ZAKARIA 2
2
Malolo khu Ikavilo yu Khupimila
1Naheenza ikulu nindola mundu nakumile mu mukhono ikavilo yu khupimila. 2Nalwo lwa namureeva, “Ni hena ha utsitsanga?”
Yanjipa, “Nzitsanga khupima litaala likali lia Yerusalemi, khwenya khumanya vuraambi nende vukalamu vwalio.”
3Nalwo lwa Injelosi yali nilomolome khwinzi yalolekha imbeli, khandi injelosi yindi niyitsa khuchiakanila. 4Injelosi yali yu khuraanga yavoola, “Yilukhaka vwangu utsi khuvoolela muyayi muvukha woyo, ‘Vandu valiitsa khumenya mu litaala likali lia Yerusalemi, nalio liliitsa khuva khuli michitsi chiumbakhwa vuchila masisi, shichila vandu vamenya mulio vanyishi, khali miruku minyishi chiamenya mulio. 5Inzi Mwami Nyasaye niitsa khulivotokhana khuli lisisi liu mulilu; nimenya mu litaala likali lienelo khuvirila mu vukhumi vwanje.’ ”
Vandu Vahilwa mu Vuhaambe Valaangwa Ingo
6Mwami Nyasaye avoolanga, “Ruliyo! Ruliyo! Yilushi muruli mu shivala khuluveka luli ivuluka, shichila ninzi wamusalanyinya mu tsimbeka tsine tsiosi. 7Ruliyo! Munyi voosi vamumenyanga mu shivala shia Babilonia, yilushi mutsi mu Sayoni!” 8Mwami Nyasaye wi Mikaanda Chiliihe, undumi khuvirila mu vukhumi vwevwe khutsia khuvoolela vandu vi tsimbia tsiamuyaaya vindu vienyu, “Ni kilikali, mundu utiilanga khu munyi, atiilanga khu indolelo yi imoni yanje. 9Inzi mwene niitsa khuvakwana, khali varukwa vali vavo, valiitsa khuvayaaya shia shindu shiosi.”
Nikamali khwikholekha, nalwo lwa shia mundu wosi aliitsa khumanya ndi Mwami Nyasaye wi Mikaanda Chiliihe neye wanduma khu munyi.
10Mwami Nyasaye avoolanga, “Munyi vandu va Sayoni, munzimbile tsinyimbo numusangala; shichila niitsa khumenya na munyi!”
11Khulitukhu lienelo, vandu vi tsimbia tsinyishi valiitsa khwitsa khwinzi Mwami Nyasaye, mavave vandu vaanje. Niitsa khumenya navo, khu mulimanya ndi Mwami Nyasaye wi Mikaanda Chiliihe neye wanduma khu munyi. 12Vandu va Yuda valiitsa khuva khandi khuli miandu chiu Mwami Nyasaye mu shivala shieshie shitakatifu. Aliitsa khurovola khandi litaala likali lia Yerusalemi khuva lielie mwene.
13Munyi vandu voosi, muhonjele imbeli wu Mwami Nyasaye, shichila yitsanga narula havundu hamenyanga hatakatifu.
Currently Selected:
ZAKARIA 2: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
