MARIKO 6

Yesu Yambakhanwa Nazareti

(Mat 13:53-58; Luka 4:16-30)

1Yesu yarula havundu henaho nakalukha mu litaala liavo; ma veechi veve nivamulonda. 2Khulitukhu li Lisabato, yaraanga khwechitsa vandu mu lisinagogi. Vandu vamuhulila vali nilichenya nivareeva, “Ni hena wa mundu uyu yanyola vindu yivi viosi? Nu vusitsa shina vwa Nyasaye yamuha? Akholanga viloleshitsu munjila shina? 3Uyu shiali mufundi, mwana wa Mariya, nali amwavo Yakobo, Yosefu, Yuda nende Simoni? Vambotso veve shivamenyanga na khutsi?” Khulwa yako, vambakhana Yesu.

4Yesu yavavoolela, “Muprofeti aheelwa luyali shia havundu hosi, navutswa avula khuheelwa luyali mu litaala liavo liarulamu inoho mu viikho veve inoho mu vandu vi inzu yeye.”

5Shikali yakholakhu shiloleshitsu shiosi iweneyo tawe; navutswa yavikha makhono keke khu vandu valwalanga valala nivahona. 6Yesu yali nilichenya linyishi muno, shichila vandu venavo vali nivavula lisuuvila.

Yesu Yaruma Varumwa Likhomi na Vavili

(Mat 10:5-15; Luka 9:1-6)

Yesu yasimukha natsia mu michitsi chiali nichiliho himbi, niyechitsanga vandu. 7Yesu yalaanga veechi likhomi na vavili khwitsa halala, navaruma shia vavili. Yavaha vunyali vu khukhunga matimoni 8navavoolela, “Muvuli khuchingakhu shindu shiosi khu luchendo, nikakhali indovoshi yu khuchendela; khali muvuli khuchingakhu mukati inoho musiko ku khusumilamu inoho tsisenti mu visikolo vienyu. 9Mwifwale vilaaro, navutswa muvuli khuchingakhu inguvu yindi ya khavili.” 10Yesu yavavoolela khandi, “Munzu mwa mwinjilitswa, mwikhalemu khutukha lwa murula havundu henaho. 11Niiva muliitsa khutukha mu litaala lia vandu vambakhana khumwinjilitsa inoho vavuli khumuhulila, rulimu mamusukuyi lukuushi khurula mu vilenje vienyu. Yeshio shiliitsa khuva shimanyilu khuvo ndi mulechi.”

12Khulwa yako, varumwa vasimukha nivatsia khwilwatsila vandu vikanile khurula mu vwoni vwavo. 13Vakhunga matimoni manyishi nivavekha vandu vanyishi vali nivalwala makura, navo nivahona.

Likhutsa lia Yohana Mubatisi

(Mat 14:1-12; Luka 9:7-9)

14Mwami Herode#6:14 Herode: Mwamihi wa Galilaya. yahulila makhuva kenako koosi, shichila luyali lwa Yesu lwali lulandi shia havundu hosi. Vandu valala vavoolanga, “Yohana Mubatisi umali khwisimukha khurula mu likhutsa! Nako kachilanga nava nu vunyali vu khukhola viloleshitsu.”

15Valala vavoola khandi, “Ni Eliya.” Vandi nivavoola, “Nu mulala khu vaprofeti vakhale.”

16Lwa Herode yakahulila yavoola, “Yohana Mubatisi, wu murwi kwekwe nahaana lilako khukutuulwa, umali khwisimukha khurula mu likhutsa!” 17Herode mwene, neye wali niyahaana lilako Yohana Mubatisi akumilwi, khandi avohwi mucheela. Herode yakhola ndio, shichila Herodiasi, wa yali niyahila, khali niiva yali mukhali wa amwavo wewe Filipu. 18Yohana Mubatisi yatsililila khuvoolela Herode, “Nu vutamanu khulondokhana khu malako khuhila mukhali wa amwavo wowo!”

19Khulwa yako, Herodiasi yali nu vurima shichila Yohana Mubatisi, khali niyenya khumwiira; navutswa shikanyalikha tawe, 20shichila Herode yali waria Yohana Mubatisi, khandi yali wamanya ndi Yohana nu mundu mulahi khandi nu wi likhola liu vulunji. Khulwa yako, yamulindanga vulahi; khandi yali wayaanza khumuhulishitsa, khali niiva yanyakhananga mu mwoyo shia isaa yosi lwa yamuhulishitsanga.

21Khulitukhu liu khwitsushitsa khwivulwa khwa Herode, vwiyangu vwanyolekha, lwa Herode yalombela vandu va yamihanga navo, vimilili va vasikali veve nende vimilili vandi khurula mu lusomo lwa Galilaya mulukha kwi lilia. 22Mwana wi shikhana wa Herodiasi yinjilamu nasieva khandi nayaanzitsa Herode nende vacheni veve. Mwami Herode yareeva mwana wi shikhana mwenoyo, “Ni shina shia wenyanga khuhe? Shiosi shia wenyanga, niitsa khukhuha.” 23Herode yisuuha namuvoolela, “Shiosi shiundeva, khali inusu yu vwami vwanje, niitsa khukhuha.”

24Khulwa yako, mwana wi shikhana mwenoyo yasimukha natsia ilwanyi, nareeva mama wewe, “Nindeve shina?” Neye yamuchipa, “Murwi kwa Yohana Mubatisi.”

25Mwana wi shikhana mwenoyo yilukhaka nakalukha vwangu khu Mwami Herode namuvoolela, “Nyenyanga umbe murwi kwa Yohana Mubatisi nu kuli khu isahani vwangu!”

26Yaka kalomba Mwami Herode navelela muno; navutswa shiyali wambakhana tawe, shichila yali wisuuhi imbeli wa vacheni voosi.

27Yaruma musikali wewe na malako khulera vwangu murwi kwa Yohana Mubatisi. Musikali mwenoyo yasimukha natsia mucheela, nareema murwi kwa Yohana Mubatisi. 28Yakulera nu kuli khu isahani naha mwana wi shikhana mwenoyo; ye naha mama wewe. 29Lwa veechi va Yohana Mubatisi vahulila ndio, vasimukha nivatsia khuvukula mmbili kwa Yohana nivakuyeveela mu shilindwa.

Yesu Yaliishitsa Vasatsa Tsihelefu Tsiranu

(Mat 14:13-21; Luka 9:10-17; Yoh 6:1-14)

30Varumwa vakalukha khu Yesu, nivamuvoolela shia shindu shiosi shia vali nivakholi khandi niveechitsi. 31Vandu valiho vanyishi viitsanga nivatsia, nikachila Yesu nende veechi veve nivavula vwiyangu vukhulia. Nalwo lwa Yesu yavavoolela, “Chendi khutsi vene havundu ha khunyala khuhulushila vonyene.” 32Vanina mu liaro nivatsia havundu ha vene vanyala khuva vonyene.

33Navutswa vandu vanyishi vavalola nivasimukhanga ni vavamanya vwangu. Varula mu mataala koosi ni vilukhakanga khu vilenje nivaraanga khutukha havundu henaho, Yesu nende veechi veve nivashili khutukhaho. 34Lwa Yesu yarula mu liaro, yalola shituma shikali shia vandu navalolela tsimbavasi, shichila vali khuli makondi kavula mwayi. Khulwa yako, yaraanga khuveechitsa vindu vinyishi. 35Lwa shivala shiali nishimwamanga, veechi veve vatsia khuye nivavoola, “Shivala shimwami khale; khandi ha khuli hanu ni ha vwivisi. 36Seevula vandu vatsi mu milimi chili himbi hanu nende mu michitsi khukuula vene shiukhulia shia valia.”

37Yesu yavachipa, “Munyi vene muvahe shiukhulia shia vanyala khulia.”

Vamureeva, “Wenyanga khutsi vene khutsia khukuula mikati chitukha tsidinari tsimia tsivili khukuula shiukhulia shiu khuvaliishitsa?”

38Yesu yavareeva, “Muli ni mikati chianga? Simushi mutsi mulole.”

Lwa vanyola, vamuchipa, “Khuli ni mikati chiranu nende tsisutsi tsivili vutswa.”

39Yesu yavoolela veechi veve vakavuli vandu mu vituma khandi vikhale hasi khu vunyasi. 40Vandu vikhala hasi mutsimbaso, mu vituma via vandu imia indala, khandi mu vituma via vandu makhomi karanu. 41Yesu yavukula mikati chiranu nende tsisutsi tsivili, naheenza mwikulu, nasanditsa Nyasaye. Yatong'olanyinya mikati naha veechi veve vakavulili vandu. Yakavula khandi tsisutsi tsienetso khuvo voosi. 42Vandu voosi valia nivikura. 43Veechi vavunjelitsa mihinda likhomi na chivili nichitsuli mikati nende tsisutsi tsiali nitsirikale. 44Isavu ya vandu vasatsa valia vali tsiheelefu tsiranu.

Yesu Yachenda khu Matsi

(Mat 14:22-33; Yoh 6:15-21)

45Yesu yavoolela veechi veve vinjili mu liaro vwangu khwimila imbeli wewe khutsia mu litaala lia Betsesaida, khuluveka lundi lwi inyanza, ye nashiseevula shituma shia vandu khutsia. 46Lwa yali niyakhaseevula vandu, yasimukha natsia khusaala khu shikulu. 47Lwa khulukolovo khwatukha, liaro liali nilili hakari mu inyanza, na Yesu narikala wonyene khuluchinga. 48Yesu yalola veechi veve nivanyakhananga khandi nivachemulila khuluka liaro liavo, shichila imbuutsa yali nihuutsanga imbeli wavo. Hakari wi tsisaa tisa nende tsisaa likhomi na tsivili mu mavwevwe, yasimukha natsia wa vali nivali nachendanga khu matsi. Yali himbi khuvavirakhu, 49navutswa lwa vamulola nachendanga khu matsi, vakanakana ni shinanyenzo, nivalaanjilila. 50Lwa voosi vamulola vatechela.

Yesu yalomaloma khuvo vwangu navoola, “Ninzi; muvuli khuria. Vi ni ikholo!” 51Khulwa yako, yanina mu liaro navo, ma imbuutsa nihonjela. Veechi veve vali nilichenya linyishi muno, 52shichila shivali nivamanyikhu shivune shiatoto shiukhuliishitsa vandu vasatsa tsiheelefu tsiranu tawe; shichila vwoongo vwavo vwavikalila khuvula khumanya.

Yesu Yahonyinya Valwale Genesareti

(Mat 14:34-36)

53Vambukha inyanza nivatukha mu litaala lia Genesareti, ha vavoha liaro liavo khundulu khwi inyanza. 54Lwa varula mu liaro, vandu vamanya Yesu vwangu. 55Khulwa yako, vilukhaka nivatsia shia havundu hosi mu lusomo lwenelo; khandi shia havundu hosi wa vahulilanga aliyo, vamulerelanga vandu valwala nivakoni khu viseelo viavo. 56Havundu hosi ha Yesu yatsitsanga, kave mu michitsi inoho mu mataala inoho mu milimi, vandu vachinganga vandu valwala nu khuvahila mu tsisokoni, vamusaya nayaanza ahuchilile vandu venavo khutiila khu lupindo lwi inguvu yeye; voosi vatiilakhu vahonanga.

Currently Selected:

MARIKO 6: LLLCATHOLIC

Highlight

Copy