LEVI 7

Vihanwa viu Khuvasa

1“Yaka nako malako khulondokhana khu vihanwa viu khuvasa. Vihanwa vienevo ni vitakatifu muno. 2Muruku kwi vihanwa viu khurulitsaho vutamanu, kuliitsa khusinzwa khuluveka luli ivuluka wu vwaali, havundu ha vasinzilanga miruku chi vihanwa viu khusambwa. Masahi ku muruku kwenoko, kaliitsa khumitswa khu tsimbeka tsiosi tsine tsiu vwaali. 3Shivana shiakwo shiosi shilitsa khurulitswa nu khuhaanwa khuli shihanwa khu vwaali. Valiitsa khuhaana shivana shiu mushila, shivana shiahaambana khu viungu viu munda, 4tsimbiko nende shivana shili khutsio, khandi luveka lulahi muno lwi ingurumani. 5Musalisi aliitsa khusambila shivana shiosi khu vwaali, khuli shihanwa shi shiukhulia khu Mwami Nyasaye. Ni shihanwa shiu khuvasa. 6Shia mundu musatsa wosi urulanga mu inzu yu vusalisi anyala khulia shihanwa shienesho; navutswa valiitsa khulia shihanwa shienesho, nivali Havundu Hatakatifu. Ni shihanwa shitakatifu muno.

7“Lilako lilala lienelo linyala khurumikha, lwa muliitsa khuhaana shihanwa shiu khurulitsaho vwoni nende shihanwa shiu khuvasa. Inyama iliitsa khuva yu musalisi wu kholanga musango ku khusemeha vandu khurula mu vwoni. 8Musalisi wu kholelanga mundu musango kwi shihanwa shiu khusambwa, aliitsa khwivukulila liseelo liu muruku kwi shihanwa shiu khusambwa, kwa yali nahaani. 9Shihanwa shiu vusi shiosi, shia vateshela mu lijiko inoho khu luchio inoho khu lukalayi, shiliitsa khuva shiu musalisi uhaananga shihanwa shienesho. 10Shihanwa shi imu shiosi, shia tsukanywa na makura inoho shiuminywa, shiliitsa khuva shia vaana voosi va Haruni, khandi shilitsa khukavulwamu shilala.

Vihanwa viu Khulera Milembe

11“Yaka nako ni malako khulondokhana khu vihanwa viu khulera milembe, viu mundu ahaananga khu Mwami Nyasaye. 12Niiva mundu aliitsa khuhaana shihanwa yishi, khuli shihanwa shiu khusanditsa Nyasaye, aliitsa khuhaana shihanwa shiu mukati kwalombwa vuchila mamela, halala nu muruku ku khukholela musango: Khali chive ni mikati chialombwa khu vusi chia tsukanywamu makura ku musayituni inoho visikuti via vekhwakhu makura ku musayituni inoho tsikeki tsialombwa khu vusi, tsia tsukanywamu makura ku musayituni. 13Khumeeta khu shihanwa shiu khulera milembe, aliitsa khuhaana mikati chialombwa na mamela. 14Aliitsa khuhaana shitonye shilala shiu mukati lukanu, khuli shihanwa khu Mwami Nyasaye. Shiliitsa khuva shiu musalisi uvukulanga masahi ku muruku kwi shihanwa shiu khulera milembe, khukanitsa khu vwaali. 15Muliitsa khulia inyama yu muruku kwenoko khulitukhu lia muliitsa khukholela musango. Inyama iliitsa khuvula khurikalakhu nikoni khutukha mu mavwevwe. 16Navutswa niiva shihanwa shieshie shili khulondokhana khu lisuuhitswa, inoho shihanwa shiu khwirulitsa nu mwoyo kwosi khuhaana, muliitsa khulia shihanwa shienesho, khulitukha lia muliitsa khukholela musango; navutswa inyama yindi yosi iliitsa khuvula khurikalakhu nikoni khutukha khulitukhu lilondakhu. 17Inyama yosi iliitsa khuva nirikale nikoni khutukha khulitukhu lia khavaka, iliitsa khusambwa nu mulilu. 18Niiva muliitsa khulia inyama yosi yi shihanwa shiu khulera milembe, khulitukhu lia khavaka; mundu wu kholanga musango kwenoko aliitsa khuvula khuhuchililwa inoho khwitsominywa shichila shihanwa shienesho. Shihanwa shienesho shiliitsa khuva shi shifwavi, khandi mundu uliitsa khulia, shienesho shihanwaaliitsa khusalilitswa shichila vwoni vwevwe. 19Niiva inyama yeneyo iliitsa khutiila khu shindu shioneshe, khulondokhana khu mulukha, muliitsa khuvula khuchilia; navutswa iliitsa khusambwa nu mulilu.

“Shia mundu wosi nali munihu khulondokhana khu mulukha, anyala khulia inyama yeneyo, 20navutswa niiva mundu aliitsa khuva woneshe, khulondokhana khu mulukha aliitsa khuchilia, mundu mwenoyo aliitsa khukhungwa khurula mu vandu vu Mwami Nyasaye. 21Niiva mundu aliitsa khutiila khu shindu shioneshe, vuve vonekhu vu mundu inoho vurulanga mu muruku kwoneshe inoho shindu shiosi shioneshe, ma kaloleshe uliliikhu inyama yu muruku kukholelwi musango kwi shihanwa shiu khulera milembe khu Mwami Nyasaye; mundu mwenoyo, aliitsa khukhungwa khurula mu vandu vu Mwami Nyasaye.” 22Mwami Nyasaye yavoolela Musa, 23“Voolela Vaisraeli, ‘Muvuli khuliakhu shivana shiosi, khurula mu tsing'ombe, makondi, inoho mu tsimbuli. 24Shivana shiu muruku kumali khukhutsa kwene vutswa, inoho kwi inyama yumbulimu yiira, shilitsa khurumishilwa khukhola muhinzilu kundi, navutswa muliitsa khuvula khulia shivana shienesho. 25Shia mundu wosi uliitsa khuliakhu shivana shiu muruku kwa vahaana, khuli shihanwa shi shiukhulia khu Mwami Nyasaye, aliitsa khukhungwa khurula mu vandu vu Mwami Nyasaye. 26Khali ndio, muliitsa khuvula khung'wa masahi koosi, kave ki linyonyi inoho ku muruku kwosi, ha muliitsa khuva numumenyanga. 27Mundu uliitsa khung'wakhu masahi, aliitsa khukhungwa khurula mu vandu vu Mwami Nyasaye.’ ”

28Mwami Nyasaye yavoolela Musa, 29“Voolela Vaisraeli, ‘Mundu uliitsa khuhaana shihanwa shiu khulera milembe khu Mwami Nyasaye, aliitsa khulera shihanwa shieshie khu Mwami Nyasaye, khurula khu musango kwi shihanwa shiu khulera milembe. 30Aliitsa khulera mwene shihanwa shi shiukhulia. Aliitsa khulera shivana shiu muruku nende tsimbele tsiakwo nu khuhaana khuli shihanwa shitakatifu khu Mwami Nyasaye. 31Musalisi aliitsa khusambila khu vwaali shivana shienesho, navutswa tsimbele, tsiliitsa khuva tsia vasalisi. 32Shilenje shinyuma shisatsa shiu muruku kwenoko, shilitsa khuhaanwa khuli ni shihanwa khu musalisi, khurula mu shihanwa shiu khulera milembe. 33Musalisi uhaananga masahi nende shivana shi shihanwa shiu khulera milembe, aliitsa khunyola shilenje shinyuma shisatsa shiu muruku khuli shitonye shieshie. 34Tsimbeele tsiu muruku kwenoko ni shihanwa shilahi muno, khandi shilenje shisatsa shinyuma shiu muruku kwenoko ni shindu shilahi muno shiu Mwami Nyasaye anyoli khurula mu Vaisraeli nu khuha vasalisi. Yivi navio vindu via Vaisraeli valiitsa khuha vasalisi matukhu koosi kaliitsa khuvaho. 35Yishi nashio shiali shitonye shi shiukhulia shiahaanwa khu Mwami Nyasaye, shia Haruni halala na vaana veve vanyola khulitukhu lia vakholwa khuva vusalisi. 36Khulitukhu lienelo, Mwami Nyasaye yavoolela Vaisraeli vavahe shitonye shi shihanwa yishi: Ni lilako lia Vaisraeli valiitsa khulonda khumatukhu koosi kaliitsa khuvaho.’ ”

37Yaka nako malako khulondokhana khu vihanwa viu khusambwa, shihanwa shi imu, shihanwa shiu khurulitsaho vwoni, shihanwa shiu khuvasa, shihanwa shiu khukhola shindu khuva shitakatifu, nende shihanwa shiu khulera milembe, 38shiu Mwami Nyasaye khu Musa nali khu Shikulu shia Sinai yahaana khulitukhu lia Musa yavoolela Vaisraeli valere vihanwa viavo khu Mwami Nyasaye, lwa vali nivali mu Shiangalangwi shia Sinai.

Currently Selected:

LEVI 7: LLLCATHOLIC

Highlight

Copy