ZAKARIA 4
4
Malolo ki Shikuru shi Itaaha nende Misayituni Chivili
1Injelosi yali nilomolome khwinzi yakalukha, nimbushitsa khuli mundu avushitswangwa mu tsindolo. 2Injelosi yeneyo yandeva, “Ni shina shiulolanga?” Nachichipa, “Ndoli shikuru shi itaaha shialombwa khu itsahabu, ni shindu khuli ibakuli ikulu khushio. Tsitaaha saba tsiarenjekhwa khu shikuru shienesho, shia itaaha na havundu ha vinjilitsilanga lutaambi. 3Khuliho ni misala chivili chi misayituni himbi khushio, musala mulala khuluveka lu mukhono musatsa kwi ibakuli, na musala kundi khuluveka lu mukhono mukhali.” 4Nalwo lwa nareeva injelosi yali nilomolome khwinzi, “Yivi mwami wanje, ni shina shi vindu yivi vimanyinyanga?” 5Injelosi yeneyo yanjipa, “Wakorwa shia vindu yivi vimanyinyanga?” Nachipa, “Yivi mwami wanje, nakorwa.”
6Nalwo lwa injelosi yeneyo yambolela, “Mwami Nyasaye wi Mikaanda Chiliihe avoolelanga Zerubabeli: Utsitsanga khukuura, shikali khuvirila khu vunyali vwa vasikali inoho tsingulu tsiotsio tawe, navutswa khuvirila khu Roho wanje. 7Yivi shikulu shiraambi muno, ukanakananga uli shina? Zerubabeli aliitsa khukhukhola khuva khuli lwomera; nivi uliitsa khumbakha vuyia Litempeli khutukha khu lichina liu khumalilikha; khandi vandu valiitsa khulaanjilila nivavoola, ‘Nyasaye alikasitse! Nyasaye alikasitse!’ ”
8Mwami Nyasaye yalomoloma khwinzi, navoola, 9“Zerubabeli umali khwala musinji kwi litempeli yili; khandi neye uliitsa khumala khumbakha. Lwa kaliitsa khwikholekha, nalwo lwa muliitsa khumanya ndi Mwami Nyasaye wi Mikaanda Chiliihe neye wanduma khu munyi.”
10Injelosi yambolela, “Vikuru saba vi tsitaaha vili khuli tsimoni saba tsiu Mwami Nyasaye, tsiheenzanga shia havundu hosi khulilova.”
11Nalwo lwa nareeva injelosi yeneyo, “Ni shina shi misala chivili chi misayituni khuluveka lu mukhono musatsa nende mukhono mukhali kwi shikuru shi itaaha chimanyinyanga? 12Ni shina shi tsisia tsivili tsiu musala ku musayituni himbi khu vindu vivili vialombwa khu itsahabu, via vatsushilamu makura ku musayituni tsimanyinyanga?”
13Yambolela, “Wakorwa vindu vienevo?” Nachichipa, “Yivi mwami wanje, nakorwa.”
14Nalwo lwa yambolela, “Tsisia tsivili yetso tsili khuli vandu vavili vavekhwa makura khurumishila Mwami Nyasaye wamihanga shia havundu hosi khulilova.”
Currently Selected:
ZAKARIA 4: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
