LEVI 22

Vutakatifu vwi Vihanwa

1Mwami Nyasaye yavoolela Musa, 2“Voolela Haruni nende vaana veve vahaane luyali khu vihanwa vitakatifu via Vaisraeli vakholanga khuva vitakatifu khwinzi, nikanyalikha khuvula khwononyinya lira lianje litakatifu. Ninzi Mwami Nyasaye. 3Vavoolele ndi niiva mulala khu vitsukhulu vavo aliitsa khwisuunda himbi khu vihanwa vitakatifu via Vaisraeli vakholi khuva vitakatifu khwinzi, mundu mwenoyo aliitsa khwiyononyinya khumatukhu koosi kaliitsa khuvaho, khandi aliitsa khukhungwa khurula mu vandu vaanje. Ninzi Mwami Nyasaye.

4“Mundu avulakhuho mu vitsukhulu va Haruni walwala vulwale vu vuchele, inoho urulanga mahila mu mmbili kwekwe, uliitsa khuliakhu vihanwa vitakatifu, nashili khuva munihu khulondokhana khu mulukha. Mundu uliitsa khutiila khu shindu shiosi shionoshe, natiili khu mmbili ku mundu wakhutsa, inoho khwinyala tsingulu tsiu lwivulu, 5inoho uliitsa khutiila khu muruku kwosi kwononyinywa, kunyala khumwononyinya inoho khu mundu unyala khumwononyinya, 6mundu khuli mwenoyo, alatsililila khuva woneshe khutukha halukolovo. Aliitsa khuvula khuliakhu, khali shilala khu vihanwa vitakatifu viosi, vuchila khwisinga na matsi. 7Lwa liuva liliitsa khuva niliyeelanga, aliitsa khuva munihu. Namali khukholwa ndio, nalwo lwa anyala khulia vihanwa vitakatifu, shichila ni shiukhulia shieshie. 8Musalisi aliitsa khuvula khuliakhu inyama yu muruku kwosi kwakhutsa, inoho kwiirwa ni tsinyama tsiumbulimu, khu avuli khwiyononyinya. Ninzi Mwami Nyasaye, uchilanga numuva vatakatifu.

9“Vasalisi voosi valiitsa khulonda mivaalo kaanje, vavuli khukhola vwoni nu khwiirwa. Ninzi Mwami Nyasaye, uchilanga nivava vatakatifu.

10“Mundu uvulanga khurula mu vandu vi inzu ya vandu vuluhia lwa vasalisi, aliitsa khuvula khulia vihanwa vitakatifu. Mundu wundi wosi mucheni wumenyanga nu musalisi inoho mundu wu musalisi yasamulitsa khu muhinzilu kwekwe, aliitsa khuvula khuliakhu vihanwa vitakatifu. 11Navutswa niiva musalisi, aliitsa khuva wakuula murukwa ni tsisenti tsietsie, murukwa mwenoyo neye uliitsa khuliakhu. Niiva murukwa wayivulwa mu vandu vi inzu yeye, murukwa mwenoyo anyala khulia shiukhulia shiu musalisi. 12Mwana wi shikhana wu musalisi watsia lukhali khu musatsa uvulanga khurula mu vandu vi inzu yu vusalisi, aliitsa khuvula khuliakhu vihanwa vitakatifu. 13Navutswa niiva mwana wi shikhana wu musalisi, aliitsa khukwa mukhutsakhali inoho aliitsa khulekhana nu musatsa wewe, nikhali avula mwana wa yivula; navutswa wakalukha khumenya mu inzu ya tata wewe, khuli lwa yamenyamu nashili muvukha, mwana wi shikhana mwenoyo, anyala khulia khu shiukhulia shia tata wewe. Mundu urulanga mu vandu vi inzu ya vandu vuluhia lwa vasalisi, neye wonyene uliitsa khulia.

14“Niiva mundu uvulanga khurula mu vandu vuluhia lwa vasalisi, aliitsa khwitsukhana nalia shihanwa shiosi khu vihanwa vitakatifu vienevo, mundu mwenoyo aliitsa khurunga khu musalisi vukuuli vwashio vwosi; nu khumeetakhu murungu kwa makhomi kavili mu imia indala. 15Vasalisi valiitsa khuvula khwononyinyakhu vihanwa vitakatifu via Vaisraeli vahaananga khuli vihanwa khu Mwami Nyasaye, 16lwa vahuchililanga mundu uvulanga khurula mu vandu vuluhia lwa vasalisi khuvilia. Kanyala khuchila mundu mwenoyo khulola ukholi vutamanu nu khusalilitswa. Ninzi Mwami Nyasaye, uchilanga vihanwa vienevo khuva vitakatifu.”

17Mwami Nyasaye yavoolela Musa, 18“Lomoloma khu Haruni, nende vaana veve halala na Vaisraeli voosi, uvavoolele, Niiva mundu Muisraeli inoho mundu mucheni wumenyanga mu munyi, aliitsa khuhaana shihanwa shiu khusambwa khu Mwami Nyasaye, kave nu khurweshitsa lilaaka inoho khuli shihanwa shiu khwirulitsa nu mwoyo kwosi khuhaana, 19aliitsa khuhaana shihunwa, limiiko, inoho imbuli ikhole vuchila imbala yosi khu vilihuchililwa havukono henyu. 20Niiva muliitsa khuhaana muruku kwosi kuli ni imbala yosi, Mwami Nyasaye aliitsa khuvula khumuhuchilila. 21Lwa mundu ahaananga shihanwa shiu khulera milembe khu Mwami Nyasaye, kave nu khurweshitsa lilaaka inoho khuli shihanwa shiu khwirulitsa nu mwoyo kwosi khuhaanakhuhaana, muruku kwenoko kuvuli khuva ni imbala yosi niiva kuliitsa khuhuchililwa. 22Muvuli khuhaanakhu khu Mwami Nyasaye muruku kwosi kwavekhula inoho kwafwokoya inoho kwaremakanyinywa, inoho kurulanga mahila inoho kuli nu vulwale vwi shiseelo inoho mikhala. Muvuli khuhaanakhu muruku khuli kwenoko khu vwaali vu Mwami Nyasaye khuli shihanwa shi shiukhulia. 23Munyala khuhaana ichilishi inoho likondi lili ni shiungu shilala shiraambi inoho shimbi khuli shihanwa shiu khwirulitsa; shilitsa khuvula khuhuchililwa khurweshitsa lilaaka. 24Muvuli khahaanakhu khu Mwami Nyasaye muruku kwosi kwi misiko chia mavuyu chiu lwivulu chialaatwa, chiareemwa, chiasionolwa, inoho chiakutuulwa. Muvuli khukholakhu musango khuli kwenoko mu shivala shienyu.”

25“Muvuli khuhaanakhu khu Nyasaye wenyu muruku kwosi kwa mwanyola khurula khu mundu mucheni khuli shihanwa shi shiukhulia. Miruku khuli chienecho, chili ni tsimbala muchio, khandi chiliitsa khuvula khuhuchililwa, shichila chianatwa.”

26Mwami Nyasaye yavoolela Musa, 27“Lwa shimoli, likondi inoho shimeme shi imbuli viva ni viakhivulwa, viliitsa khurulitsa khu nyina khumatukhu saba. Navutswa khulitukhu lia munane, viliitsa khuhuchililwa khuli shihanwa shi shiukhulia khwinzi Mwami Nyasaye. 28Muvuli khusinzakhu ing'ombe halala ni shimoli shiayo, khandi likondi halala ni shimeme shialio inoho imbuli halala ni shimeme shiayo khukholela musango khulitukhu lilala liele. 29Lwa mukholanga musango ku khusanditsa inzi Mwami Nyasaye, mulonde mivaalo kenyekhanga nikanyalikha muhuchililwi. 30Muliitsa khulia musango kwenoko, khulitukhu lilala lienelo. Muvuli khulekhakhu shindu shiosi khu inyama iliitsa khuva nirikale khutukha mu mavwevwe.”

31Mwami Nyasaye yavoola, “Mulonde malako kaanje, mukakhole. Ninzi Mwami Nyasaye. 32Muvuli khwononyinyakhu lira lianje litakatifu. Vaisraeli voosi vahuchilile ndi ninzi mutakatifu. Ninzi Mwami Nyasaye uchilanga nivava vatakatifu, 33khandi ninzi wamurulitsa mu shivala shia Misri, khuva Nyasaye wenyu. Ninzi Mwami Nyasaye.”

Currently Selected:

LEVI 22: LLLCATHOLIC

Highlight

Copy