ZAKARIA 9
9
Khuli Vatsiku va Israeli Valikhalachilwa
1Yili nalio likhalaka liu Mwami Nyasaye khu shivala shia Hadiraki,
halala ni litaala lia Damasika.
Shichila shivala shia Siria ni shiu Mwami Nyasaye;
khuli vandu vi tsimbia tsiosi tsia Israeli tsili tsietsie.
2Khali litaala lia Hamaatsi khu mupaka kwa Hadiraki;
mataala ka Tiro nende Sidoni,
khali nikilolanga kali na vandu vu vusitsa ni keke.
3Litaala lia Tiro lia yumbakha imbinga;
lia yivunjishila ifetsa khuli nu lukuushi,
khandi itsahabu khuli indakala mu tsinjila tsi litaala.
4Navutswa Mwami Nyasaye, uli Mwami Nyasaye aliitsa khulinuula shia shindu shiosi;
masiuvi miandu chialio mu inyanza,
nu khulaalitswa nu mulilu.
5Litaala lia Ashikeloni liliitsa khulola
nikakholekhanga nu khuria;
khali litaala lia Gaza, ma linyakhane vululu.
Khali litaala lia Ekuroni, shichila lisuuvilitswa liakora.
Mwami wi litaala lia Gaza aliitsa khukhutsa,
ma mundu alivula khumenyakhu mu litaala lia Ashikeloni.
6Vandu vivulwa mu vandu vi tsimbia tsindi lukanu
valiitsa khumenya mu litaala lia Ashidodi.
Mwami Nyasaye avoolanga,
“Niitsa khutivitsa vwiloli vwi litaala lia Filistia.
7Niitsa khuvaleshitsa khulia inyama yu masahi kashilimu;
khali khulia shiukhulia shiakaywa.
Vandu varikala navo valiitsa khuva va Mwami Nyasaye, uli Nyasaye weru;
valiitsa khukwa lulala khu tsinzivulu tsia Yuda,
khandi litaala lia Ekuroni liliitsa khukwa khuli litaala lia Vayeebusi.
8Navutswa niitsa khushinga vandu vi inzu yanje
khwikalila vasikali khuvaseera.
Mutsiku aliitsa khuvula khutambitsa vandu vaanje,
shichila inzi mwene ndolanga khuli vandu vaanje vanyakhananga.”
Mwami Uliitsa Khulera Milembe
9Munyi vandu va Sayoni, mwikhoye muno!
Munyi vandu va Yerusalemi, laanjilili nu vuyaanzi!
Lolikhu! Mwami wenyu yitsanga khumulola!
Yinjilitswangwa nu vuyaanzi khandi wakuura,
navutswa nu mwichehitsi khandi achendelanga khu ipunda,
khu isushili, shimoli shi ipunda.
10Niitsa khurulitsa makaare kiliihe mu lusomo lwa Efurahimu
tsifarasi tsi liihe khurula Yerusalemi,
ma vura vwa varumishilanga muliihe votong'olwi.
Mwami wenyu aliitsa khulera milembe mu vandu vi tsimbia tsindi tsiosi.
Aliitsa khwamiha khuraanjila khundulu khwi inyanza khutukha khu yindi
khuraanjila khu muchela khutukha khundulu khwi lilova.
11Mwami Nyasaye avoolanga,
“Lwa nakhola lilakano na munyi liahambanyinywa na masahi ki misango,
niitsa khuvoholola vandu vovo khurula mu vwina vwa matsi kakhaamamu.
12Munyi vavohe vamuli ni lisuuvilitswa, kalushi;
kalushi mu imbinga yenyu.
Muvoolelanga havulavu ndi niitsa khumurunga hali khavili
khurulana khu linyakhana lienyu lia mwavirilamu.
13Niitsa khurumishila shivala shia Yuda khuli vura vu musikali,
na Efurahimu khuli mivanu.
Niitsa khurumishila vandu va Sayoni khuli shivavi,
khukwana vandu vi shivala shia Vaguriki.”
14Mwami Nyasaye aliitsa khulolekha khu vandu veve;
mivanu chiechie chiliitsa khuhemukha khuli luheni;
Mwami Nyasaye aliitsa khuvura shisiliva;
aliitsa khuroonjela mu shihungutsi khuluveka luli ikuvanda.
15Mwami Nyasaye wi Mikaanda Chiliihe aliitsa khulinda vandu veve,
valiitsa khukuura, nivaseenela hasi machina ka valeselanga mikoye;
valiitsa khulaanjilila muliihe khuli vandu vatandi
nu khwiira vatsiku vavo;
masahi kaliitsa khutsukhulukha khuli masahi ku musango
kwa vasuundulanga khu vwaali khurula mu ibakuli.
16Khulitukhu lienelo, Mwami Nyasaye, uli Nyasaye wavo aliitsa khuvahonyinya,
khuli mwayi ahonyinyanga makondi keke khurula mu maraava.
Valiitsa khwang'ang'ila mu shivala shieshie
khuli machina ku vukuuli vululu mu itaachi.
17Shivala shienesho shiliitsa khuva shiu khuchenyinya khandi shilahi muno!
Vayayi vavukha nende vakhana vavukha valiitsa khunyola tsingulu
lwa valiitsa khulia imu nivang'wa idivai.
Currently Selected:
ZAKARIA 9: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
