Luka 7
7
1Yesoni dubbi namaani jed'e tana buufannaani kae Kapernaumu d'aqe. 2Duuba garbichi shumi toko ka shumini suni guddo jaalatu fayyad'abe ka lubbuu tahe. 3Shumini suni waan Yeso d'ageennaani jaarole Yahudi isati erge kad'ate aka inni d'ufe garbicha isaa fayyisu. 4Yesoti d'umnaani guddo kad'atani waan jed'aniini, Nama kana d'uguma waan kana tolchuufi malte. 5Inni gosa teenna jaalata, ammalle mana Waaqa iti kad'atani toko ya nuu ijaare. 6Jennaani Yesoni worra woliini deeme. Manati d'iaannaani shumini kaani jaalaani isaa Yesoti erge waan jed'eeni, Aabbo, ingaargaliini. Atini mana kiyya keesa seenu himmalle: 7anileeni gara kanke d'ufu himmalle, ammo dubbuma ch'alla jed'i, garbichi kiyya imfaya. 8Anileeni seera jala jira, askartileeni na jala jirti. Yo anini tokooni, Deemi jed'u, inni indeema; yo kad'ibiini, Kooti jed'u, inni ind'ufa; yo garbicha kiyyaani, Akana tolchi jed'u, inni intolcha. 9Yesoni dubbi tana d'ageennaani guddo mame, garagale waan gumi isa gula yaatuuni jed'e, Waan anini isaniini jed'u, D'ugefacha akana tana anini taka Israeli keesaleti ingarre. 10Jari ergani kaani manati dachaanaani garbicha fayye arge.
Yesoni ilma due kaasa
11Eegi suni Yesoni dira Naini jed'ani d'aqe; jara isaatiifi gumiini guddooni isa gula yaate. 12Fullo dirati d'iaannaani, nama reefa baate yauni arge. Nami due suni ilma tokocha niiti d'iirsa inqamne, nama hedduti ka dira suni isi woliini jira. 13Aabbooni isi arginaani naheefi, Imbohiini jed'eeni. 14Iti d'iaate sire reefaani baatani tuqe, jennaani jari baatu kaani ejaanje. Yesoni waan jed'eeni gurba waan anini siini jed'u kai. 15Namichi due kaani kae tae dubbate. Duuba Yesoni haad'a isaati kenne. 16Nami ch'ufti bakhakhe Waaqa faarse waan jed'ani, Raagi guddaani yayu jiddu teennaa gadibahe: Waaqi la gumi ufiti mullate. 17Gurri isaa lafa Yudeatiifi arda suni ch'ufa gahe.
Yohana nama batisu
(Matayo 11.2-19)
18Jari Yohana odu tana ch'ufa iti hime. 19Jennaani Yohanani jara isaa lama yaame Aabbooti erge waan jed'eeni, Atini ka ind'ufa jed'ani mo kad'ibi eenna? 20Jari kaani isa geennaani waan jed'ani, Yohanani nama batisu situ nu erge waan jed'e, Atini ka ind'ufa jed'ani mo kad'ibi eenna? 21Hojuma suni Yesoni nama heddu fayyise ka d'ukuba garagara qabuufi ka jinniini gaargalchitele, nama balla heddule fayyise. 22#Isa 35.5-6; 61.1 Inni waan ergattu Yohanatiini jed'e, D'aqa, waan argitaniifi waan d'ageetani Yohanati hima: ballaani lafa arga; naafi kae deema, nami qomaat'a qabu inqulqullaa, ka gurri duude ind'agaya; nama due inkaasani, Odu Dansa hiyyeeyiti odeesani. 23Ayyaana nama na imormanne.
24Ergattuuni Yohana yaannaani Yesoni waan Yohana gumiti dubbate waan jed'e, Isani lafa alo maal daawachu d'at'ani? Ilaadu bubbe chochositu mo maal barbaaddani? 25Yoosi maal daawachu d'at'ani? Nama woya dansa uyifatu? Hubad'a, nami shoobu, ka machi fed'u, mana hayyu keesa taa. 26Maal daawachu d'at'ani re? Raaga? Ee, ammo waan anini jed'u, Nama raaga ira jiru argitani. 27#Mal 3.1 Yohanani sunuma ka t'aafi keesati Waaqi baane waan jed'e, Kunini ergattu tiyya; anini si durati isa erga aka inni d'aqe daandi tante si durati mid'aasu. 28Waan anini isaniini jed'u, Nama d'alate tokoleeni ka Yohana ira jiru injiru; ammo nami Finna Waaqa keesati nama ch'ufa ira diqa isa ira jira.
29 #
Mat 21.32; Luk 3.12 Nama ch'ufaafi worri damoosa guruleeni waan kana d'agaye; worri suni worra Seera Waaqa ka d'uga guute jennaani Yohanani batise. 30Ammo Farisayoofi jari Seera beekhu mala Waaqaa didani batiso Yohana tuffatani. 31Nama d'aloota kana maaniini wolti akheekha? Worri maal fakaata? 32Ijoolle fulla gabaya teteete woli yaamtu fakaata, ta waan jettu, Dibbe fuud'aa isanii d'oomne ammo sirbu diddani! Lalalaani iyine ammo isani bohu diddani. 33Yohanani nama batisu d'umnaani qit'a inyaanne, farsole ind'unne, ammo isani, Inni maraata jettaniini. 34Ilmi Nama d'umnaani nyaate d'uge, duuba isaani waan jettani garaade kana ilaala ka farso d'ugu; inni jaala nama damoosa guuratifi ka nama daba jettani. 35Aka qalbiini Waaqa d'uga, worra d'ugefateeti agarsiisa.
Yeso mana Simoni ka Farisayo keesa
36Namichi Farisayo toko Yeso gololaa yaame, jennaani Yesoni mana isaa seene tae gololfate. 37#Mat 26.7; Mar 14.3; Yoh 12.3 Jennaani niitiini sharmut'itiini toko ta dira suni, aka Yesoni mana nama Farisayo keesa sagale nyaatu d'ageennaani dulo d'ad'a qayya qabduuni d'ufte. 38Isiini duuba fulla miila isaa ejatte boote imimaani miila isaa irati ch'och'obsite, rifeensa mata ufitiini haat'e, miila d'ungate, d'ad'a suni dibde. 39Jennaani namichi Farisayo ka isa gololche kaani garaa ufi keesati waan jed'e, Ato sila namichi kunini raaga tahe, aka niitiini isa tut'u tunini sharmut'atiifi nama daba imbeekha.
40Yesoni waan jed'eeni, Simoni, anini dubbi toko ta siini jed'u qaba. Inni waan jed'e, Aabbo, maal? 41Yesoni waan jed'eeni, Nama tokoti jira ka nami lama gati ira fud'ate; toko shilingi kunki shani, kaani shilingi d'ibba shani. 42Baasu dad'abani jennaani namichi kaani worra lachuyu lakise. Tanaafi, mala keeti, kamiti ira isa jaalata?
43Simoniini waan jed'eeni, Waan anini sehu, ka hori ira gudda lakisaniifi. Inni waan jed'eeni, D'uguma baanta. 44Niititi garagale waan Simoniini jed'e, Niiti tana agarta? Anini mana kanke seennaani atini bisaani miilale naa inkennine, ammo isiini imimaani ufitiini miila kiyya d'it'e, rifeensa mata ufitiini nara haat'e. 45Atini na ind'unganne, ammo isiini haga anini arma seene miila kiyya d'ungachu illakimne. 46Mata kiyya atini imuune, ammo isiini miila kiyya d'ad'a qayyaa dibde. 47Tanaafi anini siti hima, Daba isii heddu la araaramaniifi maro isiini guddo na jaalatteefi. Ammo ka diqo araaramaniifi sunini diqo jaalata.
48Waan inni isiini jed'e, Daba kanke la si araaramani. 49Jari isa woliini tatau garaa ufi keesati waan woliini jed'e, Eennu kunini ka dabale dandae namaa araaramu? 50Inni waan niiti taaniini jed'e, D'ugefachaani tante la si baafte; beeni, nagayaani gali.
Nad'eeni ta Yeso qarqaarte
Currently Selected:
Luka 7: BOR
Highlight
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.