ZAKARIA 11
11
Khutivitswa khwa Vandu vi Tsingulu
1Munyi vandu va Lebanoni, mwikule miliango chienyu,
mulilu kulaalitsi misala chienyu chia ceda!
2Munyi misala chi mitarakwa mulile tsikhwili,
shichila misala chia ceda chia yeelitswa hasi;
misala chiali nichiaheelwa vukhumi chiativitswa!
Munyi miseno chia Bashani, mulili tsikhwili,
shichila muliru kwitsula misala minyishi kwa yeelitswa!
3Hulilikhu khuli vayi valilanga tsikhwili!
Shichila vukhumi vwavo vumali khutivitswa!
Hulishitsikhu khuli tsisimba tsihuma humanga;
shichila shisakha shia tsimenyamu
mu Luhoongo lwa Yorodani shimali khutivitswa!
Vayi Vavili
4Mwami Nyasaye, uli Nyasaye wanje yambolela, “Yikhole khuva khuli mwayi wa makondi katsitsanga khusinzwa. 5Vandu vakakuulanga nu khukasinza vuchila khusalilitswa; navutswa yavo vakuulanyinyanga vavoolanga: Khwitsominyi Mwami Nyasaye, shichila khuli vahinda; khali vayi vako vavula tsimbavasi tsia vakalolelanga. 6Khali inzi Mwami Nyasaye niitsa khuvula khuvela tsimbavasi vandu vamenyanga mu shivala shinu. Niitsa khukhola vahimane vene khuvene, khandi vamihi khuvamiha, nu khulekha khuvahonyinya khurula khuvo.”
7Nalwo lwa namanya ningwa mwayi wa makondi kali nikaviritswa khutsia khusinzwa na vandu vakholanga muhinzilu ku vukhala vu khukuulitsa nu khukuula makondi. Navukula tsindovoshi tsivili: nakulikha indala lira Tsimbavasi na yindi Vuhambani; ninzia khwayitsa makondi. 8Niira vayi vavaka khu mweli mulala; navutswa nalekha khuva mwikhutsili navo, khali vo nivambima. 9Navoolela shiayo shia makondi, “Shinzitsanga khuvakhu khali hati hene mwayi wenyu tawe. Shienyekhanga khukhutsa, shilakhutsa; shienyekhanga khwononyinywa, shiliitsa khwononyinywa. Leshi karikale kalii mmbili kwa shia mulala.” 10Navukula indovoshi ya nakulikha lira “Tsimbavasi”, nindong'ola, khumanyinya ndi lilakano liu Mwami Nyasaye yakhola na vandu vi tsimbia tsiosi, limali khurulitswaho. 11Lilakano lienelo liarulitswaho khulitukhu lienelo, ma vandu vakuulitsanga nivakuulanyinya makondi nivambenza. Nalwo lwa vitsa khumanya ndi ka nakholanga nako ku Mwami Nyasaye yali navooli kikholeshe. 12Navavoolela, “Niiva mulolanga kali malahi khu munyi, ndunji murungu kwanje; navutswa niiva shiumulolanga nu vulahi tawe, muleshe khundunga.” Nalwo lwa vandunga ifetsa vitonye makhomi kavaka.
13Mwami Nyasaye yambolela, “Lakhula mu livishilu li litempeli. Navukula ifetsa vitonye makhomi kavaka yeneyo, nindakhula mu livishilu li litempeli liu Mwami Nyasaye.” 14Nalwo lwa natong'ola indovoshi ya khavili, ya nali ninakulikha lira “Vuhambani”, khurulitsaho vuhambani vwaliho hakari ha Yuda nende Israeli.
15Mwami Nyasaye yambolela, “Yikhole khandi khuli mwayi, navutswa nunundi khuli mwayi mutamanu. 16Nzitsanga khurovola mwayi mu shivala uliitsa khuvula khuheendelakhu mwoyo khali shia likondi liosi lia nilive ni liakora, inoho khukhava yako kaliitsa khuva nikahuya huyanga, inoho khushirikha yako kaliitsa khuva nikasalilitswa, inoho khulinda vulahi yako kaliitsa khuva nikalwalanga. Navutswa aliitsa khulia makondi kalimu makhomeelu, khali ni tsimbakaywa tsiene.
17“Wooyi! Uli khuvutiinyu yivi mwayi mutamanu!
Shichila wayivala shiayo shia makondi!
Nu vulahi khuremakwa mukhono nu khuvekhulitswa imoni yeye isatsa!
Mukhono kwekwe kufwokoye
nu khuvekhulitswa imoni yeye isatsa!”
Currently Selected:
ZAKARIA 11: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
