Bɔ-Koe-Iyipiti 29

Saraka-Masɔlɛnu Dantɛgɛ-Koe Alla Ma

(Saraka-Masɔlɛnuta Tɔnnu 8.1-36)

1“I wa wuli Aruna anubɛ ala dannu dantɛgɛla nde, Alla ma saraka-masɔ-wɔlɛla ko la tumɛ min, i si na sarakɛ kɛnu na, tura-bulan kelen anubɛ saga-yigi fila, fɛɛ sa minnu na. 2I ni dɛgɛ-munku-hakikɛ do bi ka a ma biredi anubɛ keki la n ye, isiti sa minnu tɔ. Biredi tɔnkɔn kelan, tuli ni taran wo rɔ, a tɔnkɔn kelan, tulu kana taran wo rɔ. Wo ni tuli susa keki wonu ma. 3I ni biredi anubɛ keki wonu sa sende kelen tɔ ka wo ma sarakɛ la n ye, anubɛ tura-bulan anubɛ saga-yigi fila. 4I ni ta Aruna anubɛ ala den-keinu na Fani-Bɔn tenbi-bolɔn la ka anu ku yi la nyɔ. 5I ni anuna kurɛ wonu bi ka duruku-kɔrɔ-don bila Aruna kan na anubɛ duruku-ba-wɛ anubɛ saraka-masɔlɛta kura-kundi-fugbɛ anubɛ a buta-kiri-fan anubɛ kɔgɔ-dala-kurɛ, ka wo damasi don a kan na. 6I ni saraka-masɔla-wɛta fulɛ don a kunyɛ la ka sɛnɛ-fagbatarɛ kiri fulɛ wo ma. 7I ni dantɛgɛ-tuli do bi ka a kɛ a kunyɛ rɔ, ka a dantɛgɛ nde, Mari ma. 8I ni ta Arunala den-keinu fanan na ka saraka-masɔ-durukinu bila anu kan na. 9I ni Aruna anubɛ ala den-keinu butɛ kiri buta-kiri-fannu na ka saraka-masɔ-fulɛnu don anu kunyɛ la. Saraka-masɔ-wɔlɛ si ma habadan-tɔn la anu ye.

“I ni Aruna anubɛ ala den-keinu dantɛgɛ nde, Alla ma ka le.

10“I ni ta turɛ wo la Fani-Bɔn tenbi-bolɔn la ka a ma Aruna anubɛ ala den-keinu hakɛ-sarakɛ la. Anu ni anu bole sa turɛ wo kunyɛ ma. 11I ni a kan natɛgɛ Fani-Bɔn tenbi-bolɔn wo la. 12I ni ta turɛ wo yele la kata burɔ ka do sisa saraka-bɔ-tinɛ a bolon nanɛ ma i bolo-nɔlɔnɛ la ka a yele-toe rawuya dugi ma saraka-mintan-tinɛ kɔrɔ. 13I ni a burɔ-kɛɛn bɛɛ bi anubɛ a benya-bɛrɛ anubɛ a kɔ-kili filɛ anubɛ anu kɛɛnnu ka wo bɛɛsi mintan saraka-mintan-tinɛ kuma hakɛ-sarakayɛ la. 14I ni turɛ wo soge anubɛ a gbole anubɛ a nuginu bi ka anu mintan dagɛ kɔma.

15“I ni saga-yigi kelen fanan bi ka wo ma saraka-mintantɛ la nde, Mari ye. Aruna anubɛ ala den-keinu ni anu bole sa a kunyɛ ma. 16I ni saga-yigi wo kan natɛgɛ ka a yele do bi ka a labɔn saraka-bɔ-tinɛ wo tɔnkɔn nanɛ ma. 17I ni a boso ka a burɔ-fannu anubɛ a woro filɛ maku ka wonu sa a sogo-toenu anubɛ a kunyɛ kuma tɛ rɔ. 18#Ɛfɛsa 5.2; Filipai 4.18 I ni wo bɛɛsi mintan saraka-mintan-tinɛ kuma gburr! Wo mintan-sumɛ si a diya don n tɔ.

19“I ni saga-yigi fila nyɔgɛ bi ka a ma Aruna anubɛ ala den-keinu dantɛgɛ-sarakɛ la nde, Mari ma. I ni a fɔ Aruna anubɛ ala den-keinu ye ko anu ni anu bole sa saga-yigi wo kunyɛ kuma. 20I ni a faga ka a yele do bi ka a don Aruna anubɛ ala den-keinu bolo-nyimama-tolo-lafɛlafɛ ma anubɛ anu bolo-nyimama-gbungburu-wɛ ma anubɛ anu bolo-nyimama-kin-gbungburu-wɛ ma. I ni a yele-toe labɔn saraka-mintan-tinɛ tɔnkɔn nanɛ bɛɛ ma. 21Yele min bi saraka-mintan-tinɛ tɔgɔfɛ, i ni wo do bi ka wo basan tulu-sɛnimɛ do la ka a purupuru Aruna anubɛ ala makiri-mirannu ma. I ni wo do purupuru ala den-keinu anubɛ anuna makiri-mirannu ma. Wo le si a ma, Aruna anubɛ ala den-keinu anubɛ anuna makiri-mirannu si sɛninya nde, Mari yala.

22“Mɔgɛ kɛnu dantɛgɛ-sarakɛ le saga-yigi kɛ la nde, Mari ma. I ni a kɛɛn mumɛ bɛɛ bi, a soreta kɛɛn anubɛ a kɔɛ, anubɛ a burɔ-kɛɛnnu ka wonu sa a benya anubɛ a kɔ-kili filɛ anubɛ a bolo-nyimama-wore kuma. 23Isiti sa biredi minnu tɔ, wo ara min di n ma nun, i ni biredi wo kelen bi sende rɔ. I ni biredi do bi fanan min tamaganɛ tuli la anubɛ keki kelen. 24I ni wo bɛɛ don Aruna anubɛ ala den-keinu bolo alako anu ni biredi wo bi ka a dantɛgɛ nde ma ka a ma kɔ-fan la nde, Mari ye. 25I ni wonu bi anu bolo tɔ ka anu sa saraka-soge wonu kuma tɛ rɔ. Wonu sumɛ si a diya don nde, Mari rɔ. 26I ni saga-yigi wo sisi dantɛgɛ n ma ka a ma nde, Mari nyansɛ la. Wo kɔma, a sisi si ma ile, Musa niyi la.

27“I wa saraka-masɔlɛnu dantɛgɛ nde, Mari ma tumɛ min, saga-yigi-wore anubɛ a sisi wonu si ma saraka-masɔlɛnu niyi la. 28Isirɛla mɔgɛnu bi nala yisi-kima-sarakɛ minnu na nde, Mari ye, wonu si ma Aruna anubɛ ala den-keinu de-nyini fannu na. Habadan-tɔn le kɛ la Isirɛla mɔgɛnu kuma min ti yɛlɛma.

29“Aruna wa so-sɛgi-kɛ tumɛ min, anu ni ala den-kei kelen bi min si a fata saraka-masɔ-miran-sɛnimɛ wonu bila a kan na ka wo dantɛgɛ nde, Alla ma a fa gbɛ rɔ. 30Ala den-kei min bi tola a gbɛ rɔ, wo wa don Kan-Tina-Sɛnimɛ rɔ nta Fani-Bɔn la tumɛ min, a fa makiri-miran wonu si to a kan na tele wɔrɔnfila kɔrɔ.

31“I wa wuli saraka-masɔlɛnu dantɛgɛla nde ma tumɛ min, i si saga-yigi fila nyɔgɛ kɛ ma anu dantɛgɛ-sarakɛ la nde ye. Wo si wo soge te kata burɔ. 32Aruna anubɛ ala den-keinu ni soge wo dɔn anubɛ biredi-toe minnu bi sende rɔ ka a dɔn kata burɔ. 33Anu dɔrɔn si wo dɔn. Mɔgɔ-dogbɛrɛ kana anu dɔn fɔ minnu dantɛgɛnɛ nde, Alla ma kamasɔrɔn kɔli-fan wonu sɛninyanɛ le. 34Sogo wo, biredi wo, ni min toe tora ha sɔgɔma, anu ni wo mintan gburr! Wo kana a toe wo dɔn tun kamasɔrɔn a dantɛgɛra nde, Alla le ma.

35“I ni a ma iko n bara a fɔ Aruna anubɛ ala den-keinu na ko la nya min kɛ la. Anuna dantɛgɛ koe nde, Alla ma, wo si ma tele wɔrɔnfila la.

36“Tele-wo-tele, wo si to tura kelen mala sarakɛ la ha tele wɔrɔnfilɛ da ni fa. Anu hakɛ-yamatogon-sarakɛ le turɛ kɛnu na. Wo kɔma, wo si tuli kɛ saraka-mintan-tinɛ wo ma. Wo si a ma worɔ, saraka-mintan-tinɛ fanan ni sɛninya. 37Wo ni sarakɛ kɛnu bɔ tele wɔrɔnfila kɔrɔ iko n bara a fɔ wo ye nya min. Sarakɛ kɛnu si ma saraka-mintan-tinɛ sɛninya-fan la. Wonu si a ma, saraka-mintan-tinɛ ni sɛninya. Ni fenfen tugura saraka-mintan-tinɛ kɛ la, wo ara don nde, Alla bolo.

Saraka-Masɔlɛnuta Tele-Wɔrɔnfila-Sarakɛnu

(Yilan-Yilan Koe 28.1-8)

38-39“Tele-wo-tele, wo ni san-kelen-saga-den fila bɔ saraka-mintan-tinɛ kuma, sɔgɔma kelen, wurɛ la kelen. 40Dɛgɛ-munku-hakikɛ pani-kunbɛ-nya kelen bi ka a ramaga tulu-hakikɛ kilasi fila la ka minni-fan kilasi fila bi ka wonu kɛ tɛ rɔ sɔgɔma-saraka fɔlɔtɛ wo fɛ. 41Saga-den kelan min bi tola, anubɛ wo nyɔgɔn dɛgɛ-munke pani-kunbɛ-nya kelen anubɛ tulu-hakikɛ kilasi fila anubɛ minni-fan kilasi fila, wo ni wonu bɔ wurɛ la iko wo si sɔgɔmatɛ ma nya min. Wonu mintan-sumɛ si a diya don nde, Mari rɔ.

42“Wo ni to saraka-mintantɛ kɛnu bɔla nde, Marita kata burɔ tenbi-bolɔn dafɛ n si kuma wo ye kan min tuma-wo-tuma ka a bi wole ma ha ka a sigi wo kegeyɛnu na. 43Wole Isirɛla mɔgɛnu si nna tamasere taran nyɔ. Nta wan-takɛ si nta bɔn wo sɛninya.

44“N si nta bɔn anubɛ saraka-mintan-tinɛ wo sɛninya wo nya na le ka Aruna anubɛ ala den-keinu sɛninya fanan alako anu ni saraka-masɔ-wɔlɛ kɛ n ye. 45N si sigi wole Isirɛla mɔgɛnu tɛma ka ma wota Alla la. 46Wo si a lɔn ko nde le wota Mari Alla la min ya wo labɔ Iyipiti nyamanɛ rɔ. Wo si a ma, n ni sigi wo tɛma. Nde le wota Mari Alla la.

Currently Selected:

Bɔ-Koe-Iyipiti 29: KCLB

Highlight

Copy

Compare