Huji Ergattu 25
25
1Guyya sadi lafa suni keesa teennaani Festoni Kaisaria kae Yerusalemu d'aqe. 2Qaalole gugurdofi Yahudiini waan Paulo isati hasoofte, isa kad'atte, 3aka inni worra qarqaare haga Yerusalemu nama erge Paulo fuud'u. Wonti akanatiifi Yahudiini qara aka kara keesati isa eegani ijeesani mariatte. 4Festoni waan jed'e, Paulo la Kaisaria keesati hid'ani, anileeni d'iotu achi d'aqa. 5Yo isani dandeetani, na woliini koota, aka nama kana himattani, yo inni hameenna tolche jed'e.
6Jennaani Festoni guyya saddeeti yokhaani kud'anfa worra woliini tae Kaisariati gadi bue. Boriyya barch'uma abba qorsuma ira tae Paulo yaama jed'e. 7Eegi inni d'ufe, Yahudiini Yerusalemu d'ufte isa bira ejatte waan jabdu hedduuni Paulo himatte, ammo waan tokole ta d'uga fakeesa d'abani. 8Pauloni ufii dubbate waan jed'e, Anini Seera tokole iyakine aada Yahuditiifi Mana Waaqatiifi hayyu Kaisari duraleti. 9Ammo waan Festoni Yahudi gammachiisu fed'eefi, waan Pauloni jed'e, aka anini Yerusalemu si geese achiti dubbi tante qoru feeta? 10Jennaani Pauloni waan jed'e, Anini barch'uma kora ka hayyu Kaisari dura ejad'a, fulla iti na qoru malani. Anini Yahudi dura woma iyakine, akuma atini beetu. 11Yo anini wollaala qabaad'e yokhaani waan duu maleefi tolche, anini duisa indidu. Ammo yo wonti na himataniifi kunini injirre, nami tokoleeni dandae harka worrati na inkennu. Anini Kaisari kad'ad'a. 12Eegi Festoni worra kora ka isa woliini tauni dubbate, inni waan jed'e, Atini ya dubbi tiyya Kaisarini naa ga jette, fulla isaa inuma deemta.
Paulo Agripa durati
13Eegi bulti diqo toko hayyu Agripafi Bernikeni Kaisaria d'ufani, aka Festo nagaya fuud'ani. 14Eegi worri guyya heddu achi tae, Festoni waan Paulo hayyuti hasae waan jed'eeni, Namicha tokoti jira, ka Felikini hid'aansa keesati lakise. 15Gaafa anini Yerusalemu jiru, qaalole gugurdofi jaaroleeni Yahudi waan isaa nati himte aka isa dubbi qorani wollaala iti murani feete. 16Ammo waan anini worraani jed'e, aki ato nama himataniifi worra isa himatu wolti ind'ufiini wollaala namati murani aada Rumitini, aka inni qoomni waan himataniini suni ufi dubbatuni argattu. 17Tanaafi eegi worri armati wolwoldae, anini diqole inture, ammo boriyya barch'uma kora ira tae, Nama suni natiini koota jed'e. 18Worri isa himatu olejanje, ammo aka anini qara sehe diqole inhimanne. 19Wonti worri wolmormu waan aada worraa toko, ammalle waan namicha due toko, ka Yeso jed'ani, ka Pauloni, Injira jed'u. 20Maro anini gaafacha akana tana inquufiniifi, Paulo aka inni Yerusalemu deemu fed'u gaafad'e, aka achiti waan kana qorani. 21Ammo Pauloni aka kora Kaisari eegatu kad'ate. Jennaani anini, Isa qorqorad'a, haga anini Kaisariti isa erguuti jed'e. 22Agripani waan Festoni jed'e, Anini sila nama kana d'agayu fed'a. Festoni, Bori isa d'ageeta jed'eeni.
23Boriyya Agripafi Bernikeni woya hayyuma naqatani ulfinna guddaani shumootaafi jara gugurda dira suni woliini fulla dubbi iti d'agayani olduudani. Jennaani Festoni nama erge Paulo yaame gadini koota jed'e. 24Festoni waan jed'e, Hayyu Agripafi worra arra arma nu woliini jirru: isani nama kana inargitani, ka gumiini Yahudi ch'ufti Yerusalemufi armaleti na kad'atte, Inni jiraachu himmalle jette iyite. 25Ammo anini waan inni duu maleefi inargine, ammalle maro inni aka gara Kaisari deemu kad'ateefi, anini ya aka isa ergu buufad'e. 26Ammo anini waan gara hayyu gudda t'aafu inqabu; tanaafi anini isani duraani d'ufe, keesuma si duraani, Ee hayyu Agripa, aka eegi nu isa qorre, anini sila waan t'aafu argad'u. 27Aki nama hid'aansa keesa jiru ergani, ka waan isa himataniifi imbeesisiini, fullaaniti jed'e.
Pauloni ufii dubbata Agripa durati
Currently Selected:
Huji Ergattu 25: BOR
Highlight
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.
