Huji Ergattu 19
19
1Ato Apoloni Korintho ke jiru, Pauloni arda suni ch'ufa keesa deeme Efesoni bahe. Jara Yeso ka gari arginaani 2inni waan worraani jed'e, Isani gaafa d'ugefattani Lubbu Qulqullo argattani? Worri waan jed'eeni, Hiyyo, aka Lubbuuni Qulqullooni jirtule imbeennu. 3Inni duuba waan worraani jed'e, Batiso tamiini batifamtani re? Batiso Yohanatiini batifamne jed'aniini. 4#Mat 3.11; Mar 1.4,7-8; Luk 3.4,16; Yoh 1.26-27 Jennaani Pauloni waan jed'e, Yohanani d'uguma batiso daba iraa deebianiini barsiise waan jed'e, Ka na gula d'ufu d'ugefachu maltani, nami suni Yeso. 5Worri waan kana d'ageennaani maqa Aabbo Yesotiini batifame. 6Pauloni harka worra ira keyanaani, Lubbuuni Qulqullooni worra ira buute afaani d'ibi dubbatani dubbi Waaqa hasani. 7Worri d'iira haga kud'ani lamati.
8Pauloni mana Waaqa iti kad'atani seene, haga jia sadi soda male dubbate, nama hedduuni wolmormani waan finna Waaqa nama barsiise. 9Ammo nami gari mata jabaate d'ugefachu dide, gumi durati hameenna kara Aabbo dubbate. Tanaafi Pauloni worra biraa deeme, jara Yeso guure guyya ch'ufa mana Tirano keesati barsiise. 10Inni haga ganna lama ch'ufa akasi tolche, tanaafi nami Asia keesa jiru ch'ufti, ka Yahuditiifi Grikileeni, dubbi Aabbo d'agaye.
Waan ilmaani Skewa
11Waaqi akheekha gugurda harka Paulotiini tolche. 12Yo bututufi woya isaa nama fayya inqamneti geesanile, hojuma suni fayyani jinniini keesaa baati. 13Yahudiini gari, ta lafa ch'ufa keesa yayaate jinni nama keesaa baafte, maqa Yeso Kristotiini jinni nama keesa yaasu iti gamte waan jette, Anini maqa Yeso, ka Pauloni barsiisuuni si abaara jed'ani. 14Ilmaani torbati jira, ta Qaallicha Yahudi Gudda, ka Skewa jed'ani, ta waan kana tolchite. 15Jinniini waan worraani jette, Anini Yeso imbeekha, Paulole imbeekha, ammo isani eennu kana? 16Namichi jinni qabu kaani worrati kae dabsate, mata d'od'oose woya ira tatarsaase, mana keesaa gusse. 17Yahudifi Grikiini Efeso keesa jirtu ch'ufti waan kana d'ageennaani guddo sodaatte, maqaani Aabbo Yesoleeni guddifame. 18Nami hedduuni ka qara d'ugefate d'ufe daba ufi himate, huji ufi diideese hime. 19Falfaltuuni hedduuni kitaaba ufi wolti guurte, nama ch'ufa durati ibidaani gubde. Gati waan gubani kaani ch'ufa heregani jennaani aka isiini qarsi kunki shantama taate argani. 20Akanaani dubbini Aabbo jabaatte guddatte fulla ch'ufaa geete.
Gohanna Efeso keesaa
21Eegi waan kana Pauloni aka Makedoniafi Akaya keesa dabre Yerusalemu d'aqu kutate waan jed'e, Yo achi gahe, Rumile d'aqu male jed'e. 22Tanaafi inni jara lama, Timotheofi Erasto, ka waan isaa qorqoratu, Makedoniati erge, ammo ufi Asia keesa diqo toko tae.
23Eegi waan kana gaargali guddaani, maro Kara Aabbootiifi, lafati bue. 24Ogeesi toko, ka Demetrio jed'ani, fakeenna mana Artemi iti kad'atani saldaqa tume, duuba hujiini tuni daldala guddo ogeeyi ch'ufaa d'ufteeni. 25Inni ogeeyifi nama huji gosa suni tolchu ch'ufa wolti yaame waan jed'eeni, D'iiro, isani imbeetani, aka nu daldala kana keesa hori argannu. 26Ammalle isani ya argitani d'ageettani, aka fulla Efeso ch'allaaniti, ammo fulla ch'ufa Asia keesa, Pauloni nama heddu sosobe qalbi worra garagalche, Wonti harkaani mid'aasani Waaqaaniti jed'u. 27Wonti nu sodaannu aka huji teenna ch'alla tuffataniniti, ammo aka mana Artemi ta waaqa jed'anile tuffatani, aka guddinni isi badu, ta Asiafi lafti ch'ufti guddiftu!
28Dubbi tana d'ageennaani worri guddo ch'aare, waan jed'e, Artemini ta dira Efeso ha guddatu! 29Diri ch'ufti gohannaani guutame. Gayofi Aristarko, jara Makedonia, ka Paulo woliini imaltu yaani qabani, diida korati geesani. 30Pauloni biyyati gadi bahu fed'e, ammo jari Yeso d'ugefate kaani isa d'owe. 31Jari Asia gugurdaani toko, ka jaalaani isaa, nama iti erge, aka inni diida korati gadimbaane. 32Nami gari akana iya, ka gari aka d'ibi iya, waan gumiini waan taatu wolaalteefi; ammalle nami hedduuni waan nami woltiwoldaeefi imbeekhu. 33Nami gari, Iskandati wo yake jed'e, waan Yahudiini biyya dura isa d'aabdeefi. Jennaani Iskandani harkaani biyya ch'allisiisu fed'e, aka sila worrati dubbatu. 34Ammo aka inni Yahudi arginaani, nami ch'ufti qonqo tokooni haga saati lama iye, waan jed'e, Artemini ka dira Efeso ha guddatu!
35Eege guddaani dira biyya ch'allisiise, inni waan jed'eeni, D'iiro, biyya Efeso, nami ch'ufti aka diri Efeso mana Artemi guddafi d'akha qulqullo ka gubba gadi bue qorqoratu imbeekha. 36Aka nami waan kana dandae imormanne imbeetani, tanaafi ch'allisa, woma iyakina! 37Isani jara kana armati d'uftaniini, ka waan mana Waaqaa inhatiini, yokhaani waaqa keenna inarabsiini. 38Yo Demetriofi tumtuni isa woliini jirtu dubbi nama iraa qabaate kori injira nami dubbi qoruleeni injira, ha waan fed'ani himatani. 39Ammo yo isani dubbi d'ibi gaafachu feetani, akuma aada kora jaarole keesati dubbad'a. 40Wonti akanatiifi waan gohanna arra tana, yo nu gaafatani, nuu waan hamtu; wonti gumiini tunini wolwoldeeteefi, ta nu himannu, injirtu. 41Dubbi tanaani inni biyya galche.
Pauloni lafa Makedoniafi Griki d'aqa
Currently Selected:
Huji Ergattu 19: BOR
Highlight
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.
