MATAYO 21

Yesu yinjila Yerusalemi ni Likhoya Muno

(Mk 11:1-11; Luka 19:28-40; Yoh 12:12-19)

1Lwa Yesu nende veechi veve vali nivali himbi khutukha Yerusalemi, vatsia Betsefage, khu Shikulu shia Misayituni; wa Yesu yaruma veechi veve vavili, 2navavoolela, “Simushi mutsi mu muchitsi kuli imbeli wenyu yoko; muliitsa khunyola ipunda nivoheelwi nende shimoli shiayo; mutsivoholole munderele vwangu. 3Niiva mundu aliitsa khumuvoolela shindu shiosi, muvooleli, ‘Muruchi, avienyanga’, khandi aliitsa khuvikalushitsa vwangu.”

4Yaka kikholekha khurweshitsa ku muprofeti yavoola,

5“Voolela vandu va Sayoni,

Loli, mwami wenyu yitsanga khu munyi!

Numwichehitsi khandi unini khu ipunda khandi khu shimoli shi ipunda.”

6Veechi vasimukha nivatsia, nivakhola khuli Yesu yali navooli. 7Valera ipunda nende shimoli shiayo; nivavikha tsinguvu tsiavo khutsio, ma Yesu niyikhalakhu. 8Shituma shia vandu vanyishi vaala tsinguvu tsiavo khu muhaanda; na vandi nivareema tsisia khurula khu misala, nivaala khu muhaanda. 9Vituma via vandu vachendanga imbeli wa Yesu nende yavo vamulondanga inyuma wewe valaanjilila, nivavoola, “Hosana#21:9 Hosana: likhuva yili livoolanga “Mwami Nyasaye yitsominywi.” khu Mwitsukhulu wa Daudi! Nyasaye akasitse woyo witsanga khuvirila mu lira liu Mwami! Hosana ikulu mwikulu!”

10Lwa Yesu yinjila Yerusalemi, vandu voosi mu litaala likali lienelo vali nu vukoyanu, nivareeva, “Mundu uyu ni viina?”

11Vituma via vandu vachipa, “Uyu neye Muprofeti Yesu, khurula mu litaala lia Nazareti mu lusomo lwa Galilaya.”

Yesu Yatsia mu Litempeli

(Mk 11:15-19; Luka 19:45-48; Yoh 2:13-22)

12Yesu yinjila mu Litempeli, nakhunga ilwanyi yavo voosi vali nivakuulanga vindu nivakuulitsila mwenomo. Yatikaalitsa tsimesa tsia vakalukhanyinyi vi tsisenti tsi vivala vindi mu tsisenti tsi vivala viavo khandi natikaalitsa visoko via vandu vakuulitsanga vinamusotsi. 13Yesu yavavoolela, “Kahandikwa mu Mahandiko Matakatifu ndi Nyasaye yavoola, ‘Litempeli lianje lilalaangwa inzu yi lisaala,’ navutswa munyi mulikholi khuva shivisilu shia vanuuli.”

14Vandu vavekhula nende valema vatsia khu Yesu nali mu Litempeli, navahonyinya. 15Navutswa lwa vasalisi vakali nende veechitsi va Malako valola vindu viu khuchenyinya via yali nakholi; khandi vaana nivalaanjililanga mu Litempeli nivavoola, “Hosana khu Mwitsukhulu wa Daudi!” Vali nu vurima, 16nivareeva Yesu, “Uhulilanga makhuva ka vavoolanga?” Yesu yavachipa, “Katoto mbulilanga; navutswa mushili khusomakhu Mahandiko Matakatifu yaka?

‘Mwayechitsa vaana nende vaana vatoro

khumwitsominya munjila yu vuseletse.’ ”

17Yesu yarulaho, natsia mu litaala lia Betsania, wa yakona vutukhu vwenovo.

Yesu Yalaama Musala ku Mukhuyu

(Mk 11:12-14,20-24)

18Litukhu lialondakhu nu kushili mu mavwevwe, lwa Yesu yali nakalukhanga mu litaala likali lienelo, inzala yamuleka. 19Yalola musala ku mukhuyu khuluveka lundi khu muhaanda, niyisuunda khukwo himbi; navutswa avulakhu litunda lia yanyolakhu, nikakhali masambu konyene. Yesu yavoolela mukhuyu kwenoko, “Litunda livuli khwamakhu khurula khu yivi!” Musala ku mukhuyu kwenoko kwaniala vwangu. 20Lwa veechi veve vakulola vali nilichenya, nivareeva, “Musala ku mukhuyu yuku kuniali ndina vwangu?”

21Yesu yavachipa, “Muvoolelanga kilikali ndi niiva munyala khusuuvila vuchila khuhaya haya, muliitsa khuva nu vunyali vu khukhola kakholi khu musala ku mukhuyu yuku. Shikali kenako konyene tawe; navutswa khali muliitsa khuva nu vunyali vukhuvoolela shikulu yishi, ‘Rinyukha wisiuvi mu inyanza’, nako kaliitsa khwikholekha ndio. 22Niiva muli ni lisuuvila, muliitsa khunyola shia shindu shiosi shiamureeva khuvirila mu lisaala.”

Lireevo khu Vunyali vwa Yesu

(Mk 11:27-33; Luka 20:1-8)

23Yesu yinjila mu lwanyi mwi Litempeli; khandi lwa yali niyechitsanga, vasalisi vakali, nende vasakhulu vatsia khuye; nivamureeva, “Ni hena wa wanyola vunyali vu khukhola vindu yivi? Ni viina wakhuha vunyali vwenovo?”

24Yesu yavachipa, “Leshi nunundi mureeve lireevo lilala; khandi niiva mulanjipa, namuvoolela vunyali vwandi navwo vuchilanga nikhola vindu yivi. 25Vunyali vwa Yohana vukhubatisa vwarula hena? Vwarula khu Nyasaye inoho khu vandu?” Varanga khureevana vene khuvene, nivavoola, “Nu khuvoole shina? Niiva khulavoola, ‘Khurula khu Nyasaye,’ alareeva, ‘Shichila shina numuvula khusuuvila Yohana?’ 26Navutswa niiva khulavoola ‘Khurula khu vandu,’ khuliitsa khuva khurili shia vandu vakhukhola shichila voosi vali ni lisuuvila ndi Yohana yali muprofeti.” 27Khulwa yako, vachipa Yesu, “Khushili khumanya.” Yesu yavavoolela, “Khali inzi shinyala khumuvoolela nu vunyali shina vuchilanga nikhola vindu yivi tawe.

Lukanu khu Tata nende Vaana veve Vavili vi Shiyayi

28“Ni shina shia mukanakananga? Litukhu lindi, khwali nu mundu wali na vaana veve vavili vi shiyayi. Yatsia khu mwana wewe mukhulundu, navoola, ‘Mwana wanje, simukha utsi khukhola muhinzilu mu mulimi kwi misabibu.’ 29Mwana mukhulundu mwenoyo yachipa, ‘Shinyala khutsia tawe,’ navutswa tsisaa ni tsiakhavirakhu yakanakana khandi natsia. 30Tata yasimukha natsia khandi khu wa khavili namuvoolela malala mele; khandi namuchipa, ‘Tata, natsia,’ navutswa yambakhana khutsia khukhola muhinzilu mu mulimi. 31Khulwa yako, ni viina khu vavili venavo wakhola ka tata wewe yenyanga?” Vachipa, “Mwana mukhulundu.”

Yesu yavavoolela, “Muvoolelanga kilikali ndi vasololi vu vushuru nende malaaya valiitsa khwinjila mu Vwami vwa Nyasaye imbeli wenyu. 32Yohana yitsa khu munyi namumanyinya injila yu vulunji, nu mwambakhana khusuuvila muye; navutswa vasololi vu vushuru nende malaaya vasuuvila muye. Khali lwa mwalola ndio, mwambakhana khwikanila khurula mu vwoni vwenyu nu khusuuvila muye.

Lukanu khu Vandu Vakoteshitswa Mulimi

(Mk 12:1-12; Luka 20:9-19)

33“Hulishitsikhu lukanu lundi: Litukhu lindi, khwaliho nu mwene mulimi wali niyaraaka misabibu mu mulimi kwekwe; manakwevela lukaka. Yayeeva vwina havundu hu khukhamululila idivai, maniyumbakha munaara ku khusinjilakhu nivalinda mulimi. Yakukoteshitsa khu valimi vakoteshitswa, natsia mu luchendo ihale wene. 34Lwa litukhu liatukha liu khuchesa, yaruma varumishi veve khu valimi vakoteshitswa, vamuheekhu shitonye shieshie khurula khulichesa liavo. 35Valimi vakoteshitswa venavo vakumila varumishi venavo; varumula mulala, niviira wundi, khandi nivalesa wundi na machina. 36Yaruma khandi varumishi vandi khuvo vanyishi, khuvira vu khuraanga; khandi valimi vakoteshitswa vavakhola malala mele. 37Lukhumalilikha, yaruma mwana wewe khuvo; navoola, ‘Valiitsa khuha mwana wanje luyali.’ 38Navutswa lwa valimi vakoteshitswa valola mwana mwenoyo. Vavoolelana vene khuvene, ‘Uyu neye mwana wa mwene mulimi. Hambi, khumwiiri khunyole miandu chiechie.’ 39Vamukumila, nivamusiuva ilwanyi wu mulimi kwi misabibu, manivamwiira.

40“Lwa mwene mulimi kwi misabibu aliitsa khwitsa, aliitsa khukhola shina khu valimi vakoteshitswa?” 41Vamuchipa, “Aliitsa khwiira valimi vakoteshitswa venavo; mahaane mulimi kwi misabibu kwenoko khu valimi vakoteshitswa vandi valiitsa khumuhaakhu shitonye khurula khulichesa liavo mumatukhu kenyekhanga.”

42Yesu yavavoolela, “Mushili khusomakhu shia Mahandiko Matakatifu kavoolanga?

‘Lichina lia vumbashi vambakhana livula vukhonyi

lianyolekha khuva lichina liu mukona li tsingulu khuvira kandi koosi.

Yaka nako ku Mwami Nyasaye yakhola;

nikava ku khuchenyinya mu tsimoni tsieru!’

43“Khulwa yako, muvoolelanga ndi Vwami vwa Nyasaye vuliitsa khuvukulwa khurula mu munyi, nu khuhaanwa khu vandu valiitsa khukhola vikholwa vilahi.” [ 44Shia mundu wosi nakwa khu lichina lienelo, aliitsa khusionokhamu akwi lukuushi; navutswa niiva lichina lienelo liliitsa khukwa khu mundu wosi, liliitsa khumusionola akwi lukuushi.]#21:44 Mahandiko kandi kakhale kavula luvaso lwa 44.

45Lwa vasalisi vakali nende Vafarisayo vahulila tsinganu tsia Yesu tsienetso, vamanya alomolomanga khulondokhana khuvo. 46Lwa vachelitsa khukumila Yesu, varia vandu, shichila vandu vasuuvila Yesu neye muprofeti.

Currently Selected:

MATAYO 21: LLLCATHOLIC

Highlight

Copy