2 Samuwɛli 6
6
Tɔn-Kenkirɛ Ta-Koe Yerusalɛm
(1 Ko-Kɔrɔta-Karan 13.1-14; 15.25–16.6, 43)
1Keminɛ minnu tagbɛlɛ Isirɛla nyamanɛ rɔ, Mansa Dawuda ya wonu ma ata kɛlɛ-dannu na iko a ya a ma nya min nun fɔlɔ. Wonu yatɛ bɛnta mɔgɔ waga bi-sawa (30,000) ma. 2#Bɔ-Koe-Iyipiti 25.22 Mansa Dawuda tara wonu na tɔn-kenkirɛ bi-tinɛ Yirɔm#6.2 Yirɔm: Yirɔm fanan tɔgɛ le Beyala. soe burɔ Yuda nyamanɛ rɔ, ado Mari Alla Sɛnbɛ-Bɛɛ-Tigi mayigi-tinɛ le melikala muninya filɛ wonu tɛmɛ la minnu bi tɔn-kenkirɛ wo kuma. Mari tɔgɛ le kenkirɛ wo kuma. 3#1 Samuwɛli 7.1-2 Anu ya tɔn-kenkirɛ labɔ Abinadabula bɔn la kɔnkɛ kuma ka a sigi kirindi kurɛ rɔ. Abinadabula den filɛ, wonu denu tara kirindi wo la. Wonu tɔgɛ le Yusa anubɛ Ahiyo. 4Ahiyo wo sɔra kirindi wo yarɔ. 5Mansa Dawuda anubɛ ala kɛlɛ-dannu bi tala anu dɔnna kirindi wo kɔma. Anu bi sigi sala anu sɛnbɛ bɛɛ la. Anu bi sɔrɔnnu anubɛ bɔlɔnnu anubɛ yonbenu anubɛ wasanbɛnu anubɛ dundɔnnu fɔla ka Mari gbiliya.
6Anu ke Nɛkɔnna gbere-kole ma, sara-ninki minnu bi kirindi wo saganna, wonu ya anu kian latugu. Yusa ya a bole lata ka a tugu tɔn-kenkirɛ la alako a la ni telen. 7Mari fonde bɔra Yusa ma. A ya a faga a gbɛ rɔ nyɔ bawo a ara a bole tugu tɔn-kenkirɛ wo la ka a lafɛya. 8Mansa Dawuda fanan diminyara bawo Mari fonde ara bɔ ka Yusa faga. Anu ya kan-tinɛ wo kele ko Mari tugura Yusa kan ma.
9Wo ya a ma, Mansa Dawuda kilanta Mari la. A ya a fɔ ko, “Nde si ta tɔn-kenkirɛ kɛ la n barɛ kama kɛ rɔ?” 10A ma ta a la Yerusalɛm tun. Anu ya Yerusalɛm kilɛ boloka ka ta a ladon Obɛdi-Idɔmla bɔn la. Kati kɛ le wo la. 11#1 Ko-Kɔrɔta-Karan 26.4-5 Karɛ sawa, tɔn-kenkirɛ wo siginɛ kei wo warɛ. Mari duwara kei wonubɛ ala denbayɛ ye.
12Mansa Dawuda ya a lamɔɛn tumɛ min ko Obɛdi-Idɔm anubɛ ala denbayɛ anubɛ a bolo-fan bɛɛ ara Marita duwɛ sɔrɔn ka a tɛgɛ tɔn-kenkirɛ wola sigi ma nyɔ, a tara kenkirɛ wo bi-tinɛ alako anu ni ta a la Yerusalɛm. Anu ya tolon-belebele kɛ a rɔ. 13Tɔn-kenkirɛla dununɛnu ya anu kin-fa-nya wɔrɛ bi min kɛ, Mansa Dawuda ya anu nasɔ. A ya ninki-den-tɔlɔni kelen bi ka wo sa tura kelen kuma sarakayɛ la Mari ye. 14Kila-birɛ anu bolo tun, Mansa Dawuda ya a dɔn a sɛbɛ-kuna-wɛ la ka Mari gbiliya. A ya a gbu makolonya fɔ linɛn-kura-hakikɛ do, a ya wo le ma kufama#6.14 Kufama: Kurankɔɛ donu si a fɔ ko, “Fama.” la. 15Woletɔ Mansa Dawuda anubɛ Isirɛla mɔgɛ bɛɛ ye tala tɔn-kenkirɛ wo la Yerusalɛm soe burɔ tumɛ min, mɔgɛ bɛɛ sewanɛ. Anu bi gbele-gbelenna ka buri fɛ dɔgɔma-ma-de!
16Anu bi anu kun nabɔla soe ma tumɛ min tɔn-kenkirɛ wo la anu bolo, Sɔlila dunmusi Mikali min tora Mansa Dawuda ye, wo ya a yɛ labɔ wundan la. A ya Mansa Dawuda yen nala a dɔnna anubɛ a ye gbangbanna a sɛbɛ-kuna-wɛ la Mari yakɔrɔ, a bɔrɔbɔra a ye.
17Anu ya tɔn-kenkirɛ wo ladon ka a sigi a sigi-tinɛ rɔ fani-bɔn wo la, Mansa Dawuda ya min nadan kenkirɛ wo ye. A ya saraka-mintantɛ anubɛ yisi-kima-sarakɛnu bɔ Mari ye. 18A ban sarakɛ wonu bɔla Mari ye, a duwara mɔgɛnu ye Mari Sɛnbɛ-Bɛɛ-Tigi tɔgɔ rɔ. 19A ya dɔn-fan tala mɔgɛnu na. Min bɛɛ ye nyɔ wo wati rɔ, kei wo, musi wo, wo bɛɛ ya biredi-lɔngbɔn kelen-kelen anubɛ dɛgɛ-mayilannɛ anubɛ nɔnbɔ-gbɔ-gbalanɛ sɔrɔn. Wo kɔma, anu wayanta. Bɛɛ tara a warɛ.
20 #
1 Ko-Kɔrɔta-Karan 16.43
Mansa Dawuda fanan tara ala bɔn la ka ta ala mɔgɛnu kɔndɔn. Ala musi Mikali nara a taran. A ya a fɔ ala kei ma ko, “Isirɛla mansɛ ara tɔgɔ sɔrɔn bi. A ara a nyɛrɛ gbu makolonya ala mɔgɔ-banuna yɔɔn-musinu yala iko yuwɛ.”
21Mansa Dawuda ya a fɔ a ye ko, “N bi n dɔn-tinɛ le nun ka Mari gbiliya, ado ale Mari le ya nde yabɔ ka n ma Isirɛla mɔgɛnuna mansɛ la. A ya n sigi i fa anubɛ a kegeyɛnu gbɛ rɔ. Fɔ n ba to n dɔnna Mari ye ka a gbiliya, 22ado n si n nyɛrɛ bɔrɔbɔ ka tenbi a fɔlɔtɛ la i yala. Tumado ile si i miri kɔrɛ iko fenfen ma nde la kɔnɔ yɔɔn-musi wonu si n gbiliya.”
23Sɔlila dunmusi Mikali wo mara gbandɛ la. Ha a fagara, a ma den sɔrɔn.
Kuranko Common Language Bible © The Bible Society in Sierra Leone, 2006.