka na a fɔ anu bara mɔgɛnu nɔ kɛlɛ rɔ, wo sɔnkɔ-kan ma kɛ la,

ka na a fɔ kɛlɛ ara mɔgɛnu bira, wo sɔnkɔ-kan ma kɛ la.

Kɛ mani de iko sigi-sa-kan.”

19Musa gbɛrɛnta dagɛ ma tumɛ min, a ya ninki-danla muninyɛ yen anubɛ dɔn-kɛlɛnu. A diminyara ha ka a dan-natenbi. A ya kuru-walan filɛ wonu fɛrɛn dugi la. Wonu tatiira nyɔ kɔnkɛ wo kɔrɔ. 20Musa ya ninki-danla muninyɛ wo bi ka a lakɛ tɛ rɔ. Wo mintanta tumɛ min, a ya a bunden ka a munke kɛ yi rɔ. A ya yi wo di Isirɛla mɔgɛnu ma ko fɔ anu ni wo min.

21Musa ya a fɔ Aruna ye ko, “Mɔgɛ kɛnu ya nfen ma i la ha i wara anu nadon hakɛ sufa kɛ rɔ?”

22Aruna ko, “I yandi, hali i ma diminya n ma. I ya a lɔn ko mɔgɔ kɛnu sɔn ma kin. 23Anu ya a fɔ n ye ko ile Musa min nara anu na ka bɔ Iyipiti nyamanɛ rɔ, anu ma a lɔn min bara ma ile la. Woletɔ anu nara n bolo labira ko n ni bɛsɛ ladan anu ye min si sɔ anu yarɔ. 24Woletɔ n ya a fɔ anu ye ko anu ni na anuna sɛnɛnu na. Anu ya anuna sɛnɛnu don n bolo. N ya anu sa tɛ rɔ tumɛ min, ninki-danla muninyɛ kɛ bɔra a nyɛrɛ ma.”

25Musa ya a yen Aruna ma ala kun-tigiyɛ lawɔli a kin na, woletɔ Isirɛla mɔgɛnu bara murutiya ha anu bara ma yɛlɛnma-fan la anu yogenu yala. 26Musa ya a sɔ dagɛ don-dɛ la, a ko, “Ni minnu bi Marila kilɛ fɛ, wonu ni na n bara.” Lifayi bɔnsɔn bɛɛsi tara a wara.

27Musa ya a fɔ anu ye ko, “Isirɛla mɔgɛnuta Mari Alla ko wo kelen-kelennamɛ-bɛɛ ni ala faan bi ka ta dagɛ kan tinɛ bɛɛ rɔ. Wo ni ta wo na-kelen-nyɔgɛnu anubɛ wo diyana-mɔgɛnu faga tinɛ.” 28Lifayi bɔnsɔn ya a ma iko Musa ya a fɔ anu ye nya min. Mɔgɔ waga sawa nyɔgɔn sufa fagara wo wulɔn tele rɔ.

29Musa ko, “Wo ara wo nyɛrɛ di Mari ma bi. A si duwa wo ye kamasɔrɔn wo ara wo na-kelen-nyɔgɛnu faga.”

30Wo banda kɛ, Musa ya a fɔ Isirɛla mɔgɛnu ye ko, “Wo ara bila Alla la kɔnɔ hali wo, n si ta Mari wara kɔnkɛ kuma kaka ka madiyali kɛ wole ye min tora. N si n taya. Tumado Mari si wo makoto.”

31Musa yɛlɛta Mari wara kɔnkɛ kuma. A ko, “E, Mari, mɔgɛ kɛnu bara hakɛ-belebele-wɛ kɛ ka sɛnɛ ladan ninki-danla muninyɛ la 32#Yaburi 69.28; Lankɛnimayɛ 3.5 kɔnɔ ni i sɔnta ka anu hakɛ makoto, wo kin. Ni i ti sɔn, i yandi, i ni nde fanan tɔgɛ firan ila buku ma.”

33Mari ya a fɔ Musa ye ko, “Ni mɔgɔ-wo-mɔgɔ ya hakɛ kɛ ka bila nde la, n si wo tɔgɛ firan nta buku rɔ. 34Woletɔ n bara kan tinɛ minna ko fɔ i ye nun, i ni ta nyɔ kaka. I ni sɔ mɔgɛnu yarɔ ka ta nyɔ. Nta melika dɔrɔn si sɔ i yarɔ. Hali wo, wo wati si na, n si anu tɔrɔ anu hakɛla ko la.”

35Mari ya kiraya-fitinɛ lana mɔgɛnu kuma ka a tɛgɛ ninki-dan wola muninyɛ ladan-koe ma Aruna ya min nadan anu ye.

Currently Selected:

Bɔ-Koe-Iyipiti 32: KCLB

Highlight

Copy

Compare