Ɛsita 2
2
Ɛsita Ma-Koe Mansɛla Musi La
1Mansa Sakasi yisi-kimani-kɔmɛ kɛ, a yili ma bɔ ala tɔn-siginɛ ko ka a tɛgɛ Fasati sɔn kɛ ma. 2A makawandilɛ donu min gbɛrɛnnɛ a ma, wonu ya a fɔ a ye ko, “A fɔ ila nyamanita-mɔgɔ-banu ye ko anu ni anu yɛ lakalan ka na sunkurun-bulan-hakikɛ bɛɛ la i wara yan tɔ. 3I ni mɔgɔ-ba donu yabɔ ila nyamanɛ kan tinɛ bɛɛ rɔ alako wonu ni anu yɛ lakalan ka na sunkurɔn wonu dantɛgɛ ila musu-makandanna Hɛgayi ma Susa soe kɛ burɔ. Hɛgayi min bi ila musinu makandanna, wo ni to sunkurɔn kɛnu fɛ-birala alako anuna kinyɛ si bɔ gbɛ rɔ nya min. 4Wo kɔma, i ni sunkurɔn kɛnu yabɔ. Min ba ile mansɛ yisi bira, i ni wo ma ila bara-musi la Fasati gbɛ rɔ.”
Mansɛ miri ko makawandili-nyimɛ le kɛ la. A ya a ma wo nya.
5Kei do ye Susa soe burɔ, Yahudiya le wo la. A tɔgɛ le Mɔdekɛyai. A fa tɔgɛ le Yeya. Wo fanan fa tɔgɛ le Simayi. Simayi fa fanan tɔgɛ le Kisi. Wonu bɔra Bɛnyamɛ bɔnsɔn-mɔgɛnu tɔ. 6#2 Mansɛnu 24.10-16; 2 Ko-Kɔrɔta-Karan 36.10 Babilɔn mansa Nɛbukanasa ya Yuda mansa Yɛhoyasin anubɛ ala nyamanita-mɔgɛnu bira wati min ka ta anu na Babilɔn nyamanɛ rɔ, Mɔdekɛyai ye anu tɛma nun. 7A kebila-nyɔgɛ do ye nyɔ, wo tɔgɛ le Ɛsita. A sereka-tɔgɛ le Hiburu-kan rɔ ko Hadasa. A kin, ado a mafɛlɛn di kati! Sunkurɔn kɛ sɔrɔnbagɛnu faganɛ, Mɔdekɛyai ya a makolo iko a halala dan.
8Mɔgɔ-banu nara sunkurɔn wonu na Susa soe burɔ iko mansɛ ya a fɔ anu ye nya min, Ɛsita fanan bi sunkurɔn wonu tɛma. Anu ya ale Ɛsita bi ka a dantɛgɛ mansɛla musu-makandanna Hegayi ma. Wo tara a basan mansɛla musi doinu na mansɛla bɔn la. 9Ale Ɛsita wara-koe ya Hɛgayi hɛnɛ. Tiriyante wo rɔ, a donta Ɛsita mamunyɛ rɔ ka dɔn-fen-hakikɛ di a ma alako ala kinyɛ ni bɔ gbɛ rɔ. A ya sunkurun mɔgɔ wɔrɔnfila yabɔ ka wonu ma ala bonna-wɔli-kɛlɛnu na. A ya kan-tina-hakikɛ di anubɛ ala bonna-wɔli-kɛlɛnu ma min tenbira sunkurɔn doinutɛ la.
10Ɛsita ma a fɔ mɔgɔ-wo-mɔgɔ ye ko Yahudiya le ale la iko a kɔrɔ Mɔdekɛyai ya a makawandi nya min. 11Tele-wo-tele, mansɛla musinu bi kan min, Mɔdekɛyai si na nyɔ matagama alako a ni a lɔn a dɔgɛ wo wara-koe ye nya min.
12Yanni anu ni ta sunkurun-wo-sunkurun la mansɛ yakɔrɔ, anu si to sunkurɔn wo mabɛnna san kelen kɔrɔ iko anuna namunyɛ ye nya min. San wo kɔrɔ, karɛ wɔrɔ, anu bi a mamunna mira-tuli la. A nyɔgɔn karɛ wɔrɔ fanan, anu bi a mamunna bɔlɔsam#2.12 Mira ani bɔlɔsam: Tulu-subole donu denu bi wonu na minnu sumɛ di. Tubabu-kan rɔ, wonu si kele ko, “myrrh” anubɛ “balsam.” tuli la. Minta wati wa ban, anu ni ta wo to mansɛ ma. 13Anu tenbi tala sunkurɔn wo to tinɛ mansɛ ma, makiri-fan minnu di ale musi wo ye, a si wonu bi. 14Sunkurɔn wo si ta mansɛ warɛ wurɛ la. Sɔgɔma gbɛ, a ni ta bon-gbɛrɛkɛ la musu doinu kurun tɔ. Kei min bi musi wonu makandanna, wo tɔgɛ le Sayasikasi. Tɛgan le ale bɛrɛn na. Musu-wo-musu bɔra mansɛ warɛ, wo ti sɛgi nyɔ tun fɔ min ba diya mansɛ ye, a ye wo le kelela a tɔgɛ la.
15Ɛsitata wati kenɛ ka ta mansɛ warɛ, Hegayi min bi a kun na, wo ya kurɛ minnu yira a la, a ya wonu denu don a ma. A ban a mabɛnna, min bɛɛ ya a yen, wonu yɛ bɔra a la. Ɛsita kɛ, a sɔrɔn-fa tɔgɛ le Abiheli. A kɔrɔ Mɔdekɛyai, wo le ya a makolo, ado wo ya a bira iko a halala-dan. 16Sakasila mansayɛ san wɔrɔnfila nyɔgɛ, karɛ tan ma, anu tara Ɛsita to Mansa Sakasi ma karɛ wo le la. Karɛ wo tɔgɛ le Tibɛti.#2.16 Tibɛti: Kurankɔɛnuna karɛ fɔlɛ le wo la. 17Ɛsita kɛ wara-koe diyara ale mansɛ ye ka tenbi sunkurɔn wo bɛɛ la. Woletɔ a ya ale ma bara-musi la Fasati gbɛ rɔ. A ya musu-mansaya-fulɛ sigi a kunyɛ la. 18A ya Ɛsitala kɔn-kura-ladiyɛ kɛ. A ya ala mɔgɔ-ba-sɛbɛnɛnu kele. A ya tele kelen yabɔ, a ya a ma, ala nyamanita-mɔgɛ bɛɛ ya a sulen wulɔn. A ya nilɛ kɛ wulɔn tele rɔ iko a bɛnta, mansɛ ni mɔgɔ kɔ nya min.
Mansɛ Niyi-Lakisi-Koe Mɔdekɛyai Bolo
19Yanni Ɛsita ni ta musi doinu kurun tɔ, wo ya a taran, mansɛ nyɛrɛ ara sɔ tinɛ di Mɔdekɛyai kɛ ma. 20Ɛsita ma sɔn mɔgɔ ni a sibole anubɛ a na-kelen-nyɔgɛnu lɔn iko Mɔdekɛyai ya a fɔ a ye nya min. Hali mansɛla bara-musi le a la gbɛ, Mɔdekɛyai ya fenfen fɔ a ye, a ti wo tinya iko a ye a mala nya min nun wo tumɛ wo ye a makolola.
21Mɔdekɛyai ye ala mɔgɔ-bayɛ la wati min mansɛ warɛ, mansɛla bonda-da-makandanna fila ye nyɔ, Bigitan anubɛ Tirɛsa, wonu ya yanfɛ don mansɛ Sakasi ma. Anu ko anu ni a faga. 22Mɔdekɛyai ya kalasɔrɔn wo ma tumɛ min, a tara wo fɔ a dɔgɔ ye, mansɛla musi Ɛsita, kɔni. Ɛsita fanan tara Mɔdekɛyai kan kɛ rakaran ala kei Mansa Sakasi ye. 23Anu ya kumɛ wo fɛ-bira wati min, a mara tonyɛ la, anu ya yili sɔ mɔgɔ filɛ wonu kan la ka anu dun. Mansɛ fanan ya a fɔ ko ko sifa min bara ma kɛ la, anu ni wo sɛbɛ anuna nyamani-buku rɔ.
Kuranko Common Language Bible © The Bible Society in Sierra Leone, 2006.