LEVI 4

Vihanwa viu Khuhaana mundu Niyitsukhane Nakholi Vwoni

1Mwami Nyasaye yavoolela Musa, 2“Voolela Vaisraeli, Niiva mundu aliitsa khwitsukhana nakholi vwoni, mu shilala khu vindu via Malako ku Mwami Nyasaye yambakhana vivuli khukholwa -- 3niiva nu Mukali wa vasalisi voosi, aliitsa khuva nakholi vwoni, aliitsa khuhaana shihunwa vuchila imbala yosi nu khusinza, khuli musango khu Mwami Nyasaye, shichila vwoni vwevwe. 4Aliitsa khulera shihunwa shienesho mu vwinjililu vwi Liheemo Litakatifu, khutiila mukhono kwekwe khu murwi kwashio; khandi ashisinzile hawenaho imbeli wu Mwami Nyasaye. 5Mukali wa vasalisi voosi aliitsa khuvukula masahi ki shihunwa shienesho, akahile mu Liheemo Litakatifu. 6Aliitsa khwinikha shitere shieshie mu masahi, makamitse hali saba imbeli wu luvaala lutakatifu. 7Musalisi aliitsa khuvekha masahi malala khu misala chiasinjilitswa mu tsimbeka tsiu vwaali, vu vubani vusambilwakhu mu Liheemo Litakatifu. Aliitsa khusuundula masahi kandi karikale khu vwalilu vu vwaali, ha misango chisambilwangwa, vuli mu vwinjililu vwi Liheemo Litakatifu. 8Aliitsa khurulitsa shivana shiosi mu shihunwa shienesho, khali shivana shi viungu viu munda, 9tsimbiko tsivili tsiosi nende shivana shiatsio, nende luveka lulahi lwi ingurumani. 10Musalisi aliitsa khuvukula shivana shienesho, asambile khu vwaali, vwa vasambilakhu vihanwa viu khusambwa, khuli akholanga khu shivana shiruli mu muruku kwasinzwa kwi shihanwa shiu khulera milembe. 11Navutswa aliitsa khuvukula liseelo liashio, inyama yashio yosi, murwi kwashio, vilenje viashio, nende viungu viosi viu munda, khali maala; 12aliitsa khuvichinga viosi khuvirulitsa mu maheemo ka vandu vamenyamu, khuhila havundu hanihu khulondokhana khu mulukha ha vasiuvanga likooshe; nu khuvisambilaho khu mulilu kwi tsikhuyi.

13“Niiva Vaisraeli voosi valiitsa khwitsukhana nivakholi vwoni, mu likhola shindu shia Malako ku Mwami Nyasaye kambakhana, khali niiva vandu venavo vamanyi vutamanu vwa vene vakholi; 14lwa vwoni vwa vakholi vuliitsa khuva nu vumanyikhane havulavu, Vaisraeli voosi valiitsa khulera shihunwa shi shihanwa, shiu khurulitsaho vwoni imbeli wi Liheemo Litakatifu; 15ma vimilili voosi va Vaisraeli vatiile makhono kavo khu murwi kwi shihunwa shienesho; shihunwa shienesho shilitsa khusinzilwa henaho. 16Mukali wa vasalisi voosi, aliitsa khuhila masahi malala mu Liheemo Litakatifu. 17Aliitsa khwinikha shitere shieshie mu masahi kenako akamitse hali saba imbeli wu luvaala. 18Aliitsa khuvikha masahi malala khu misala chiasinjilitswa mu tsimbeka tsiu vwaali vu vubani mukari mwi Liheemo Litakatifu. Aliitsa khusuundula khandi masahi, kaliitsa khuva nikarikale khu vwalilu vu vwaali vwi vihanwa viu khusambwa, vuli mu vwinjililu vwi Liheemo Litakatifu. 19Aliitsa khurulitsamu shivana shiosi nu khusambila khu vwaali; 20aliitsa khukhola malala mele khu shihunwa shienesho. Khuli lwa yakhola khu shihunwa shia vali nivasinza shi shihanwa shiu khurulitsaho vwoni, nindio aliitsa khukhola khandi. Mukali wa vasalisi voosi aliitsa khukhola musango, shichila vwoni vwa vandu; navo valiitsa khusemehwa.

21“Mukali wa vasalisi voosi aliitsa khurulitsa shihunwa mu maheemo ka vandu vamenyamu nu khusamba shihunwa shienesho, khuli yasamba shihunwa shiu khurulitsaho vwoni vwevwe. Nashio shihanwa shiu khurulitsaho vwoni vwa Vaisraeli voosi.

22“Niiva mwamihi aliitsa khwitsukhana nakholi vwoni, mu likhola shindu shilala khu vindu via malako ku Mwami Nyasaye, uli Nyasaye wewe kambakhana, ukholi vutamanu; 23lwa vwoni vwevwe vwava nakholi vuliitsa khuva nu vumanyikhane havulavu, aliitsa khulera khuli shihanwa shieshie imbuli ikhole vuchila imbala yosi. 24Aliitsa khutiila mukhono kwekwe khu murwi kwayo, achisinzile khuluveka luli ivuluka wu vwaali, havundu ha vasinzilanga muruku chi vihanwa viu khusambwa. Nashio shihanwa shiu khurulitsilaho vwoni. 25Nalwo lwa musalisi aliitsa khwinikha shitere shieshie mu masahi ku muruku kwenoko, akaveshe khu misala chiasinjilitswa mu tsimbeka tsiu vwaali, nu khusuundula masahi malala karikale khu vwalilu vu vwaali. 26Aliitsa khusambila shivana shiosi khu vwaali, khuli yasamba nu mulilu shivana shi shihanwa shiu khulera milembe. Munjila iyi musalisi aliitsa khuva nakholi musango ku khurulitsaho vwoni vu mwamihi mwenoyo; naye aliitsa khusemehwa khurula mu vwoni vwevwe.

27“Niiva mulala khu Vaisraeli aliitsa khwitsukhana nakholi vwoni, mu likhola shilala khu vindu via malako ku Mwami Nyasaye kambakhana, ukholi vutamanu, 28lwa vwoni vwevwe vwava nakholi vuliitsa khuva nu vumanyikhane havulavu, aliitsa khulera imbuli vuchila imbala yosi, khuli shihanwa shieshie, shichila vwoni vwevwe vwa ye mwene akholi. 29Aliitsa khutiila mukhono kwekwe khu murwi kwayo, achisinzile khuluveka luli ivuluka wu vwaali, havundu ha vasinzilanga miruku chi shihanwa shiu khusambwa. 30Musalisi aliitsa khwinikha shitere shieshie mu masahi ku muruku kwenoko, akaveshe khu misala chiasinjilitswa mu tsimbeka tsiu vwaali, naye aliitsa khusuundula masahi kaliitsa khuva nikarikale khu vwalilu vu vwaali. 31Aliitsa khurulitsa shivana shiosi, khuli shivana shiarulitswa mu muruku kwi shihanwa shiu khulera milembe; ma musalisi asambile khu vwaali khu mwayu kuhuunyanga nu kurulamu kuyaanzitsi Mwami Nyasaye; munjila iyi musalisi aliitsa khukhola musango ku khurulitsaho vwoni vu mwamihi mwenoyo; naye aliitsa khusemehwa khurula mu vwoni vwevwe.

32“Niiva mundu aliitsa khulera likondi khuli shihanwa shiu khurulitsaho vwoni, aliitsa khulera likondi likhali vuchila imbala yosi. 33Aliitsa khutiila mukhono kwekwe khu murwi kwalio, nu khulisinzila khuluveka luli ivuluka wu vwaali, havundu ha vasinzilanga miruku chi vihanwa viu khusambwa. 34Musalisi aliitsa khwinikha shitere shieshie mu masahi ku muruku kwenoko, akaveshe khu misala chiasinjilitswa mu tsimbeka tsiu vwaali; nu khusuundula kaliitsa khuva nikarikale khu vwalilu vu vwaali. 35Musalisi aliitsa khurulitsamu shivana shiosi khuli shivana shiarulitswa mu likondi li shihanwa shiu khulera milembe; ma musalisi alisambila khu vwaali vihanwa vi viukhulia khu Mwami Nyasaye. Munjila yeneyo, musalisi aliitsa khukhola musango ku khurulitsaho vwoni vu mundu mwenoyo; naye aliitsa khusemehwa khurula mu vwoni vwevwe.

Currently Selected:

LEVI 4: LLLCATHOLIC

Highlight

Copy