ZAKARIA 13
13
Musinji kwi Linihitswa
1“Khulitukhu lienelo, khuliitsa khuva ni shirula shilitsa khwikulwa shiukhutakasa vitsukhulu va Daudi halala na vandu vamenyanga mu Yerusalemi khurula mu vwoni vwavo nende shifwavi shindi shiosi. 2Mumatukhu kenako, niitsa khurulitsaho mira ki misambwa chiosi mu shivala, nu khuvula khwitsushitswakhu khali hati hene nu mundu wosi. Niitsa khurulitsa mu shivala vaprofeti nende vindu vichilanga vandu nivikomba khukhola vindu vi shifwavi. Inzi Mwami Nyasaye wi Mikaanda Chiliihe mali khuvoola. 3Niiva mundu aliitsa khulolekha khandi avoolanga ndi nu muprofeti, tata wewe nende mama wewe vamwivula valiitsa khumuvoolela, ‘Ulakhutsa, shichila ulomolomanga makhuva ku vuvehi khuvirila mu lira liu Mwami Nyasaye’ khandi tata wewe nende mama wewe valiitsa khumulivira khutukha lwa alikhutsa lwava naprofetanga. 4Khulitukhu lienelo, shia muprofeti wosi aliitsa khulola tsisoni shichila malolo keke ku vuprofeti; khandi shialiitsa khwifwalakhu tsinguvu tsia vaprofeti khukaata vandu tawe, 5navutswa aliitsa khuvoola, ‘Shindikhu muprofeti tawe, navutswa mundu ulimanga mulimi; shichila khuraanjila nishili muvukha shimenyanga khulilova tawe.’ 6Niiva mundu anyala khumureeva, ‘Makuule kali khu mmbili kwokwo yako kamanyinyanga shina?’ alachipa, ‘Nasalilitsilwa hango wu mulina wanje’ ”
7Mwami Nyasaye wi Mikaanda Chiliihe avoolanga,
“Yivi shivavi, kholakhu shindu khu mwayi,
nali mundu ukhonyanga muhinzilu!
Yiira mwayi, makondi kasalane;
nasalilitsa vandu vaanje.
8Vandu vavili mu vavaka valiitsa khukhutsa,
navutswa mulala mu vavaka valiitsa khurikala mwoyo mu shivala.
9Niitsa khuchelitsa mulala mu vavaka venavo mu mulilu,
khuvanihitsa khuli mundu anihitsanga ifetsa,
nu khuvachelitsa khuli itsahabu isambwangwa.
Nalwo lwa valiitsa khusaala khwinzi,
nilivachipa.
Niitsa khuvoola, ‘Navo vandu vaanje’;
navo valivoola, ‘Mwami Nyasaye neye Nyasaye weru.’ ”
Currently Selected:
ZAKARIA 13: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
