2 Samuwɛli 1
1
Mansa Sɔli Saya-Tii-Koe Dawuda La
1Dawuda bɔɛ Amalɛkinu nɔ tinɛ kɛlɛ rɔ Mansa Sɔlila sayɛ kɔma, a sɛgira Sikilagi soe burɔ. Tele fila, 2a sawa nyɔgɛ wo kɔma, keminɛ do burimatoe bɔra Mansa Sɔlila dagɛ rɔ. Kɔnɔ yanni a ni ke Dawuda ma, a ya ala duruki rafara ka gbangban kɛ a kunyɛ rɔ yisi-tinya bolo. A ke Dawuda ma, a ya a madu Dawuda kɔrɔ ka a gbiliya. 3Dawuda ya ale keminɛ manyinika, a ko, “Ile bɔra mintɔ?”
Keminɛ wo ko, “N burimatoe dogonnɛ bɔra Isirɛla mɔgɛnuta dagɛ le tɔ.” 4Dawuda ya a manyinika, a ko, “Nfen mara?”
Keminɛ wo ya a fɔ a ye ko, “Isirɛla kɛlɛ-dannu denu bara anu buri kɛlɛ kɔrɔ, ado anu mɔgɔ-siyaman fagara. Hali Mansa Sɔli anubɛ ala den Yonatan fanan fagara le.”
5Dawuda ya a manyinika. A ko, “Ile ya a lɔn kama ko Mansa Sɔli anubɛ ala den, Yonatan bara faga?”
6Ale keminɛ ko, “N bi Kilabowa kɔnkɛ kuma tumɛ min, n ya Mansa Sɔli yen, ala tanbɛ sɔnɛ a kɔrɔ, a lɛngbɛnnɛ a rɔ, ado wo ya a taran fanan, a yoge minnu siginɛ kirindinu tɔ anubɛ a so-laburilɛnu, wonu bara gbɛrɛn a ma. 7Ale mansɛ ya a tintan tumɛ min, a ya n yen. Wo kɔma, a ya n takele. N ya a labira. 8A ya n sibole manyinika. N ya a fɔ a ye ko Amalɛki le nde la. 9A ya a fɔ n ye ko a tanban boloko-yogomɛ-kɛnɛ, ado a ye saya-bonda-dɛ le la kɛ la. A ko n ni ta a laban. 10#1 Samuwɛli 31.1-6; 1 Ko-Kɔrɔta-Karan 10.1-6 Woletɔ nde fanan tara a faga bawo n ya a lɔn serr, ko a ye fagala le. N ban a fagala, n ya ala mansaya-fulɛ anubɛ ala bolo-kalama-dɛɛn bi. N bara na wonu denu tola i ma kɛ la.”
11Dawuda anubɛ ala kɛlɛ-dannu ya anuna durukinu tafara yisi-tinya bolo. 12Mansa Sɔli anubɛ Yonatan anubɛ Isirɛla kɛlɛ-dan minnu fagara kɛlɛ rɔ, anu telenta dila ka sunyɛ don wonuna ko la bawo Marita mɔgɛ le wonu na.
13Wo wati rɔ, Dawuda ya saya-tiilɛ wo manyinika, a ko, “Ile bɔra mintɔ?”
Keminɛ wo ko, “Amalɛki le nde la kɔnɔ n siginɛ wola nyamanɛ le tɔ.”
14Dawuda ya a manyinika, a ko, “Nfenna ile sisira Marita mansa-yabɔnɛ fagala?” 15Dawuda ya a fɔ ala kɛlɛ-dan do ye ko, “Keminɛ kɛ faga.” Kɛlɛ-dan wo ya a faga kelenna, 16ado Dawuda ara a fɔ ale Amalɛki wo ye nun ko, “I nyɛrɛ le ya i nyɛrɛ faga bawo i ya a fɔ kuma rakaran tinɛ i ko, ile le nyɛrɛ-nyɛrɛ ya Marita mansa-yabɔnɛ wo faga.”
Dawudala Saya-Tolon Kɛ-Koe
17Dawuda ya saya-tolon do kɛ Mansa Sɔli anubɛ Yonatanla ko la. 18#Yasowa 10.13 A ya a fɔ ala mɔgɔ-banu ye ko anu ni Yuda mɔgɛnu karan wo la. (Saya-tolon kɛ sɛbɛnɛ Yasarila buku rɔ.)
19“E, Isirɛla mɔgɛnu, mala kun-tiginu furi bolokanɛ kɔnkɛnu kuma Isirɛla nyamanɛ rɔ.
Mala kɛlɛ-dan minnu kerinte, wonu bara bui.
20Ma kana wo fɔ Filisitinu ye minnu siginɛ Kati anubɛ Asikalɔn soenu tɔ.
Ma kana sɔn, anuna musinu ni nyagalen.
Ma kana sɔn, kemininyabɛlɛ wonuna dunmusinu ni sewa.
21“Alamɛ duri anubɛ bandɛ kana yigi Kilabowa kɔnkɛ kuma.
Alamɛ bin kana fɛrɛn nyɔ tun
bawo kerintenuna nɛgɛ-walannu sanɛ nyɔ rɔ miliyɛ rɔ.
Mansa Sɔlila nɛgɛ-walan ma ti mun tun tuli la min si a lamalan-malan.
22Yonatan kusan kalabɛn lakɛla,
ado ni a fa Sɔlila faan ye a bolo, a ti kinikini mɔgɔ-wo-mɔgɔ ma.
Anu kɛnɛna anu yogenu fagala hali minnu makilannɛ.
23“Mansa Sɔli anubɛ Yonatan, anu di mɔgɛnu ye.
Anu sɔn bɛɛ kelen, ado anu niyi bɔra anu nyɔgɔn fɛ le.
Anu natiri kokɛ ko, ado anu tagbɛlɛ yarɛ ko.
24“E, Isirɛla musinu, wo ni wo di Mansa Sɔlila ko la.
Ale le ya wo fɛrɛya bɔ kura-wulen-hakikɛnu na
ka wo makiri sɛnɛ anubɛ dugu-kɔrɔ-nɔnfulinu na.
25“Kɛlɛ-dan minnu kerinte,
wonu kunyɛnu bara to kɛlɛ rɔ.
Yonatan, i furi sanɛ kɔnkɛnu tɛma.
26N bi n diyana-mɔgɛ Yonatan wo le di tinɛ kɛ la.
I ya n bira boloko-nyimɛ-kɛ.
I ya ila keninteyɛ min yira n na, wo tenbira musitɛ la.
27“Kɛlɛ-dan minnu kerinte, wonu bara bui.
Anuna kɛlɛ-mirannu bolokanɛ, mɔgɔ mako sa anu na.”
Kuranko Common Language Bible © The Bible Society in Sierra Leone, 2006.